ចាងហ្វាងកាសែតមួយរូបដែលជាជនរងគ្រោះ ស្នើសមត្ថកិច្ចខេត្តសៀមរាបតាមចាប់ខ្លួនជនល្មើសដែលបានប្រើដំបងវាយទៅលើខ្លួនបណ្តាលឱ្យរងរបួសធ្ងន់ នៅចំណុចមុខប្រាសាទបេងមាលា ក្នុងស្រុកស្វាយលើ។
ចាងហ្វាងកាសែតអាណាចក្រខ្មែរ និងជាជនរងគ្រោះ លោក ប្រន ស៊ាន រៀបរាប់ថា ហេតុការណ៍ហិង្សាទៅលើរូបលោកនេះ កើតឡើងកាលពីយប់រំលងអធ្រាត្រថ្ងៃទី១៣ ឈានចូលថ្ងៃទី១៤ ខែមីនា ឆ្នាំ២០២១ ដោយជនមិនស្គាល់មុខបានវាយរូបលោកជាច្រើនដំបង នៅពេលដែលលោកកំពុងសម្រាន្តលង់លក់។
លោកនិយាយពីហេតុការណ៍នៅថ្ងៃនោះថា៖ «ខ្ញុំជិះឡានមកពីយកព័ត៌មាននៅស្រុកគូលេន ខេត្តព្រះវិហារ ដល់កន្លែងកើតហេតុហ្នឹង ខ្ញុំអស់កម្លាំងពេក ក៏នាំគ្នាចងអង្រឹងសម្រាក។ ស្រាប់តែដល់ម៉ោង១២[យប់]ជាង មានប្រុស២នាក់ចេញពីព្រៃមកចូលវាយខ្ញុំតែម្ដង។ ខ្ញុំរបួសបែកក្បាលដេរអស់ជាង២០ថ្នេរ បាក់ធ្មេញអស់២ និងត្រូវមួយដំបងចំច្រមុះទៀត»។
លោក ប្រន ស៊ាន បន្តថា ករណីនេះជាករណីរៀបទុកជាមុន ដោយក្រុមអ្នកមានគំនុំជាមួយនឹងរូបលោក ដែលលោកសង្ស័យថា ក្រុមឈ្មួញរកស៊ីឈើខុសច្បាប់តែម្ដង។
លោកបន្ថែមថា៖ «អាជីពជាអ្នកកាសែត ខ្ញុំសរសេរព័ត៌មានច្រើនទាក់ទងនឹងបទល្មើសនានា។ ខ្ញុំគិតថា ករណីខ្ញុំនេះជាករណីពាក់ព័ន្ធនឹងពួកអ្នករកស៊ីឈើខុសច្បាប់តែម្ដង»។
ជនរងគ្រោះ និងសមាគមការពារអ្នកកាសែត ចាត់ទុកថា អំពើហិង្សានេះជាករណីគំរាមកំហែងថ្មីមួយទៀតដល់សុវត្ថិភាពអ្នកសារព័ត៌មាននៅកម្ពុជា និងស្នើឱ្យសមត្ថកិច្ចតាមចាប់ខ្លួនជនបង្កហិង្សាមកផ្ដន្ទាទោសតាមច្បាប់។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅ ខេមបូចា លោក ណុប វី មានប្រសាសន៍ថា អ្នកសារព័ត៌មានដែលរាយការណ៍ពីអំពើអសកម្មនានាក្នុងសង្គមកម្ពុជា តែងរកការគំរាមកំហែងជារឿយៗ រួមមាន ការយាយីតាមផ្លូវតុលាការ និងការប្រើហិង្សា រហូតមានករណីសម្លាប់ផង។លោកបញ្ជាក់ថា អំពើហិង្សាជាថ្មីលើអ្នកកាសែតនេះជាប្រការគួរឱ្យព្រួយបារម្ភ។
លោកថា៖ «បើជនល្មើសបន្តរស់នៅក្រៅសំណាញ់ច្បាប់ ដូច្នេះការធ្វើទុក្ខបុកម្នេញលើអ្នកសារព័ត៌មាននឹងនៅតែបន្តកើតមានឡើង។ ខ្ញុំស្នើឱ្យមានវិធានការចាំបាច់ឈានទៅវែកមុខជនបង្កនិងអ្នកនៅពីក្រោយខ្នងមកផ្ដន្ទាទោសតាមច្បាប់»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ មានប្រសាសន៍ថា ក្រសួងនឹងស្រាវជ្រាវករណីហិង្សាលើអ្នកសារព័ត៌មាននៅខេត្តសៀមរាបនេះ ហើយនឹងជម្រាបជូនព័ត៌មាននៅពេលក្រោយ។
ទាក់ទងនឹងបញ្ហានេះ អធិការនគរបាលស្រុកស្វាយលើ លោក ស៊ុន អេង ប្រាប់ វីអូឌី ថាលោកបានទទួលពាក្យបណ្ដឹងរួចហើយ និងកំពុងបន្តស្រាវជ្រាវរកជនល្មើសយកមកផ្តន្ទាទោសតាមច្បាប់។
លោកមានប្រសាសន៍ថា៖ «ពិបាកដែរបង! ជនរងគ្រោះគាត់ទៅដេកកណ្ដាលព្រៃ។ ដល់អញ្ចឹងយើងមិនទាន់កំណត់មុខសញ្ញា និងចាប់ខ្លួនជនសង្ស័យបាននៅឡើយ។ សរុបមក រឿងនេះយើងកំពុងតាមដាននិងស្រាវជ្រាវ»។
