ប្រមុខរាជរដ្ឋាភិបាលបានចេញបញ្ជាថ្មីមួយទៅអាជ្ញាធរបណ្តាខេត្តជាប់ព្រំដែនថៃ និងអាជ្ញាធរពាក់ព័ន្ធ ឱ្យកាត់បន្ថយចំនួនអ្នកធ្វើចត្តាឡីស័កនៅតាមព្រំដែន ដោយឱ្យអ្នកដែលមិនមានការសង្ស័យថាមានកូវីដ១៩ ត្រូវមកធ្វើចត្តាឡីស័កនៅស្រុកកំណើត ខណៈអ្នកដែលសង្ស័យត្រូវរក្សាការធ្វើចត្តាឡីស័កនៅតាមព្រំដែនដដែល។
លោកនាយករដ្ឋមន្ត្រី ហ៊ុន សែន បានថ្លែងក្នុងសារជាសំឡេងកាលពីថ្ងៃម្សិលមិញថា ការសម្រេចបែបនេះ ដោយសារតែលោកពិនិត្យឃើញថា ខេត្តមួយចំនួនរបស់ថៃដែលនៅជាប់តំបន់ព្រំដែនជាមួយកម្ពុជា និងធ្លាប់ដាក់ជាតំបន់ហានិភ័យនៃការវាយលុកដោយជំងឺកូវីដ១៩នោះ ឥលូវនេះមានសភាពធូរស្រាល ហើយភាគីថៃអាចទប់ស្កាត់បានហើយ។ មួយវិញទៀត លោកថា ជាង១ខែមកនេះ មណ្ឌលចត្តាឡីស័កនៅតាមព្រំដែនរបស់កម្ពុជាទាំងអស់ មិនបានរកឃើញអ្នកឆ្លងជំងឺកូវីដ-១៩ឡើយ។
លោកនាយករដ្ឋមន្ត្រី ហ៊ុន សែន បានណែនាំឱ្យរថយន្តកងទ័ពដែលត្រៀមនៅតាមព្រំដែន ឱ្យជួយដឹកពលករដែលមកពីថៃមានសុខភាពធម្មតានិងមិនមានការសង្ស័យណាមួយនោះ ទៅធ្វើចត្តាឡីស័កនៅតាមបណ្តាខេត្តគោលដៅឬខេត្តដែលជាស្រុកកំណើតរបស់ពួកគេ លើកលែងតែពលករដែលមានបញ្ហាសុខភាពឬស្ថិតក្នុងករណីសង្ស័យ ទើបតម្រូវឱ្យធ្វើចត្តាឡីស័កនៅបណ្តាលខេត្តជាប់ព្រំដែននោះ ដើម្បីតាមដានសុខភាព។
លោកបានលើកឡើងបន្ថែមទៀតថា៖ «ស្ថានភាពនៅតាមព្រំដែនគឺមានការលំបាក ដោយសារតែចំនួនអ្នកចេញពីមណ្ឌលចត្តាឡីស័ក អ្នកចេញតិចជាងអ្នកចូល។ ដូច្នេះធ្វើឱ្យចំនួនអ្នកធ្វើចត្តាឡីស័កមានការកើនឡើងយ៉ាងខ្លាំង ដែលធ្វើឱ្យយើងមានការលំបាកនៅក្នុងការទទួលបន្ទុកចិញ្ចឹមថែទាំ»។
តែយ៉ាងណា លោកក្រើនរំឭកផងដែរទៅអាជ្ញាធរខេត្តទាំងអស់ និងអ្នកមានភារកិច្ចដឹកជញ្ជូនពលករខ្មែរមកពីថៃ ត្រូវមានវិធានការឱ្យបានម៉ត់ចត់ ដោយមិនត្រូវឱ្យមានអ្នកគេចវេះពីការធ្វើចត្តាឡីស័ក ត្រូវរក្សាគម្លាតសុវត្ថិភាព និងរៀបចំស្បៀងអាហារសម្រាប់ផ្គត់ផ្គង់ដល់ពលករទាំងនោះផងដែរ។
អ្នកនាំពាក្យសាលាខេត្តបន្ទាយមានជ័យ លោក លី សារី មានប្រសាសន៍ថា អាជ្ញាធរខេត្តបានត្រៀមអនុវត្តអនុសាសន៍នេះហើយ ដោយលោកថា ខេត្តជាប់ព្រំដែនមួយនេះមានមណ្ឌលធ្វើចត្តាឡីស័ក១៣កន្លែង និងអ្នកកំពុងធ្វើចត្តាឡីស័កជាង៥ ០០០នាក់ ។
លោកបន្តថា បច្ចុប្បន្ន ពលករត្រឡប់ពីប្រទេសថៃបានកើនឡើងយ៉ាងគំហុកចន្លោះពី៣០០ទៅ៦០០នាក់ក្នុងមួយថ្ងៃ ហើយថា អាចនឹងច្រើនជាងនេះនៅប៉ុន្មានថ្ងៃខាងមុខ ខណៈពិធីបុណ្យចូលឆ្នាំខ្មែរជិតមកដល់។
