សមត្ថកិច្ចខេត្តព្រះសីហនុ បានបង្ក្រាបករណីបង្កប់គ្រឿងញៀនតាមកញ្ចប់បញ្ញើ និងនៅក្នុងអាហារចូលកន្លែងធ្វើចត្តាឡីស័ក បានចំនួន៦ករណី ក្នុងនោះមាន៤ករណីត្រូវបានបញ្ជូនទៅតុលាការ។
ស្នងការនគរបាលខេត្តព្រះសីហនុ លោក ជួន ណារិន្ទ បានប្រាប់ VOD យ៉ាងខ្លីនៅថ្ងៃទី១១ ខែមីនានេះថា គិតចាប់ពីមានការផ្អាកការធ្វើដំណើរចេញនិងចូលខេត្ត កាលពីថ្ងៃទី០៤ ខែមីនា រហូតមកទល់ពេលនេះ សមត្ថកិច្ចបានទប់ស្កាត់ករណីលួចនាំគ្រឿងញៀនទៅឱ្យអ្នកកំពុងធ្វើចត្តាឡីស័កនៅកន្លែងធ្វើចត្តាឡីស័ក ចំនួន៦ករណី និងកំពុងរឹតបន្តឹងការត្រួតពិនិត្យលើកិច្ចការនេះ។
លោកថា៖ «ខ្ញុំបានជម្រាបជូនថា៦ករណី។ មកដល់ពេលនេះ យើងកំពុងអនុវត្តវិធានការរឹតបន្តឹងអំពីការងារចរាចរណ៍ និងកាន់កាប់សារធាតុញៀននេះ អនុវត្តទៅតាមនីតិវិធីផ្លូវច្បាប់»។
មន្រ្តីនគរបាលប្រឆាំងគ្រឿងញៀនខេត្តព្រះសីហនុមួយរូបដែលសុំមិនបញ្ចេញឈ្មោះ ឱ្យដឹងបន្ថែមថា សមត្ថកិច្ចបានកសាងសំណុំរឿងចំនួន៤ករណី ដែលមានជនសង្ស័យចំនួន៧នាក់ (ជនជាតិចិន ៥នាក់ និងជនជាតិវៀតណាម ២នាក់) បញ្ជូនទៅតុលាការ និងកំពុងបន្តនីតិវិធីលើអ្នកពាក់ព័ន្ធ២ករណីផ្សេងទៀត។
មន្រ្តីនគរបាលដដែលបន្ថែមថា ដោយយោងតាមច្បាប់ប្រឆាំងការជួញដូរសារធាតុញៀនរបស់ព្រះរាជាណាចក្រកម្ពុជា ជនសង្ស័យពាក់ព័ន្ធអាចនឹងមានទោសជាប់ពន្ធនាគារពី២ទៅ៥ឆ្នាំ។ យ៉ាងណា ប្រភពដដែលមិនទាន់អាចបញ្ជាក់ថា សារធាតុញៀនប៉ុន្មានក្រាម និងប្រភេទអ្វីខ្លះ ដែលបានដកហូតនៅឡើយ។
មន្រ្តីរូបនេះនិយាយថា៖ «ព្រោះឥលូវយើងអត់ទាន់ធ្វើការចប់ទេបង! ប៉ុន្តែគ្រាន់តែថាយើងបានបញ្ជូនទៅតុលាការ៤ករណីហើយ [មានគ្នា] ៧នាក់ ហើយនៅសល់២ករណី យើងកំពុងធ្វើនីតិវិធី»។
តាមរបាយការណ៍ពីនាយកដ្ឋានប្រយុទ្ធប្រឆាំងនឹងជំងឺឆ្លងនៃក្រសួងសុខាភិបាល គិតត្រឹមថ្ងៃព្រហស្បតិ៍ ទី១១ ខែមីនា ឆ្នាំ២០២១ ករណីវិជ្ជមានកូវីដ-១៩ ក្នុងខេត្តព្រះសីហនុ បានកើនដល់១៨០នាក់ ក្នុងនោះមានជនជាតិចិន១០៩នាក់ បារាំង៣៦នាក់ កម្ពុជា១៩នាក់ និងវៀតណាម៦នាក់។
មន្រ្តីឃ្លាំមើលសិទ្ធិមនុស្សនៃអង្គការលីកាដូប្រចាំខេត្តព្រះសីហនុ លោក ស្រេង វ៉ាន់លី សាទរចំពោះលទ្ធផលនៃការទប់ស្កាត់ការនាំយកគ្រឿងញៀនទៅឱ្យអ្នកដែលជាប់ធ្វើចត្តាឡីស័ករបស់អាជ្ញាធរ។
