សមត្ថកិច្ចនៅតាមបណ្តាខេត្តជាប់ព្រំដែន បានឃាត់ខ្លួនមេខ្យល់ជនជាតិខ្មែរ និងវៀតណាមជាង១៣៤នាក់ ពាក់ព័ន្ធនឹងការនាំពលករឆ្លងដែនខុសច្បាប់ ក្នុងអំឡុងពេលនៃការរឹតបន្តឹងច្រករបៀងតាមព្រំដែនរយៈពេលជាងមួយខែមកនេះ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍នៅចន្ទនេះថា យោងតាមរបាយការណ៍របស់សមត្ថកិច្ចពីតាមបណ្តាខេត្តជាប់ព្រំដែន គិតចាប់តាំងពីថ្ងៃទី១៣ ខែកុម្ភៈ ដល់ថ្ងៃអាទិត្យម្សិលមិញ សមត្ថកិច្ចបានស្រាវជ្រាវតាមចាប់មេខ្យល់ដែលនាំពលករឆ្លងដែនខុសច្បាប់បានចំនួន៩៥ករណី ក្នុងនោះជនសង្ស័យចំនួន១៣៤នាក់។
លោកបន្តថា បច្ចុប្បន្ន ជនសង្ស័យជាមេខ្យល់ទាំងនោះត្រូវបានបញ្ជូនទៅតុលាការ ដើម្បីចាត់ការតាមនីតិវិធីច្បាប់។
លោកថា៖ «បញ្ជូន[មេខ្យល់ទាំងនោះ]ទៅតុលាការទាំងអស់»។
អធិការរងស្រុកថ្មពួក ខេត្តបន្ទាយមានជ័យ លោក ទុយ ឆៃយ៉ា បានឱ្យដឹងថា តាមការអង្កេត ករណីលួចឆ្លងដែនខុសច្បាប់នៅតាមច្រកព្រំដែនក្នុងស្រុកនេះ គឺធ្វើឡើងដោយពលករផ្ទាល់ ដោយពួកគេច្រើនលួចឆ្លងដែននៅពេលយប់។
លោកមានប្រសាសន៍ថា៖ «យើងអត់មាន[ចាប់បានមេខ្យល់]ទេ យើងជាប់ព្រំដែន ព្រោះយប់ ប្រជាជនគាត់ចូលដោយខ្លួនឯង»។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានសាទរចំពោះការខិតខំប្រឹងប្រែងរបស់អាជ្ញាធរ ដើម្បីទប់ស្កាត់ពលករឆ្លងដែនខុសច្បាប់ក្នុងអំឡុងពេលនៃការរីករាលដាលជំងឺកូវីដ-១៩នេះ។ ទោះយ៉ាងណា លោកចង់ឱ្យអាជ្ញាធរមានចំណាត់ការលើមេខ្យល់ទាំងនោះតាមផ្លូវច្បាប់ស្មើៗភាពគ្នា ខណៈលោកសង្កេតឃើញថា កន្លងមក អាជ្ញាធរចាប់បានតែមេខ្យល់តូចតាចប៉ុណ្ណោះ។
លោកមានប្រសាសន៍ថា៖ «ទាល់តែការអនុវត្តច្បាប់ហ្នឹង គឺអនុវត្តទៅលើមេខ្យល់ណាដែលមានបណ្ដាញធំៗ ឬក៏ពាក់ព័ន្ធមន្រ្តីធំៗ ត្រូវចាត់វិធានការផ្លូវច្បាប់ឱ្យស្មើៗគ្នាអញ្ចឹង កុំឱ្យយើងចាប់តែតូចៗ ធ្វើបែបហ្នឹងបានអាចផ្ដាច់ឫសគល់មេខ្យល់ហ្នឹងបាន»។
លោកបន្ថែមថា៖ «អ្នកណា[មេខ្យល់]ដែលគាត់ អ្នកដែលតូចតាច យើងគួរតែអប់រំ ហើយបង្កើនការអប់រំដល់ប្រជាពលរដ្ឋទៅអំពីការជួញដូរមនុស្ស ឬមួយក៏កម្លាំងពលកម្មអីអញ្ចឹងទៅ។ ជួនកាលទៅ ដូចខ្ញុំជម្រាបខាងដើមអញ្ចឹង អ្នកខ្លះមិនដឹងថាខ្លួនឯងបានជាធ្វើអញ្ចឹងផង ទៅជាខុសច្បាប់ដែរ»។
កាលពីខែមុន លោកនាយករដ្ឋមន្ត្រី ហ៊ុន សែន បានបញ្ជាឱ្យពង្រាយកងកម្លាំងមានសមត្ថកិច្ចនៅតាមខ្សែបន្ទាត់ព្រំដែនជាប់ប្រទេសថៃនិងវៀតណាម ដើម្បីទប់ស្កាត់កុំឱ្យពលរដ្ឋចំណាកស្រុកទៅធ្វើការនៅក្រៅប្រទេសឬវិលចូលកម្ពុជាវិញ ទាំងមិនបានតាមដានសុខភាពឬធ្វើចត្តាឡីស័ករយៈពេល១៤ថ្ងៃ តាមសេចក្តីណែនាំរបស់ក្រសួងសុខាភិបាល៕