លោកថា៖ «បញ្ហាមួយទៀត គឺយើងរៀបចំទទួលបាយទឹកគាត់ ព្រោះធម្មតាយើងត្រូវរៀបចំបាយទឹកឱ្យគាត់បានហូបចុក។ បញ្ហាមួយទៀត គឺផ្សព្វផ្សាយអនុវត្តនូវសេចក្តីណែនាំរបស់ក្រសួងសុខាភិបាល និងសេចក្តីណែនាំរបស់សម្តេច គឺ “៣កុំ ៣ការពារ” ឱ្យខានតែបានតែម្តង»។
កន្លងទៅ រដ្ឋាភិបាលធ្លាប់ចេញបញ្ជាឱ្យពង្រាយកងកម្លាំងនៅតាមព្រំដែនជាប់នឹងប្រទេសថៃ និងបើកឱ្យមានមណ្ឌលសម្រាប់ធ្វើចត្តាឡីស័កផងដែរ ដូចជានៅខេត្តបាត់ដំបង បន្ទាយមានជ័យ ប៉ៃលិន និងឧត្តរមានជ័យ ខណៈខេត្តមួយចំនួនរបស់ថៃបានផ្ទុះការឆ្លងរាលដាលជំងឺកូវីដ១៩ ក្នុងសហគមន៍ទ្រង់ទ្រាយធំ។
វិធានការទប់ស្កាត់ការឆ្លងជំងឺកូវីដ១៩ របស់អាជ្ញាធរថៃ ស្របគ្នានឹងវិធានការធ្វើលិខិតស្របច្បាប់ សម្រាប់ពលករបរទេសទៅធ្វើការនៅក្នុងប្រទេសនោះ បានជំរុញឱ្យមានលំហូរចំណាកស្រុកពលករកម្ពុជាវិលត្រឡប់មកស្រុកកំណើតវិញ។ បើតាមលោកនាយករដ្ឋមន្ត្រី ហ៊ុន សែន ចំនួនអ្នកធ្វើចត្តាឡីស័កនៅតាមខេត្តជាប់ព្រំដែនមាន ១៥ ០០០ នាក់ ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍នៅថ្ងៃចន្ទនេះថា ជោគជ័យរបស់កម្ពុជាក្នុងការទប់ស្កាត់ការឆ្លងជំងឺកូវីដ១៩ គឺការទប់ស្កាត់ជំងឺនាំចូល ខណៈលោកថា វិធានការថ្មីរបស់រដ្ឋាភិបាលនេះបានធ្វើឱ្យចំណេញលើការចំណាយថវិកាជាតិខ្លះ និងសម្រួលដល់ការធ្វើដំណើររបស់ពលករខ្មែរខ្លះ។
តែយ៉ាងណាលោកថា៖ «បើសិនជាយើងពង្រឹងសមត្ថភាពនិងការទទួលខុសត្រូវឱ្យបានខ្លាំងរបស់អាជ្ញាធរមូលដ្ឋានហ្នឹងឱ្យទទួលខុសត្រូវខ្ពស់ក្នុងការគ្រប់គ្រងនៅតាមមណ្ឌលចត្តាឡីស័កផ្សេងៗ ហើយចូលរួមសកម្មក្នុងការងារហ្នឹង ខ្ញុំថា អាហ្នឹងយើងអាចគ្រប់គ្រងបាន។ ប៉ុន្តែបើយើងអត់បានផ្តល់នូវការទទួលខុសត្រូវ និងការគ្រប់គ្រងឱ្យបានគ្រប់គ្រាន់ទៅដល់ពួកគាត់ទេ ខ្ញុំបារម្ភមួយ ខ្លាចកម្ពុជាក្លាយទៅជាប្រទេសទទួលរងផលប៉ះពាល់ពីកូវីដចុងក្រោយគេ»។
គួរបញ្ជាក់ថា បច្ចុប្បន្ន កម្ពុជាកំពុងប្រឈមនឹងការឆ្លងរាលដាលនៃជំងឺកូវីដ១៩ ដែលរដ្ឋាភិបាលដាក់ឈ្មោះថា «ព្រឹត្តិការណ៍សហគមន៍២០កុម្ភៈ»។ ការឆ្លងក្នុងសហគមន៍ជាថ្មីនេះ បានជំរុញឱ្យរដ្ឋាភិបាលប្រកាសបិទទីតាំងមួយចំនួន ក្នុងនោះមានទីតាំងខ្លះនៅរាជធានីភ្នំពេញ ខេត្តកណ្តាល ខេត្តព្រះសីហនុ ខេត្តព្រៃវែង និងខេត្តមួយចំនួនទៀត ដែលគិតត្រឹមថ្ងៃទី៨ ខែមីនានេះ កម្ពុជា បានរកឃើញករណីឆ្លងក្នុងសហគមន៍២០កុម្ភៈ កើនឡើងដល់ជាង ៥០០នាក់ (៥០១នាក់) ធ្វើឱ្យអ្នកឆ្លងសរុបឡើងដល់ជាង ១ ០០០ នាក់ ( ១ ០១១នាក់) ក្នុងនោះព្យាបាលជាសះស្បើយមាន ៥១៧នាក់ និងកំពុងសម្រាកព្យាបាលមាន ៤៩៣នាក់៕