ប្រមុខរដ្ឋាភិបាលបានដាក់ចេញនូវវិធានការបន្ទាន់មួយចំនួន ក្នុងនោះបានណែនាំដល់ស្ថាប័នរដ្ឋនិងឯកជន ឱ្យកាត់បន្ថយចំនួនមនុស្សទៅធ្វើការនៅការិយាល័យជាបណ្តោះអាសន្នសិន ដើម្បីរក្សាគម្លាតសុវត្ថិភាពនិងបញ្ចៀសហានិភ័យនៃការឆ្លងរាលដាលជំងឺកូវីដ១៩ ដោយលោកថា ការឆ្លងកំពុងស្ថិតក្នុងស្ថានភាពធ្ងន់ធ្ងរ ។
តាមរយៈសារសំឡេងដែលបានផ្សព្វផ្សាយកាលពីយប់ថ្ងៃចន្ទម្សិលមិញ លោកនាយករដ្ឋមន្ត្រី ហ៊ុន សែន បានថ្លែងថា សភាពការនៅក្នុងប្រទេសគិតត្រឹមយប់មិញ បានធ្លាក់ក្នុងស្ថានភាពមិនធម្មតា ដែលថាមានអ្នកឆ្លងជំងឺកូវីដ១៩ថ្មីរហូតដល់៤៩នាក់ គិតតែនៅរាជធានីភ្នំពេញ ខេត្តព្រះសីហនុ ព្រៃវែង និងផ្នែកខ្លះនៅខេត្តកណ្តាល។
លោកបន្តថា សភាពការនេះបានដាក់ជាចំណោទធំៗដល់កម្ពុជា និងត្រូវមានវិធានការបន្ថែម ដើម្បីបន្តប្រយុទ្ធប្រឆាំងនឹងជំងឺដ៏កាចសាហាវនេះ។ លោកបានបញ្ជាក់ថា វិធានការទាំងនោះ រួមមាន តម្រូវឱ្យស្ថាប័ននីមួយៗរបស់រដ្ឋាភិបាល ស្ថាប័ននីតិបញ្ញតិ្ត (រដ្ឋសភា និង ព្រឹទ្ធសភា) រួមទាំងវិស័យឯកជន ត្រូវកាត់បន្ថយចំនួនមនុស្សនៅកន្លែងធ្វើការត្រឹម១០ភាគរយ និង៩០ភាគរយទៀតគួរធ្វើការពីផ្ទះ ឬក៏ត្រូវផ្លាស់ប្តូរវេនគ្នាយ៉ាងតិច១សប្តាហ៍សិន។
មួយវិញទៀត លោកថា ពិធីបុណ្យបែបសាសនា ឬមង្គលការ ត្រូវកាត់បន្ថយចំនួនមនុស្សដូចគ្នា ឬបើអាចគួរតែពន្យារពេល រីឯប្រជាពលរដ្ឋវិញ បើមិនចាំបាច់ មិនគួរចេញក្រៅផ្ទះឡើយ ដើម្បីកាត់បន្ថយការកកស្ទះនៅទីប្រជុំជនឬតាមដងផ្លូវ ដែលលោកថា ធ្វើដូច្នេះទើបអាចបញ្ចៀសនូវហានិភ័យនៃជំងឺឆ្លងដែលកំពុងវាយលុកបាន។
លោកនាយករដ្ឋមន្ត្រី ហ៊ុន សែន ថ្លែងថា៖ «សភាពការពេលនេះ ទាមទារឱ្យមានការប្រុងប្រយ័ត្នលើសមុន ហើយអ្វីដែលមិនចាំបាច់ ហើយវាមិនទាន់ចាំបាច់ និងអាចផ្អាកបាន គប្បីត្រូវតែពន្យារ គប្បីផ្អាក។ ពន្យារពេលរង់ចាំធ្វើនៅពេលក្រោយ ក៏មិនទាន់យឺតពេលដែរ។ នេះជាសភាពការដ៏បន្ទាន់ ហើយដែលត្រូវយកចិត្តទុកដាក់កុំឱ្យជំងឺនេះសាយភាយចេញក្រៅ»។
លោកបានបន្ថែមថា៖ «ពិតជាច្របូកច្របល់ខ្លាំងណាស់នៅពេលនេះ មានការឆ្លងនៅក្នុងក្របខណ្ឌនគរបាល មន្ត្រីរាជការ រហូតដល់សិល្បករ-សិល្បការិនីផងដែរ»។
ប៉ុន្តែសម្រាប់ស្ថាប័នកងកម្លាំងប្រដាប់អាវុធនិងក្រុមគ្រូពេទ្យ លោកនាយករដ្ឋមន្ត្រី ហ៊ុន សែន បញ្ជាក់ថា មិនត្រូវមានការកាត់បន្ថយចំនួនមនុស្សធ្វើការដូចស្ថាប័នស៊ីវិលនិងវិស័យឯកជនទេ។
ចំណែករោងចក្រនិងផ្សារ លោកថា រដ្ឋាភិបាលមិនមានវិធានការបិទនោះទេ។
