មន្រ្តីក្រសួងកិច្ចការនារី ចាត់ទុកការប្រើប្រាស់ហិង្សារបស់ឧកញ៉ា ឌួង ឆាយ លើអតីតភរិយា ជារឿងសាហាវដែលមិនអាចទទួលយកបាននោះទេ ហើយជំរុញឱ្យស្រ្តីរូបនោះដាក់ពាក្យបណ្តឹងដើម្បីទទួលនូវយុត្តិធម៌។
កាលពីម្សិលមិញ លោកស្រី ដេត ម៉ារីណា ដែលជាអតីតភរិយាឧកញ៉ា ឌួង ឆាយ បានបង្ហោះវីដេអូនៃការប្រើប្រាស់ហិង្សាពីសំណាក់អតីតស្វាមីលើរូបនាងនៅក្នុងបណ្តាញសង្គមហ្វេសប៊ុក។
អគ្គនាយករងទទួលបន្ទុកវិស័យកិច្ចការពារផ្លូវច្បាប់ នៃក្រសួងកិច្ចការនារី លោកស្រី ស ស៊ីណែត មានប្រសាសន៍ថា បើសិនជាលោកស្រី ដេត ម៉ាលីណា ត្រូវបានអតីតស្វាមីដែលជាឧកញ៉ា ឌួង ឆាយ បង្កហិង្សាវាយធ្វើបាបរហូតដល់ជាំស្មា ជាំមុខ រង្វង់ភ្នែក និងជាំជើង ដូចក្នុងវីដេអូដែលបង្ហោះលើបណ្តាញសង្គមប្រាកដមែន លោកស្រីថា ជនរងគ្រោះមានសិទ្ធិប្តឹងទៅអាជ្ញាធរពាក់ព័ន្ធដែលនៅជិតបំផុត ដើម្បីជួយរកយុត្តិធម៌ឱ្យគាត់។
លោកស្រីមានប្រសាសន៍ថា៖ «នៅក្នុងខ្លីបវីដេអូហ្នឹងសាហាវណាស់ មិនទាន់ផុតអាជ្ញាយុកាលនៃបទល្មើសនោះទេ។ ខាងស្រីគាត់មានសិទ្ធិដាក់ពាក្យប្តឹង ប៉ុន្តែសម្រាប់ក្រសួងកិច្ចការនារី នៅតែទទួលយកអត់បានគ្រប់ទម្រង់នៃអំពើហិង្សា មិនអាចទទួលយកបាន គឺជាទង្វើខុសច្បាប់ ហើយស្ត្រីត្រូវស្វែងរកជំនួយផ្នែកច្បាប់ និងត្រូវទទួលបានយុត្តិធម៌»។
ចំណែកទាក់ទងនឹងកូន បើសិនជាអតីតពីរនាក់ប្តីប្រពន្ធលែងលះគ្នាដោយមានសាលក្រមរបស់តុលាការ ហើយភាគីម្តាយជាអ្នកមានសិទ្ធិថែរក្សាកូននោះ លោកស្រីថា ភាគីជាស្វាមីក៏មានសិទ្ធិសួរសុខទុក្ខកូននិងទៅលេងកូនបានដែរ។
វីអូឌី មិនអាចសុំការបំភ្លឺពីលោកស្រី ដេត ម៉ារីណា ដែលជាអតីតភរិយារបស់ឧកញ៉ា ឌួង ឆាយ បានទេនៅថ្ងៃនេះ។
ឧកញ៉ា ឌួង ឆាយ បានបកស្រាយតាមរយៈការឡាយ (Live) នៅលើទំព័រហ្វេសប៊ុករបស់លោក នាព្រឹកថ្ងៃនេះថា រូបលោកទទួលស្គាល់កំហុសថា ពិតជាបានប្រើអំពើហិង្សាលើអតីតភរិយារបស់គាត់ពិតមែន ប៉ុន្តែរឿងនោះជារឿងចាស់កាលពីចុងឆ្នាំ២០២០ ពីព្រោះក្រោយពីបង្កហិង្សាពួកគេបានសម្រេចចិត្តលែងលះគ្នាមួយរយៈ។
ក្រោយមក លោក ឌួង ឆាយ អះអាងថា រូបលោកក៏ត្រូវរ៉ូវគ្នាវិញក្រៅផ្លូវច្បាប់ និងបានរស់នៅជាមួយគ្នាបានប្រហែលជា២ទៅ៣ខែ ក៏មានទំនាស់ពាក្យសម្តីគ្នាជាថ្មី ជុំវិញរឿងអតីតភរិយាមិនព្រមមើលថែកូនឱ្យបានដិតដល់ ប៉ុន្តែជម្លោះនោះមិនបានបង្កហិង្សាលើអតីតភរិយានោះទេ។
លោក ឌួង ឆាយ ថ្លែងទៀតថា ដើមចមដែលនាំឱ្យរូបលោកប្រើអំពើហិង្សាលើអតីតភរិយាកន្លងមកនោះ ដោយសារតែរឿងជម្លោះផ្ទៃក្នុងគ្រួសារ ហើយអតីតភរិយាបានរឹតត្បិតសេរីភាពរបស់លោកជាដើម។
