លោកនាយករដ្ឋមន្ត្រី ហ៊ុន សែន បានចេញបញ្ជាជាថ្មីទៀតទៅមន្ត្រីពាក់ព័ន្ធឱ្យបង្កើនវិធានការទប់ស្កាត់ការឆ្លងរាលដាលជំងឺកូវីដ-១៩ ដោយឱ្យរកសណ្ឋាគារ២ទៀតធ្វើជាកន្លែងសម្រាប់ព្យាបាល និងបញ្ចេញពេទ្យយោធា ៣០០នាក់ មកជួយអន្តរាគមន៍ ដើម្បីទប់ទល់នឹងការហក់ឡើងនៃចំនួនអ្នកឆ្លងក្នុងសហគមន៍។
តាមរយៈសារជាសំឡេងកាលពីថ្ងៃពុធ លោកនាយករដ្ឋមន្ត្រី ហ៊ុន សែន បានបញ្ជាឱ្យរដ្ឋមន្ត្រី ៣រូប ទទួលខុសត្រូវលើបទបញ្ជាថ្មីនេះ ដែលក្នុងនោះមានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន, រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងរដ្ឋមន្ត្រីក្រសួងការពារជាតិ លោក ទៀ បាញ់។
លោកបានបញ្ជាទៅឱ្យលោក ម៉ម ប៊ុនហេង ទទួលខុសត្រូវលើការផ្គត់ផ្គង់សម្ភារបរិក្ខារពេទ្យ សម្រាប់ព្យាបាលនៅកន្លែងថ្មី រីឯលោក អូន ព័ន្ធមុនីរ័ត្ន ត្រូវទទួលបន្ទុកផ្គត់ផ្គង់ថវិកាបំប៉នបន្ថែមលើប្រាក់ខែនិងរបបផ្សេងៗរបស់យោធាដែលមានស្រាប់ ខណៈលោក ទៀ បាញ់ ទទួលខុសត្រូវលើផ្នែកផ្គត់ផ្គង់ក្រុមគ្រូពេទ្យយោធាដែលត្រូវបញ្ចេញ ដើម្បីជួយជាកម្លាំងគ្រូពេទ្យស៊ីវិល ដែលកំពុងប្រតិបត្តិការជួយសង្គ្រោះ។
លោកនាយករដ្ឋមន្ត្រី ហ៊ុន សែន ថ្លែងថា៖ «យោបល់របស់ខ្ញុំសម្រាប់ពេទ្យពីរកន្លែងដែលរៀបចំនៅទីក្រុងភ្នំពេញនេះ ប្រសិនបើវាបានកើតឡើង គឺត្រូវប្រគល់ឱ្យកងទ័ពរៀបចំនិងគ្រប់គ្រងតែម្តង ប្រើប្រាស់វេជ្ជបណ្ឌិតនិងគ្រូពេទ្យពីកងទ័ពដើម្បីគ្រប់គ្រង ហើយកម្លាំងសល់ពីនោះ ក៏ត្រូវរៀបចំត្រៀមទៅកាន់អន្តរាគមន៍ទៅកាន់គោលដៅដែលមានហានិភ័យខ្ពស់»។
លោកបានគូសបញ្ជាក់ថា ការចេញបញ្ជាថ្មីនេះដោយមើលឃើញថា មួយរយៈចុងក្រោយនេះ កម្លាំងចេញជួយសង្គ្រោះមានការនឿយហត់ «រួមទាំងការកើនឡើងយ៉ាងគំហុករបស់អ្នកជំងឺកូវីដ» ខណៈគ្រូពេទ្យស៊ីវិលត្រូវទទួលរ៉ាប់រងព្យាបាលជំងឺពលរដ្ឋទូទៅផងនោះ។
លោកនាយករដ្ឋមន្ត្រី បន្តថា បញ្ហាប្រឈមនេះ លោកបានពិភាក្សារួចហើយជាមួយរដ្ឋមន្ត្រីក្រសួងការពារជាតិ ដើម្បីបញ្ចេញគ្រូពេទ្យយោធាឱ្យចេញមកជួយអន្តរាគមន៍គ្រូពេទ្យស៊ីវិល និងបញ្ជាទៅមេបញ្ជាការកងទ័ពជើងគោក ឱ្យសហការជាមួយសាលារាជធានីភ្នំពេញ ដើម្បីរកទីតាំងបន្ថែមសម្រាប់ត្រៀមដោះស្រាយបញ្ហានេះ។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា ក្រុមការងារកំពុងសិក្សាជាអាទិភាព ដោយផ្តោតលើ៣ទីតាំង ប៉ុន្តែលោកមិនទាន់អាចប្រាប់ឈ្មោះទីតាំងនិងតម្លៃជួលបាននៅឡើយទេ ។
