អាជ្ញាធរខេត្តព្រះសីហនុ នឹងបណ្តេញស្ត្រីជនជាតិចិនម្នាក់ដែលលួចចេញពីកន្លែងធ្វើចត្តាឡីស័កចេញពីប្រទេសកម្ពុជា ខណៈអាជ្ញាធរខេត្តតាកែវ ក៏បានឃាត់ខ្លួនអ្នកដំណើរជនជាតិចិនជាង១០នាក់ឱ្យធ្វើចត្តាឡីស័កផងដែរ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់ VOD ឱ្យដឹងនៅថ្ងៃម្សិលមិញថា មានករណីស្ត្រីជនជាតិចិនម្នាក់បានលួចធ្វើដំណើរចេញពីខេត្តព្រះសីហនុ មកកាន់រាជធានីភ្នំពេញ តាមរថយន្តឈ្នួល កាលពីថ្ងៃទី៨ ខែមីនា ឆ្នាំ២០២១។ លោកបន្តថា ពេលដល់ពាក់កណ្តាលផ្លូវ ស្ត្រីរូបនោះក៏ប្តូរទៅជិះរថយន្តទ្រុងដឹកទំនិញវិញ ដើម្បីគេចពីសមត្ថកិច្ច ប៉ុន្តែត្រូវកម្លាំងសមត្ថកិច្ចប្រចាំការនៅគោលដៅព្រំប្រទល់ស្រុកកំពង់សីលា និងស្រុកភ្នំស្រួច ឆែកឃើញនៅយប់ថ្ងៃដដែលនោះ។
អ្នកនាំពាក្យរូបនេះបន្តទៀតថា មន្រ្តីសុខាភិបាលខេត្តបានយកសំណាកស្រ្តីរូបនោះទៅធ្វើតេស្តរកវីរុសកូវីដ១៩ និងបានបញ្ជូនរូបគេទៅធ្វើចត្តាឡីស័កមុននឹងបណ្តេញចេញពីប្រទេសកម្ពុជា។
លោក ឃាង ភារម្យ មានប្រសាសន៍តាមសារ Telegram ថា៖ «អាជ្ញាធរក៏ដូចជាមន្រ្តីជំនាញបាននាំគាត់មកធ្វើចត្តាឡីស័ក។ សូមបញ្ជាក់ថា បន្ទាប់ពីការធ្វើចត្តាឡីស័ក១៤ថ្ងៃ ហើយនិងការយកសំណាករួចរាល់ហ្នឹង យើងនឹងរៀបចំបែបបទ [និង] នីតិវិធីស្នើសុំបណ្តេញចេញ»។
ការឃាត់ខ្លួននេះធ្វើឡើងបន្ទាប់ពីរដ្ឋបាលសាលាខេត្តព្រះសីហនុ ចេញសេចក្តីជូនដំណឹងហាមឃាត់អាជីវកម្មដឹកអ្នកដំណើរចេញនិងចូលខេត្តគ្រប់ប្រភេទជាបណ្តោះអាសន្ន លើកលែងរថយន្តដឹកទំនិញ តាមការណែនាំរបស់លោកនាយករដ្ឋមន្រ្តី ហ៊ុន សែន ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ បន្ទាប់ពីផ្ទុះករណីឆ្លងថ្មីនៅក្នុងទឹកដីខេត្តជាប់មាត់សមុទ្រមួយនេះ ពាក់ព័ន្ធព្រឹត្តិការណ៍សហគមន៍២០កុម្ភៈ។
ទន្ទឹមគ្នានោះ អាជ្ញាធរខេត្តតាកែវ ក៏បានឃាត់ខ្លួនបុរសជនជាតិចិនចំនួន២ក្រុមដែលមានចំនួនសរុប១៥នាក់ជាបន្តបន្ទាប់ក្នុងរយៈពេលពីរថ្ងៃនេះផងដែរ។
ស្នងការរងនគរបាលខេត្តតាកែវ លោក មាស ទេន ប្រាប់ VOD ឱ្យដឹងថា ជនជាតិចិនមួយក្រុមដែលមានគ្នា៩នាក់ ត្រូវបានសមត្ថកិច្ចឃាត់ខ្លួននៅចំណុចភូមិកំពង់រាប ឃុំកំពង់រាប ស្រុកព្រៃកប្បាស កាលពីព្រឹកថ្ងៃទី៩ ខែកុម្ភៈ នៅពេលដែលពួកគេទើបចុះពីរថយន្តឈ្នួលមួយ ហើយត្រូវប្រជាពលរដ្ឋឃើញក៏រាយការណ៍ទៅសមត្ថកិច្ច។ លោកបន្តថា មន្ត្រីជំនាញកំពុងសួរនាំនិងបានយកសំណាករបស់ពួកគេដើម្បីធ្វើតេស្តរកវីរុសកូវីដ១៩ និងកំពុងធ្វើចត្តាឡីស័កនៅមន្ទីរពេទ្យខេត្ត។
