រដ្ឋបាលខេត្តមួយចំនួនដែលមានអ្នកឆ្លងជំងឺកូវីដ-១៩ បានណែនាំឱ្យពលរដ្ឋរបស់ខ្លួនផ្អាករៀបចំពិធីអាពាហ៍ពិពាហ៍និងពិធីជួបជុំផ្សេងៗដែលមិនចាំបាច់ជាបណ្ដោះអាសន្នសិន ដើម្បីចូលរួមទប់ស្កាត់នៃការឆ្លងរីករាលដាលជំងឺកូវីដ-១៩។
ខេត្តដែលបានចេញសេចក្តីណែនាំជាបន្តបន្ទាប់ កាលពីថ្ងៃម្សិលមិញ និងថ្ងៃនេះ រួមមាន ខេត្តព្រះវិហារ កោះកុង ប៉ៃលិន កំពង់ចាម ស្វាយរៀង កំពង់ស្ពឺ និងឧត្តរមានជ័យ។
យោងតាមសេចក្តីណែនាំដែលមានអត្ថន័យប្រហាក់ប្រហែលគ្នារបស់រដ្ឋបាលខេត្តទាំងនោះ បានលើកឡើងថា ស្របពេលដែលការឆ្លងរាលដាលនៃជំងឺកូវីដ-១៩ ក្នុងសហគមន៍ កំពុងបង្កជាក្តីបារម្ភកាន់តែខ្លាំង និងដើម្បីចូលរួមទប់ស្កាត់ការឆ្លងរាលដាលជំងឺនេះបន្ថែមក្នុងសហគមន៍នោះ អាជ្ញាធរខេត្តស្នើដល់ប្រជាពលរដ្ឋផ្អាករៀបចំកម្មវិធីផ្សេងៗ រួមទាំងកម្មវិធីអាពាហ៍ពិពាហ៍ ដែលមានលក្ខណៈប្រមូលផ្តុំមនុស្សច្រើន។
អភិបាលខេត្តកំពង់ធំ លោក សុខ លូ បានថ្លែងសារជាសំឡេងទៅកាន់អាជ្ញាធរក្នុងមូលដ្ឋានថា រាល់ការជួបជុំនានាក្នុងពិធីបុណ្យផ្សេងៗដែលមិនចាំបាច់ ដូចជា បុណ្យផ្កា បុណ្យបច្ច័យបួន ជាដើម គឺមិនគួរត្រូវអនុញ្ញាតឱ្យធ្វើនោះទេ និងគួរតែផ្អាកជាបណ្តោះអាសន្នសិន។
ដោយឡែក សម្រាប់ពិធីបុណ្យដែលចាំបាច់ ដូចជា បុណ្យសព បុណ្យ៧ថ្ងៃ និង១០០ថ្ងៃ ដែលមានការអនុញ្ញាតនោះ លោកថា ត្រូវតែរៀបចំយ៉ាងណាឱ្យមានគម្លាតសុវត្ថិភាព និងមិនត្រូវមានអ្នកចូលរួមច្រើននោះទេ។ ចំណែក ពិធីរៀបអាពាហ៍ពិពាហ៍វិញ បើចាំបាច់គួរតែរៀបចំដោយកាត់បន្ថយមនុស្សក្នុងមួយតុ ១០នាក់ មកនៅត្រឹម ៥នាក់។
លោកបញ្ជាក់ថា៖ «ចំពោះបុណ្យចាំបាច់ដាច់ខាត ត្រូវតែណែនាំគាត់ ដែលបុណ្យចាំបាច់ ដូចជា បុណ្យសព ១០០ថ្ងៃ ៧ថ្ងៃ អីហ្នឹង គឺធ្វើម៉េចឱ្យមានគម្លាតមនុស្ស ហើយកុំឱ្យមានការចូលរួមច្រើន ហើយតុដាក់ឱ្យអង្គុយគឺ៥នាក់ដាច់ខាត។ មង្គលការផ្សេងៗ សូមឱ្យគោរពមួយតុ គឺ៥នាក់ ហើយដាក់តុឃ្លាតៗគ្នា។ បើគាត់ធ្វើបាន តែបើធ្វើមិនបាន គឺមិនឱ្យការតែម្ដង និយាយឱ្យដាច់ម៉ាត់អញ្ចឹង ប្រាប់ទៅគ្រប់កន្លែងទាំងអស់»។
គិតត្រឹមថ្ងៃទី១២ ខែមីនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ នៅទូទាំងប្រទេសសរុប១ ២២៥នាក់ ក្នុងនោះ អ្នកជាសះស្បើយចំនួន៦១៩នាក់ ហើយកំពុងសម្រាកព្យាបាល៦០៤នាក់ និងស្លាប់ម្នាក់៕