លោកថា៖ «សង្ឃឹមថាទីតាំងទាំង៣នេះ យើងជ្រើសរើសបានល្អ នៅទីតាំងមួយដែលធំហើយមានគុណភាពនិងប្រសិទ្ធភាពសម្រាប់ការព្យាបាល តែទីតាំងនេះ ខ្ញុំមិនទាន់ជម្រាបជូនទេ តែយើងកំពុងធ្វើការចរចាជាមួយម្ចាស់ទីតាំងហើយ»។
ចំណែករដ្ឋមន្ត្រីក្រសួងការពារជាតិ លោក ទៀ បាញ់ មានប្រសាសន៍ថា បទបញ្ជារបស់នាយករដ្ឋមន្ត្រីនេះ ក្រសួងបាននិងកំពុងរៀបចំហើយ។
លោកថា៖ «កិច្ចការនេះ គេធ្វើហើយ។ កុំខ្វល់នោះ រឿងអ៊ីចឹងៗនោះ»។
តែយ៉ាងណា លោក ទៀ បាញ់ បញ្ជាក់ថា វេជ្ជបណ្ឌិតនិងពេទ្យយោធាដែលត្រូវបញ្ជូនចេញឱ្យមកជួយគ្រូពេទ្យស៊ីវិល ដើម្បីទប់ស្កាត់និងព្យាបាលកូវីដ-១៩នោះ សុទ្ធតែអ្នកមានជំនាញនិងបទពិសោធន៍ច្រើនឆ្នាំ។
លោកថា៖ «វេជ្ជបណ្ឌិត ខាងពេទ្យហ្នឹង គេចេះគេដឹងហើយ។ វាដូចតែគ្នាទេ [ដូចពេទ្យស៊ីវិល] គេចេះ គេដឹង គេបានបណ្តុះបណ្តាលមករាប់ឆ្នាំមិនអស់ហើយ ឆ្លងតាមបទពិសោធន៍នេះ ក៏គេមានបទពិសោធន៍ដែរ»។
ប៉ុន្តែយ៉ាងណា លោកមិនប្រាប់ពីទំហំទឹកប្រាក់បំប៉នដែលពួកគេត្រូវទទួលបានអំឡុងចេញប្រតិបត្តិការនេះទេ ដោយថា ក្រសួងហិរញ្ញវត្ថុជាអ្នកចាត់ចែង។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានទេ។
គិតត្រឹមថ្ងៃព្រហស្បតិ៍ម្សិលមិញ ជំងឺរាតត្បាតកូវីដ-១៩ ដែលពាក់ព័ន្ធទៅនឹងព្រឹត្តិការសហគមន៍២០កុម្ភៈ បានរាលដាលដល់រាជធានី-ខេត្តចំនួន៩ហើយ ប៉ុន្តែខេត្តដែលក្រសួងសុខាភិបាលរកឃើញមានបញ្ហាប្រឈមជាងគេ នៅរាជធានីភ្នំពេញ ខេត្តព្រះសីហនុ ខេត្តកណ្តាល និងខេត្តព្រៃវែង។
អ្នកនាំពាក្យសាលាខេត្តព្រៃវែង លោក ឈៀន សុវណ្ណរ៉ា ឱ្យដឹងថា អ្នកឆ្លងជំងឺកូវីដ-១៩ នៅក្នុងខេត្តសរុបមានចំនួន២៣នាក់ បូកទាំងអ្នកឆ្លងថ្មី៦នាក់ ដែលក្រសួងសុខាភិបាលប្រកាសនៅថ្ងៃម្សិលមិញ។
អ្នកនាំពាក្យរូបនេះបញ្ជាក់ថា វិធានការបន្ទាប់ ត្រូវពង្រឹងការធ្វើចត្តាឡីស័ក និងស្វែងរកអ្នកប៉ះពាល់ ដើម្បីយកសំណាកមកពិនិត្យ ទប់ស្កាត់កុំឱ្យមានការឆ្លងបន្ត។
ប្រធានមន្ទីរអប់រំខេត្តព្រៃវែង លោក ប៉ាវ សុធី និយាយថា សាលារៀនទាំងអស់នៅក្នុងខេត្តបូករួមទាំងមតេ្តយ្យសហគមន៍សរុបចំនួន ១ ០៥៧ កន្លែង បានបិទ ហើយថា ជម្រើសអាទិភាពដែលមន្ទីរផ្តល់ឱ្យសិស្ស គឺរៀនពីចម្ងាយ។
លោកថា៖ «ជាអាទិភាព យើងមិនអាចរៀនតាមបណ្តុំបានទេ គឺយើងរៀនតាមអនឡាញ តាមទូរទស្សន៍ Messenger និងតាម ZOOM ជាដើម»។
តែយ៉ាងណា ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ធ្លាប់ផ្តល់ជាយោបល់ថា ដើម្បីទប់ស្កាត់កុំឱ្យមានភាពចលាចលសង្គម រដ្ឋាភិបាលត្រូវមានវិធានការពីរទន្ទឹមគ្នា គឺទាំងវិធានការទប់ស្កាត់ការឆ្លង និងវិធានការដោះស្រាយសេដ្ឋកិច្ចដល់អ្នកដែលរងផលប៉ះពាល់ផង៕