ដោយឡែកនៅថ្ងៃនេះ លោកស្នងការរង ក៏បានឱ្យដឹងថា សមត្ថកិច្ចក៏បានឃាត់ខ្លួនជនជាតិចិនមួយក្រុមទៀតដែលមានគ្នា៦នាក់នៅចំណុចព្រំដែនក្នុងឃុំជ័យជោគ ស្រុកបុរីជលសារ និងបានបញ្ជូនទៅកាន់រដ្ឋបាលខេត្ត ដើម្បីធ្វើការសាកសួរ និងដាក់ឱ្យនៅដាច់ដោយឡែក។
មន្រ្តីសមត្ថកិច្ចដដែល ប្រាប់ថា អាជ្ញាធរមិនទាន់ដឹងថា ជនជាតិចិនទាំងនោះធ្វើដំណើរមកពីណានិងមានគោលដៅទៅណានៅឡើយ ដោយសារពួកគេផ្តល់ចម្លើយផ្សេងៗគ្នា ហើយក៏មិនទាន់មានចំណាត់ការផ្លូវច្បាប់ណាមួយទៅលើពួកគេនៅឡើយ។
លោក មាស ទេន មានប្រសាសន៍ថា៖ «គាត់ថាមកពីភ្នំពេញទេ គាត់មកដើរលេង គាត់ស្រវឹងស្រា ស្រវឹងអី។ គាត់ជិះដើរលេង។ ឥលូវអញ្ចឹងបានថា យើងកំពុងតែបន្តសួរ ដើម្បីឱ្យដឹងព័ត៌មានពិត ថាតើគាត់ធ្វើការនៅកន្លែងណា ហើយគាត់មកពីណា ហើយគាត់មានគោលបំណងទៅណា យើងកំពុងតែរកភាពពិតប្រាកដន័យរបស់គាត់»។
លោកនាយករដ្ឋមន្រ្តី ហ៊ុន សែន បានប្រកាសពីការផ្ទុះរលកចម្លងជំងឺកូវីដ១៩ ក្នុងសហគមន៍សារជាថ្មី នៅថ្ងៃទី២០ ខែកុម្ភៈ ឆ្នាំ២០២១ ដោយផ្តើមចេញពីក្លឹបកម្សាន្តមួយកន្លែងនៅរាជធានីភ្នំពេញ ឈ្មោះ N8 ដែលរកឃើញស្រ្តីជនជាតិចិន ២នាក់ មានវិជ្ជមានកូវីដ១៩ ក្នុងចំណោមស្ត្រី ៤នាក់ ដែលបានលួចចេញពីការធ្វើចត្តាឡីស័កនៅសណ្ឋាគារសុខា ក្រោមការជួយនាំផ្លូវពីប្រធានសន្តិសុខម្នាក់ ដើម្បីទៅចូលលេងកម្សាន្តនៅទីនោះ។
ក្រោយកើតហេតុការណ៍នេះ រដ្ឋាភិបាលកម្ពុជាបានចេញអនុក្រឹត្យថ្មីមួយដែលបានប្រកាសដាក់ឱ្យប្រើប្រាស់ចាប់ពីថ្ងៃទី១៨ ខែកុម្ភៈ ឆ្នាំ២០២១ ក្នុងនោះ ត្រង់មាត្រា៨ បានកំណត់ទោសទណ្ឌដល់ «អ្នកដែលផ្តើមគំនិត ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកគេចចេញពីកន្លែងចត្តាឡីស័ក ដោយពិន័យជាប្រាក់ចាប់ពី១០លានរៀល ដល់៥០លានរៀល» ដោយមិនទាន់គិតពីទោសព្រហ្មទណ្ឌផ្សេងទៀត។
តាមរបាយការណ៍ពីក្រសួងសុខាភិបាល ចាប់តាំងពីមានការផ្ទុះឡើងនូវការឆ្លងជំងឺកូវីដ១៩ ក្នុងព្រឹត្តិការណ៍«សហគមន៍២០កុម្ភៈ»មក អ្នកឆ្លងជំងឺនេះបានកើនដល់៦១៣នាក់ ដែលធ្វើឱ្យតួលេខឆ្លងសរុបកើនដល់១ ១២៤នាក់ ក្នុងនោះ អ្នកជាសះស្បើយមាន៥៤៩នាក់ និងអ្នកជំងឺកំពុងសម្រាកព្យាបាលមាន៥៧៤នាក់៕