លោកបកស្រាយដូច្នេះថា៖ «បើសិនជាមិនមានជនទី៣ បងប្អូនពូមីងពិចារណាទៅ មនុស្សស្រីដាច់ចិត្តលែងប្តីខ្លួនឯង ដោយប្តីខ្លួនឯងមិនទាន់ប្រើហិង្សាមកលើយើងជាលើកចុងក្រោយផងហ្នឹង មិនមែនលែងខ្ញុំមុនខ្ញុំប្រើហិង្សាលើគាត់ផង ដោយសាររឿងឱ្យខ្ញុំទៅក្រៀវ ដោយសារវិបត្តិសេដ្ឋកិច្ច ដោយសារគាត់ទទួលបន្ទុកក្នុងគ្រួសារមួយរយៈខ្លី ចូលប៉ុន្មានខែហ្នឹង មនុស្សស្រី បើមិនមានអ្នកណានៅពីក្រោយ មិនមានបង្អែករឹងមាំគ្រប់គ្រាន់ មិនអាចធ្វើរឿងនេះបានទេ បងប្អូន»។
វីអូឌី មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ផាត សុផានិត បានទេនៅថ្ងៃនេះ។
ចំណែកអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង មានប្រសាសន៍ថា លោកសុំមិនបកស្រាយជុំវិញករណីនេះ ដោយសារមិនទាន់ទទួលបានព័ត៌មានគ្រប់ជ្រុងជ្រោយនៅឡើយ ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ដែលតាមដានករណីនេះ ពន្យល់ថា អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវធ្វើការស្រាវជ្រាវលើសំណុំរឿងឧកញ៉ា ឌួង ឆាយ ដែលបង្កហិង្សាលើអតីតភរិយា ដើម្បីផ្តល់យុត្តិធម៌ដល់ជនរងគ្រោះ និងលុបបំបាត់វប្បធម៌និទណ្ឌភាពនៅកម្ពុជា។
លោកស្រីមានប្រសាសន៍ថា៖ «អាជ្ញាធរគួរតែធ្វើការស៊ើបអង្កេត ហើយធ្វើការធានាផ្តល់យុត្តិធម៌ ហើយការគាំពារដល់ជនរងគ្រោះ ដើម្បីធ្វើយ៉ាងម៉េច ដើម្បីកុំឱ្យមានវប្បធម៌និទណ្ឌភាពចំពោះជនទាំងឡាយណាដែលប្រើប្រាស់អំពើហិង្សាហ្នឹង»។
សូមរំឭកថា ឧកញ៉ា ឌួង ឆាយ និងប្អូនប្រុសឈ្មោះ ឌួង គឹមឡុង រួមជាមួយអង្គរក្ស ២ទៅ៣នាក់ទៀត ធ្លាប់បានប្រើអំពើហិង្សាវាយទៅលើយុវជនមួយក្រុមឱ្យរងរបួសនៅក្នុងហាងមួយកន្លែងឈ្មោះ ហ្គេឡាងឡារ៉ង់ ក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ កាលពីថ្ងៃទី១៤ ខែមេសា ឆ្នាំ២០១៣។ ពាក់ព័ន្ធនឹងហេតុការណ៍នោះ សាលាដំបូងរាជធានីភ្នំពេញ បានសម្រេចដាក់ពន្ធនាគាររូបលោកចំនួន ៣ឆ្នាំ៦ខែ ពីបទ «ប្រើហិង្សាដោយចេតនាមានស្ថានទម្ងន់ទោសប្រើអាវុធ»។ ប៉ុន្តែលោក ឌួង ឆាយ បានប្តឹងទាស់ទៅសាលាឧទ្ធរណ៍។ ក្រោយមក នៅដើមខែតុលា ឆ្នាំ២០១៣ សភាព្រហ្មទណ្ឌសាលាឧទ្ធរណ៍ បានបើកជំនុំជម្រះលើសំណុំរឿងរបស់លោក ឌួង ឆាយ ជាថ្មី និងបានសម្រេចតម្កល់សាលក្រមសាលាដំបូងភ្នំពេញ ក៏ប៉ុន្តែបានកែកម្រិតផ្តន្ទាទោសរូបលោក មកអនុវត្តទោសដាក់ពន្ធនាគារត្រឹមតែ៦ខែប៉ុណ្ណោះ ឯទោសនៅសល់ត្រូវព្យួរទាំងអស់៕