យ៉ាងណា លោកថា ភាគីពាក់ព័ន្ធគួរបង្កើនការត្រួតពិនិត្យបន្ថែមទៀត ដើម្បីចៀសវាងការថ្លោះធ្លោយដែលអាចនាំឱ្យអ្នកដែលកំពុងធ្វើចត្តាឡីស័កមានបញ្ហាសុខភាព ដោយសារការប្រើប្រាស់សារធាតុញៀន។
លោកថា បញ្ហាគ្រឿងញៀនក្នុងខេត្តព្រះសីហនុ គឺនៅតែឋិតក្នុងស្ថានភាពប្រឈមនៅឡើយ ពាក់ព័ន្ធនឹងការប្រើប្រាស់និងជួញដូរ ដែលមានទាំងជនជាតិខ្មែរនិងជនបរទេស ដោយលោកថា បញ្ហាទាំងនេះ អាជ្ញាធរពាក់ព័ន្ធមិនទាន់មានចំណាត់ការដោះស្រាយឱ្យចំគោលដៅនៅឡើយ។
លោក ស្រេង វ៉ាន់លី មានប្រសាសន៍ថា៖ «សុំឱ្យអាជ្ញាធរមានសមត្ថកិច្ចបង្កើនវិធានការត្រួតពិនិត្យ និងអនុវត្តវិធានការផ្លូវច្បាប់បន្ថែមទៀតទៅលើអ្នកដែលជួញដូរធំៗ ក៏ដូចជាអ្នកជួញដូរ និងប្រើប្រាស់គ្រឿងញៀនហ្នឹង ព្រោះឃើញថា បញ្ហាគ្រឿងញៀននៅពេលដែលគាត់ប្រើប្រាស់ទៅ ធ្វើឱ្យគាត់បាត់បង់ស្មារតី ក៏ដូចជាសតិ ឬក៏គាត់ឈានរហូតដល់ការប្រព្រឹត្តបទល្មើសផ្សេងៗទៀត ដើម្បីបានថវិកាទៅប្រើប្រាស់នូវគ្រឿងញៀន»។
កាលពីថ្ងៃទី៤ ខែមីនា ឆ្នាំ២០២១ បុរសជនជាតិចិនវិជ្ជមានកូវីដ-១៩ វ័យ៣៩ឆ្នាំម្នាក់ ដែលកំពុងសម្រាកព្យាបាលជំងឺនៅមណ្ឌលចត្តាឡីស័ករាជធានីភ្នំពេញ ត្រូវបានក្រសួងសុខាភិបាលរាយការណ៍ថា រូបគេបានស្លាប់ដោយសាររើមេថ្នាំញៀនធ្ងន់ធ្ងរ ធ្វើឱ្យបេះដូងគាំងដំណើរការភ្លាមៗ។
រដ្ឋមន្ត្រីក្រសួងមហាផ្ទៃ លោក ស ខេង បានថ្លែងក្នុងពិធីមួយកាលពីដើមខែកុម្ភៈ ដោយបង្ហាញការព្រួយបារម្ភចំពោះការចរាចរគ្រឿងញៀននៅកម្ពុជានាពេលបច្ចុប្បន្ន ដែលលោកថា កំពុងរីកសាយភាយទៅដល់ទីជនបទ ដែលទាមទារឱ្យគ្រប់ភាគីរួមគ្នាទប់ស្កាត់។
លោកមានប្រសាសន៍ថា៖ «ឥលូវហ្នឹង គឺថាមួយថ្ងៃយ៉ាងតិចណាស់៦ខេត្តទៅ១០ខេត្ត មានមួយពីរករណី។ រឿងនេះ បើយើងមិនស្រុះគ្នាដើម្បីធ្វើទេ គ្រឿងញៀនវាត្រួតត្រាយើងថ្ងៃណាមួយ»។
ក្នុងរបាយការណ៍របស់ក្រសួងមហាផ្ទៃ ចុះផ្សាយនៅថ្ងៃទី១៩ ខែកុម្ភៈ ឆ្នាំ២០២១ បានឱ្យដឹងថា ក្នុងឆ្នាំ២០២០ កម្ពុជាបានបង្ក្រាបបទល្មើសគ្រឿងញៀនចំនួន ១០ ៤៦១ ករណី ឃាត់ខ្លួនជនសង្ស័យបានចំនួន ២១ ៥៦៦ នាក់ ចាប់យកសារធាតុញៀនគ្រប់ប្រភេទសរុបទម្ងន់ ៣ ៨៧៥,៩០ គីឡូក្រាម និងសារធាតុគីមីផ្សំសរុបទម្ងន់ ៤ ៤២៥ គីឡូក្រាម ក្នុងនោះបានបង្រ្កាបករណីជួញដូរធំៗមានចំនួន ៧៧ ករណី៕
