គណបក្សប្រជាធិបតេយ្យមូលដ្ឋាន (គបម) អំពាវនាវឱ្យរដ្ឋាភិបាលពង្រឹងវិធានការគ្រប់គ្រង និងដោះស្រាយផលប៉ះពាល់ដល់អ្នកដែលរងគ្រោះដោយសារវិបត្តិកូវីដ១៩ ដើម្បីទប់ស្កាត់កុំឱ្យមានចលាចលសង្គមកើតឡើង ដោយគណបក្សនេះបានផ្តល់អនុសាសន៍៦ចំណុច ។
ក្នុងសេចក្តីថ្លែងការណ៍របស់គណបក្សប្រជាធិបតេយ្យមូលដ្ឋាន ចុះថ្ងៃទី១០ ខែមីនានេះ បានលើកឡើងថា ដើម្បីចូលរួមទប់ស្កាត់វិបត្តិកូវីដ១៩ កុំឱ្យមានភាពចលាចលក្នុងសង្គម រដ្ឋាភិបាលត្រូវធ្វើការបញ្ជាក់ឱ្យបានច្បាស់លាស់ថែមទៀតដល់ប្រជាពលរដ្ឋ និងគួរអនុវត្តនូវវិធានការសំខាន់ចំនួន៦ចំណុច។
គណបក្សនេះបានគូសបញ្ជាក់នូវវិធានការទាំងនោះថា រដ្ឋាភិបាលគួរគ្រប់គ្រងការឆ្លងរាលដាលជំងឺកូវីដ១៩ ក្នុងទ្រង់ទ្រាយធំឱ្យបានទាន់ពេលវេលា ធានាចំពោះពលរដ្ឋថារាជរដ្ឋាភិបាលមានសមត្ថភាពពេញលេញក្នុងការទទួលយកអ្នកសង្ស័យមកធ្វើចត្តាឡីស័ក រួមទាំងការផ្តល់កន្លែងស្នាក់នៅនិងការឧបត្ថម្ភផ្សេងៗអំឡុងពេលធ្វើចត្តាឡីស័ក និងព្យាបាល ព្រមទាំងត្រៀមបន្ថែមនូវឧបករណ៍ជួយដល់ការដកដង្ហើម។
មួយវិញទៀត គណបក្សនេះក៏បានអំពាវនាវដល់រដ្ឋាភិបាល ត្រូវពង្រឹងការគ្រប់គ្រងករណីនាំចូលពីក្រៅប្រទេស និងបង្ហាញពីការប្តេជ្ញាចិត្តក្នុងការចាក់វ៉ាក់សាំងជូនប្រជាពលរដ្ឋឱ្យបានទូទាំងប្រទេសក្នុងពេលកំណត់ណាមួយ ព្រមទាំងបង្ហាញផែនការច្បាស់លាស់ក្នុងការឧបត្ថម្ភដល់អ្នកពាក់ព័ន្ធនិងប្រជាពលរដ្ឋដែលរងគ្រោះផ្នែកសេដ្ឋកិច្ចដោយសារកូវីដ១៩។
វីអូឌី មិនទាន់អាចទាក់ទាក់ទងប្រធានគណបក្សនេះ លោក យ៉េង វីរៈ ដើម្បីសុំការពន្យល់បន្ថែមបាននៅឡើយទេ ដោយទូរសព្ទរបស់លោកគ្មានអ្នកទទួល។
តែយ៉ាងណា ក្រោយការផ្ទុះឡើងថ្មីទៀតនៃជំងឺកូវីដ១៩ ឆ្លងចូលសហគមន៍ ដែលរដ្ឋាភិបាលហៅថា «ព្រឹត្តិការណ៍សហគមន៍២០កុម្ភៈ» នោះ រដ្ឋាភិបាលបានដាក់ចេញនូវចំណាត់ការជាបន្តបន្ទាប់ ដូចជា រៀបចំសណ្ឋាគារលំដាប់ផ្កាយ និងទីតាំងជាច្រើនទៀតនៅរាជធានីភ្នំពេញ ដើម្បីឱ្យអ្នកសង្ស័យធ្វើចត្តាឡីស័ក និងព្យាបាលអ្នកជំងឺ ជាដើម។ ជាងនេះទៅទៀត រដ្ឋាភិបាល កាលពីយប់ម្សិលមិញ បានចេញបញ្ជាឱ្យមន្ត្រីរាជការ វិស័យឯកជន និងប្រជាពលរដ្ឋ រក្សាគម្លាតសង្គម ទាំងនៅទីប្រជុំជន និងនៅកន្លែងធ្វើការ ខណៈជំងឺឆ្លងនេះបាននិងកំពុងឆ្លងរាលដាលនៅរាជធានីភ្នំពេញ និងបណ្តាខេត្ត-ក្រុងមួយចំនួន ដែលគិតត្រឹមថ្ងៃពុធនេះ មនុស្សជាង៦០០នាក់ ត្រូវបានរកឃើញឆ្លងជំងឺនៅក្នុងព្រឹត្តិការណ៍សហគមន៍២០កុម្ភៈ និងមនុស្សរាប់រយនាក់ទៀត ត្រូវបានយកសំណាកទៅពិនិត្យ ដើម្បីតាមដានសុខភាព៕
