មន្ត្រីមន្ទីរការងារខេត្តស្វាយរៀង ឱ្យដឹងថា កម្មករជិត៦០នាក់បានរងរបួសធ្ងន់និងស្រាលក្នុងហេតុការណ៍គ្រោះថ្នាក់ចរាចរណ៍មួយនៅចំណុចភូមិព្រៃផ្តៅ សង្កាត់ច្រកម្ទេស ក្រុងបាវិត នៅព្រឹកថ្ងៃសុក្រនេះ។
អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តស្វាយរៀង លោក អ៊ូ សុខឃឿន ប្រាប់ វីអូឌី ថាហេតុការណ៍គ្រោះថ្នាក់ចរាចរណ៍នេះកើតឡើងដោយសាររថយន្តកូរ៉េមួយគ្រឿងដែលដឹកកម្មករប្រមាណ៦០នាក់ បានបើកបរខ្វះការប្រុងប្រយ័ត្នបណ្តាលឱ្យក្រឡាប់ចេញពីផ្លូវ។
តាមព័ត៌មានបឋមដែលមន្ត្រីរូបនេះទទួលបាន គឺហេតុការណ៍គ្រោះថ្នាក់ចរាចរណ៍នោះបានបណ្តាលឱ្យកម្មករ៧នាក់របួសធ្ងន់ ៣នាក់របួសមធ្យម និង៤៨នាក់របួសស្រាល។
លោក អ៊ូ សុខឃឿន បន្តថា ក្រោយកើតហេតុ អាជ្ញាធរពាក់ព័ន្ធបានចុះអន្តរាគមន៍ដោយដឹកអ្នករបួសទៅសង្គ្រោះតាមមន្ទីរពេទ្យនានាភ្លាមៗ។ លោកថា កម្មករ៦នាក់បានបញ្ជូនទៅសម្រាកព្យាបាលនៅមន្ទីរពេទ្យខេត្តស្វាយរៀង ៥នាក់សម្រាកព្យាបាលនៅមន្ទីរពេទ្យបង្អែកស្វាយទាប ៣៦នាក់សម្រាកព្យាបាលនៅមន្ទីរពេទ្យបង្អែកជីភូ និង ១១នាក់សម្រាកព្យាបាលនៅគ្លីនិកបូពារ៍ ក្រុងបាវិត។
តែយ៉ាងណា លោកមិនទាន់អាចបញ្ជាក់ពីមូលហេតុជាក់លាក់នៃហេតុការណ៍ក្រឡាប់រថយន្តដឹកកម្មករនេះបាននៅឡើយទេ ដោយលោកថា រង់ចាំរបាយការណ៍ពីសមត្ថកិច្ចសិន។
យោងតាមរបាយការណ៍របស់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិសន្តិសុខសង្គម ដែលបានផ្សព្វផ្សាយកាលពីថ្ងៃទី៩ ខែកុម្ភៈ ឆ្នាំ២០២១ ឱ្យដឹងថា ក្នុងឆ្នាំ២០២០ គ្រោះថ្នាក់ចរាចរណ៍ដែលបានកើតឡើងទៅលើកម្មករនិយោជិត មានចំនួន១ ៩០០ករណី ដែលចំនួននេះមានការថយចុះជាងឆ្នាំ២០១៩ ចំនួន ៣១% ក្នុងនោះបានបណ្តាលឱ្យកម្មករស្លាប់៨៨នាក់ និងរបួស២ ១៨០នាក់៕