អាជ្ញាធរភ្នំពេញ បានឃាត់ខ្លួនមនុស្សចំនួន៥៧នាក់នៅខារ៉ាអូខេឈ្មោះ អេនជេលផាលេស និងខារ៉ាអូខេ អាត់ជួង ដែលបន្តបើកអាជីវកម្មល្មើសនឹងវិធានសុខាភិបាល ដោយម្ចាស់និងមេការហាងខារ៉ាអូខេទាំង២កន្លែង នឹងត្រូវបញ្ជូនទៅតុលាការ។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា មានប្រសាសន៍ថាកាលពីយប់ថ្ងៃទី១០ ខែមីនា កម្លាំងចម្រុះបានឃាត់ខ្លួនមនុស្សនៅខារ៉ាអូខេ អេនជេលផាលេស (ANGEL PALACE) ដែលមានទីតាំងនៅខណ្ឌ៧មករា ចំនួន២២នាក់ និង៣៥នាក់ទៀតនៅខារ៉ាអូខេ អាត់ជួង ស្ថិតក្នុងខណ្ឌមានជ័យ។ លោកបានឱ្យដឹងទៀតថា ក្នុងចំណោមអ្នកទាំង៥៧នាក់នោះ អាជ្ញាធររកឃើញមនុស្ស៣នាក់ប្រើប្រាស់គ្រឿងញៀន។
លោកបញ្ជាក់ថា អាជ្ញាធរកំពុងបន្តនីតិវិធី ដោយមិនទាន់សម្រេចយ៉ាងណានៅឡើយ។
លោកថ្លែងថា៖ «៣នាក់ដែលផ្ទុកសារធាតុញៀននោះ យើងបញ្ជូនទៅបន្សាប។ ចំណែកខាងជំនាញព្រហ្មទណ្ឌកំពុងធ្វើការបន្ត នឹងរង់ចាំបញ្ជាពីថ្នាក់លើសម្រេចជុំវិញករណីធ្វើតេស្តរកកូវីដ-១៩។ ឥលូវហ្នឹង យើងមិនទាន់បញ្ចប់ការសាកសួរនៅឡើយទេ ភាគច្រើនគឺភ្ញៀវដែលចូល នារីខារ៉ាអូខេ និងបុគ្គលិកអ្នកគិតលុយ ជាដើម»។
អភិបាលរាជធានីភ្នំពេញ លោក ឃួន ស្រេង ប្រាប់វីអូឌីថា អាជ្ញាធរមិនអនុញ្ញាតឱ្យមានការបើកខារ៉ាអូខេក្នុងកាលៈទេសៈដែលជំងឺឆ្លងកំពុងរីករាលដាលបានទេ ហើយសមត្ថកិច្ចក៏មិនអត់ឱនឱ្យម្ចាស់អាជីវកម្មណាដែលហ៊ានល្មើសបម្រាមនោះដែរ។
លោកបានថ្លែងថា៖ «នារីខារ៉ាអូខេ និងអ្នកច្រៀង ត្រូវឱ្យធ្វើកិច្ចសន្យា ហើយស្កេនខ្យូអរកូដ [QR code] ចត្តាឡីស័ក តាមវិធានសុខាភិបាល។ បើល្មើស យើងនឹងចាត់វិធានការបន្ត។ ចំពោះមេការនិងម្ចាស់អាជីវកម្ម យើងត្រូវបញ្ជូនពួកគាត់ទៅតុលាការ ហើយទីតាំងនោះយើងដកអាជ្ញាបណ្ណជារៀងរហូត»។
លោកបញ្ជាក់ថា វិធានការតឹងរ៉ឹងរបស់អាជ្ញាធររាជធានីភ្នំពេញ ធ្វើឡើងដើម្បីការពារអាយុជីវិតប្រជាពលរដ្ឋប៉ុណ្ណោះ ហើយលោកស្នើឱ្យពលរដ្ឋចូលរួមសហការនិងយោគយល់។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា កញ្ញា អ៊ូ ទេពផល្លីន មានប្រសាសន៍ថា កញ្ញាស្វាគមន៍ចំណាត់ការប្រឆាំងកូវីដ-១៩ របស់រាជរដ្ឋាភិបាល ក្នុងការចុះបិទទីតាំងខារ៉ាអូខេទាំង២នេះ។ ប៉ុន្តែកញ្ញាស្នើឱ្យរដ្ឋាភិបាលពិចារណាផ្ដល់ការឧបត្ថម្ភនានាជូនដល់នារីខារ៉ាអូខេ និងអ្នកធ្វើការក្នុងវិស័យកម្សាន្ត ដើម្បីកុំឱ្យពួកគាត់លួចធ្វើការងារទាំងប្រថុយគ្រោះថ្នាក់តទៅទៀត។
កញ្ញា អ៊ូ ទេពផល្លីន និយាយថា៖ «យើងយល់ពីចេតនាពីការការពារមិនឱ្យឆ្លង [កូវីដ-១៩] ប៉ុន្តែទន្ទឹមនឹងរដ្ឋាភិបាលគួរធ្វើអីបន្ថែមទៀត ដើម្បីទប់កុំឱ្យឆ្លងជំងឺ ហើយឱ្យពលរដ្ឋ [អ្នកធ្វើការងារក្រៅប្រព័ន្ធ] អាចរស់បាន។ ក្នុងដំណាក់កាលនេះ តើរដ្ឋាភិបាលគួរតែជួយគាំទ្រអ្វីជាបណ្ដោះអាសន្ន គួរគិតលើរឿងអ្នកដែលអត់ឃ្លាន ហើយធ្វើការងារទាំងប្រថុយប្រថាននេះ តើធ្វើម៉េចអាចឱ្យពួកគាត់មានហូបផង»។
អាជ្ញាធររាជធានីភ្នំពេញ បានសម្រេចផ្អាកទីតាំងអាជីវកម្មគ្រប់ប្រភេទជាង១០០ទីតាំងដែលពាក់ព័ន្ធនឹងការឆ្លងមេរោគកូវីដ-១៩ ក្នុងសហគមន៍ ចាប់តាំងពីថ្ងៃទី២០ ខែកុម្ភៈ ឆ្នាំ២០២១នេះមក។ ក្រសួងសុខាភិបាលឱ្យដឹងថា កម្ពុជាមានមនុស្សម្នាក់បានស្លាប់ដោយជំងឺកូវីដ-១៩ និងមានអ្នកឆ្លងសរុប ១ ១៦៣នាក់ ក្នុងនោះអ្នកកំពុងសម្រាកព្យាបាលនៅមន្ទីរពេទ្យមាន៥៦៥នាក់ គិតមកដល់ព្រឹកនេះ៕