លោកនាយករដ្ឋមន្ត្រីគូសបញ្ជាក់ថា វិធានការទាំងនេះជាវិធានការចាំបាច់ ដើម្បីការពារសុខភាពរបស់បុគ្គលម្នាក់ៗ ក៏ដូចជាក្រុមគ្រួសារនីមួយៗ ព្រមទាំងសង្គមជាតិផងដែរ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងបានអនុវត្តហើយនូវបទបញ្ជារបស់នាយករដ្ឋមន្ត្រី ដូចដែលក្រសួងបានធ្វើកាលពីព្រឹត្តិការណ៍២៨វិច្ឆិកាដែរ។ តែយ៉ាងណា លោកថា វិធានការនេះមិនប៉ះពាល់ដល់ការពង្រឹងសណ្តាប់ធ្នាប់សន្តិសុខផ្ទៃក្នុងប្រទេសទេ។
លោកថា៖ «ឧទាហរណ៍ [មន្ត្រី]ចរាចរណ៍មានប៉ុន្មាននាក់ គាត់ចេញប្រតិបត្តិការ ប្រឆាំងបទល្មើស គេប្រឆាំងនៅការិយាល័យរបស់គេ។ បើខាងអគ្គិភ័យ គេនៅប្រចាំការនៅការិយាល័យរបស់គេ »។
អ្នកនាំពាក្យរដ្ឋសភា លោក ឡេង ប៉េងឡុង និយាយថា ស្ថាប័ននីតិបញ្ញតិ្តមួយនេះបានជូនដំណឹងទៅមន្ត្រីរួចរាល់ហើយ ហើយថា នៅថ្ងៃនេះ មន្ត្រីប្រចាំការនៅមន្ទីររដ្ឋសភា មានត្រឹម១០០នាក់ ឬស្មើនឹង១០ភាគរយ។
លោកថា៖ «ខ្ញុំបានណែនាំទៅអង្គភាពឱ្យកាត់បន្ថយបុគ្គលិក ឱ្យធ្វើការតាមអនឡាញ ហើយឱ្យលុបពេលប្រជុំ សម្រាប់អ្នកនៅផ្ទះ កុំឱ្យចេញពីផ្ទះ ក្រៅពីហ្នឹងអនុវត្ត ៣កុំ និង ៣ការពារ»។
អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា (MFI) លោក កាំង តុងងី និយាយដែរថា សមាគមបានជូនដំណឹងទៅសមាជិកទាំង១១៤ស្ថាប័នអស់ហើយឱ្យអនុវត្តវិធានការនេះ។ លោកថា សមាគមក៏មានផែនការតាំងពីឆ្នាំ២០២០មកម៉្លេះ ក្នុងការរៀបចំផែនការបង្ការហានិភ័យពីការឆ្លងជំងឺកូវីដ១៩នេះ។
លោកថា៖ «តាំងពីផ្ទុះរលកទី២ហ្នឹង MFI ភាគច្រើនគឺគាត់ចាប់ផ្តើមបែងចែកបុគ្គលិកគាត់ ហើយបុគ្គលិកណាមិនចាំបាច់ គាត់អត់ឱ្យមកធ្វើការនៅការិយាល័យទេ គាត់ឱ្យធ្វើការនៅផ្ទះហើយ និងមានការបែងចែកបុគ្គលិកខ្លះទៅតាមសាខា កុំឱ្យកកកុញគ្នាច្រើនពេក»។
លោកបន្តថា ការតម្រូវឱ្យកាត់បន្ថយវត្តមានបុគ្គលិកនៅកន្លែងធ្វើការ ឬបែងចែកភាគច្រើនទៅធ្វើការតាមផ្ទះនោះ នឹងមិនប៉ះពាល់ដល់សេវាផ្តល់ប្រាក់កម្ចីនោះទេ។
ប្រធានមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា បង្ហាញពីក្តីបារម្ភចំពោះហានិភ័យដែលអាចកើតមាននៅថ្ងៃខាងមុខ ប្រសិនបើរដ្ឋាភិបាលប្រើតែវិធានការទប់ស្កាត់ជំងឺឆ្លង តែមិនបានគិតពីគោលនយោបាយទំនុកបម្រុងស្បៀងដល់អ្នកងាយរងគ្រោះនោះ។
លោកថា៖ «រឿងសុខភាពគាត់បារម្ភហើយ ប៉ុន្តែអ្វីដែលបារម្ភជាងនេះគឺការចំណាយប្រចាំថ្ងៃរបស់គាត់ ខ្លាចដាច់ពោះ ដល់ពេលហ្នឹងបើមនុស្សអត់មានចំណូលឬមួយមានបញ្ហាក្រពេះ គឺមនុស្សលែងខ្លាចស្លាប់ហើយ ដូចជំនាន់ ប៉ុល ពត អ៊ីចឹង មនុស្សអត់ចេះលួចក៏លួចដែរ»។
កម្ពុជាបានរកឃើញជំងឺកូវីដ១៩ ឆ្លងចូលក្នុងសហគមន៍ជាថ្មីទៀតចាប់តាំងពីថ្ងៃទី២០ ខែកុម្ភៈ ឆ្នាំ២០២១នេះ ដែលរដ្ឋាភិបាលដាក់ឈ្មោះថា «ព្រឹត្តិការណ៍សហគមន៍២០កុម្ភៈ»។ គិតចាប់តាំងពីមានការឆ្លងក្នុងព្រឹត្តិការណ៍នេះមក មានមនុស្សចំនួន៥៤៩នាក់ហើយដែលបានរកឃើញថាបានឆ្លងជំងឺកូវីដ១៩៕