កាលពីខែកញ្ញា ឆ្នាំ២០២០ ក៏មានករណីហិង្សាលើអ្នកកាសែតស្រដៀងគ្នានឹងករណីនៅខេត្តសៀមរាបនេះដែរ។
កាលនោះ អ្នកសារព័តមាន២នាក់ត្រូវបានគេវាយនឹងដំបងបណ្ដាលឱ្យរបួសធ្ងន់ ពេលពួកគាត់សម្រាន្តក្នុងរថយន្ដចាំឃ្លាំមើលឡានដឹកឈើ តាមបណ្តោយផ្លូវជាតិលេខ៧ នៅស្រុកមេមត់ ខេត្តត្បូងឃ្មុំ ។
អ្នកសារព័ត៌មានដែលរងរបួសទាំងពីរនាក់នោះមានឈ្មោះ រេន សំណាង អាយុ២៩ឆ្នាំ ធ្វើការនៅសារព័ត៌មានអនឡាញឈ្មោះ PNM ឬ «ភ្នែកម្នាស់» និងលោក មួក សារ៉ែន អាយុ៤០ឆ្នាំ ដែលរាយការណ៍ឱ្យសារព័ត៌មានឈ្មោះ «ចក្រភព»។ អ្នកទាំងពីរបានដាក់ពាក្យបណ្ដឹងទៅសមត្ថកិច្ចដើម្បីវែកមុខជនបង្ក ប៉ុន្តែគិតមកដល់ថ្ងៃទី១៥ ខែមីនានេះ សមត្ថកិច្ចមិនទាន់ចាប់ជនសង្ស័យបាននៅឡើយ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ស្នើឱ្យពន្លឿនការស៊ើបអង្កេតករណីហិង្សាលើអ្នកសារព័ត៌មាន ដើម្បីបង្ហាញពីនីតិរដ្ឋនៅកម្ពុជា។
លោកថា៖ «វាជាការព្រួយបារម្ភសម្រាប់អ្នកសារព័ត៌មាន អាជ្ញាធរចាត់វិធានការឱ្យបានទាន់ពេលវេលា ដើម្បីកុំឱ្យជនដៃដល់ឬជនឧក្រិដ្ឋទាំងហ្នឹងហ៊ានប្រព្រឹត្តអំពើល្មើសច្បាប់តទៅទៀត»។
ចាងហ្វាងកាសែតអាណាចក្រខ្មែរ និងជាជនរងគ្រោះ លោក ប្រន ស៊ាន បានប្រកបអាជីពជាអ្នកសារព័ត៌មានអស់រយៈពេល១៥ឆ្នាំមកហើយ។ កាសែត អាណាចក្រខ្មែរ ចេញផ្សាយរាល់បីខែម្ដង និងចេញអត្ថបទប្រចាំថ្ងៃតាមអនឡាញ។ លោក ប្រន ស៊ាន បញ្ជាក់ថា លោកកំពុងតែបារម្ភពីសុវត្ថិភាពកាន់តែខ្លាំងថែមទៀត នៅពេលដែលអាជ្ញាធរមិនទាន់អាចចាប់ជនបង្កបាន។
កាលពីខែវិច្ឆិកា ឆ្នាំមុន ស្ថាប័នចំនួន៤ រួមមាន សម្ព័ន្ធអ្នកសារព័ត៌មានកម្ពុជា (Camboja) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ក្លិបអ្នកសារព័ត៌មានបរទេសនៃកម្ពុជា និងសហព័ន្ធអ្នកសារព័ត៌មានអន្តរជាតិ បានកត់សម្គាល់ឃើញថា ចាប់តាំងពីឆ្នាំ១៩៩៤មក យ៉ាងហោចណាស់មានអ្នកសារព័ត៌មាន១៥នាក់ត្រូវបានសម្លាប់ ដែលភាគច្រើនត្រូវសម្លាប់ដោយសារតែការងារ។
ស្ថាប័នទាំងនេះរកឃើញថា ចាប់ពីខែមករា ដល់ខែតុលា អ្នកសារព័ត៌មាន ៥៩នាក់ បានទទួលរងនូវការធ្វើទុក្ខបុកម្នេញក្នុងរូបភាពផ្សេងៗ រួមមាន ការប្រើអំពើហិង្សា ការចាប់ខ្លួន និងការរងបណ្តឹងពីតុលាការ។ ក្នុងនោះ មានអ្នកសារព័ត៌មានចំនួន២៧នាក់ត្រូវបានចាប់ខ្លួន ៧នាក់ជាជនរងគ្រោះនៃការប្រើអំពើហិង្សា និងម្នាក់បានស្លាប់។
នៅខែវិច្ឆិកា ឆ្នាំ២០២០ សង្គមស៊ីវិលក្នុងស្រុកចំនួន៥៧ស្ថាប័ន បានអំពាវឱ្យបញ្ឈប់ការយាយីអ្នកសារព័ត៌មានពីគ្រប់រូបភាព រួមមាន ការគំរាមកំហែងដោយពាក្យសម្ដី ការប្រើប្រាស់ហិង្សា ការប្រើប្រាស់ប្រព័ន្ធតុលាការចោទប្រកាន់ ពិសេសគឺការសម្លាប់អ្នកសារព័ត៌មាន៕