មន្ត្រីសុខាភិបាលនិងអាជ្ញាធរខេត្តបាត់ដំបង កំពុងស្រាវជ្រាវរកអ្នកពាក់ព័ន្ធនឹងស្ត្រីខ្មែរម្នាក់ដែលផ្ទុកវីរុសកូវីដ-១៩ រស់នៅឃុំបាយដំរាំ ស្រុកបាណន់។
អ្នកនាំពាក្យ និងជាអភិបាលរងខេត្តបាត់ដំបង លោក សឿម ប៊ុនរិទ្ធ មានប្រសាសន៍នៅថ្ងៃទី១១ ខែមីនា ឆ្នាំ២០២១ ថាស្ត្រីដែលផ្ទុកវីរុសកូវីដ-១៩នោះបានធ្វើដំណើរមកពីខេត្តព្រះសីហនុ ឆ្លងកាត់រាជធានីភ្នំពេញ រួចទៅដល់ខេត្តបាត់ដំបង កាលពីអំឡុងដើមសប្តាហ៍នេះ។ ស្ត្រីរូបនោះត្រូវបានក្រសួងសុខាភិបាលបញ្ជាក់ថា វិជ្ជមានវីរុសកូវីដ១៩ កាលពីថ្ងៃទី១០ ខែមីនា ឆ្នាំ២០២១។
លោកបន្តថា រដ្ឋបាលខេត្តនិងមន្ត្រីពាក់ព័ន្ធបាននិងកំពុងតាមដានស្រាវជ្រាវរកអ្នកដែលពាក់ព័ន្ធដោយផ្ទាល់និងប្រយោលនឹងអ្នកជំងឺរូបនេះ ដើម្បីយកសំណាកមកធ្វើតេស្តរកវីរុសកូវីដ-១៩ ប៉ុន្តែលោកមិនទាន់អាចបញ្ជាក់បានថា តើមានចំនួនប៉ុន្មាននាក់និងទីតាំងណាខ្លះដែលពាក់ព័ន្ធនៅឡើយ។
លោកថា៖ «ឥលូវយើងកំពុងតែត្រួតពិនិត្យនៅផ្ទះគាត់ហ្នឹងហើយ ហើយយើងក៏បានដាក់យាមកាមហើយ មិនឱ្យមានការចេញចូល។ ហើយទីពីរ ពាក់ព័ន្ធនឹងករណីគាត់ហ្នឹង យើងបានយកមកព្យាបាលហើយ»។
លោកបន្តថា៖ «យើងក៏កំពុងធ្វើការស្រាវជ្រាវទាំងអ្នកបើកបររថយន្ត អ្នកជិះជាមួយដើម្បីយើងធ្វើសំណាក ដើម្បីយើងស្រាវជ្រាវបន្ថែម។ ហើយទន្ទឹមហ្នឹង ខេត្តក៏បានចេញសេចក្តីសម្រេចមួយបង្កើតក្រុមការងារស្រាវជ្រាវនិងតាមដានបុគ្គលសង្ស័យថាមានផ្ទុកកូវីដ-១៩ ខេត្តបាត់ដំបង»។
ពាក់ព័ន្ធនឹងករណីពលករខ្មែរដែលមកពីថៃតាមច្រកព្រំដែនក្នុងខេត្តបាត់ដំបងនេះវិញ លោក សឿម ប៊ុនរិទ្ធ មានប្រសាសន៍ថា មានការថយចុះច្រើន ដោយសារតែមានចំណាត់ការតឹងរ៉ឹងពីសំណាក់អាជ្ញាធរថៃ ពាក់ព័ន្ធនឹងការចេញ-ចូលប្រទសកម្ពុជា។
លោកថា៖ «ពលករយើងឥលូវនេះមានការថយចុះហើយ ដោយសារពីមុនរាប់រយនាក់ [ក្នុងមួយថ្ងៃ] ឥលូវក្នុងមួយថ្ងៃចូលមក បានន័យថា ខ្ទង់រាយ បានន័យថា ជួលកាល ៣០នាក់ ៤០នាក់ ជួនកាល ៩០នាក់។ ដូចកាលម្សិលមិញហ្នឹងចូលមក៩៥នាក់អីចឹង»៕