អាជ្ញាធររាជធានី-ខេត្តមួយចំនួនបានចេញបម្រាមផ្អាកជាបណ្តោះអាសន្ននូវការរៀបចំពិធីមង្គលការ ពិធីបុណ្យបែបសាសនា និងកម្មវិធីជួបជុំផ្សេងៗ ដើម្បីទប់ស្កាត់រលកចម្លងជំងឺកូវីដ-១៩ ក្រោយពីមានអ្នកឆ្លងជំងឺនេះខ្លះបានទៅចូលរួមពិធីមង្គលការដែលបង្កជាហានិភ័យដល់អ្នកផ្សេងទៀត។
ការចេញបម្រាមនេះធ្វើឡើងក្រោយពីលោកនាយករដ្ឋមន្ត្រី ហ៊ុន សែន កាលពីម្សិលមិញ បានបង្ហាញពីការព្រួយបារម្ភពីករណីចម្លងចេញពីរោងការ និងបានបញ្ជាទៅអាជ្ញាធរពាក់ព័ន្ធឱ្យបង្កើនវិធានការទប់ស្កាត់ ក្រោយពីមានមនុស្ស២នាក់ត្រូវបានរកឃើញមានផ្ទុកជំងឺនេះ ក្រោយពីវិលត្រឡប់ពីចូលរួមពិធីមង្គលការនៅខេត្តតាកែវ និងកំពត។
លោកថា៖ «សុំស្នើយកចិត្តទុកដាក់ ព្រោះថាឥលូវនេះមានករណីអ្នកនៅភ្នំពេញទៅស៊ីការនៅខេត្ត ហើយអ្នកនោះ ខ្លួនឯងវិជ្ជមានកូវីដ-១៩ គឺជារឿងមួយដែលផ្អើលសឹងកន្លះប្រទេស។ អ៊ីចឹងទេអាពាហ៍ពិពាហ៍ត្រូវបានផ្អាក ហើយបើធ្វើក្នុងរង្វង់សែនព្រេនជាបណ្តោះអាសន្នសិន ក៏អាចធ្វើទៅរួចដែរ ព្រោះមានទម្លាប់បែបនេះ»។
ភ្លាមៗ ក្រោយពីមានការលើកឡើងរបស់លោកនាយករដ្ឋមន្ត្រី អាជ្ញាធររាជធានី-ខេត្តយ៉ាងតិច១៥ បានចេញប្រកាសឱ្យបិទជាបណ្តោះអាសន្ននូវការរៀបចំពិធីរៀបអាពាហ៍ពិពាហ៍ ពិធីបែបសាសនា ជប់លៀង និងកម្មវិធីជួបជុំមួយចំនួនទៀត លើកលែងពិធីសែនព្រេន និងបុណ្យសព។
ខេត្តទាំងនោះរួមមាន រាជធានីភ្នំពេញ ខេត្តកណ្តាល ត្បូងឃ្មុំ កំពង់ធំ បាត់ដំបង ក្រចេះ ស្ទឹងត្រែង តាកែវ ពោធិ៍សាត់ កំពង់ឆ្នាំង បន្ទាយមានជ័យ ព្រៃវែង កំពត កណ្តាល រតនគិរី និងមណ្ឌលគិរី ។
អភិបាលខេត្តកណ្តាល លោក គង់ សោភ័ណ្ឌ មានប្រសាសន៍ថា វិធានការថ្មីនេះគឺដើម្បីបញ្ចៀសការឆ្លងទ្រង់ទ្រាយធំ ខណៈពលរដ្ឋមួយចំនួនតូចនៅមិនទាន់យល់ដឹងនៅឡើយ។
លោកបញ្ជាក់ថា៖ «អ្នកដែលល្មើសមិនតាមការណែនាំរបស់វិធានការសុខាភិបាលឬវិធានចត្តាឡីស័ក យើងនឹងអនុវត្តតាមអនុក្រឹត្យ ហើយពិសេសយើងក៏មានច្បាប់ទាក់ទងនឹងកូវីដ និងការទប់ស្កាត់កូវីដ និងអាចបញ្ជូនទៅតុលាការដើម្បីវិនិច្ឆ័យតាមច្បាប់»។
អ្នកសម្របសម្រួលសហគមន៍ជនជាតិដើមភាគតិចខេត្តមណ្ឌលគិរី លោក គ្រឿង តុលា គាំទ្រវិធានការនេះ ។
លោកថា៖ «ខ្ញុំគិតថា វាជារឿងល្អ ដើម្បីការពារអាយុជីវិតរបស់ប្រជាពលរដ្ឋ»។
ពលរដ្ឋម្នាក់រស់នៅខេត្តត្បូងឃ្មុំ លោក យ៉ែម គង់ គាំទ្រទៅនឹងវិធានការនេះដែរ តែលោកបារម្ភពីបញ្ហាជីវភាព បើវិធានការនេះអូសបន្លាយយូរ។
លោកថា៖ «សម្រាប់វិធានការទប់ស្កាត់កូវីដ វាល្អហើយ ប៉ុន្តែអ្វីដែលយើងលំបាកគឺគេហាមយើងចេញពីតំបន់មួយទៅតំបន់មួយ តែធនាគារវាអត់ឈប់យកការប្រាក់ទេ ព្រោះការងារដែលយើងធ្វើ វាមិនសំដៅតែនៅផ្ទះទេ វាត្រូវដើររកការងារធ្វើ ទើបបាន»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង ផ្តល់ជាយោបល់ថា ដើម្បីឱ្យពលរដ្ឋគោរពវិធានការសុខាភិបាលបានត្រឹមត្រូវ ទាល់តែរដ្ឋដោះស្រាយបញ្ហាជីវភាពអ្នកដែលរងផលប៉ះពាល់ពីវិបត្តិកូវីដនេះ។
លោកថា៖ «ខ្ញុំគិតថា ទន្ទឹមហ្នឹង ដើម្បីឱ្យមានប្រសិទ្ធភាពនៃវិធានការហ្នឹង វាទាល់តែរដ្ឋាភិបាលហ្នឹងមានកញ្ចប់ថវិកា ដើម្បីបន្តជួយគាត់ទៀត ដល់អ្នកដែលប៉ះពាល់ដោយកូវីដ-១៩ បើមិនអ៊ីចឹងទេ មិនអាចឱ្យគាត់នៅក្នុងមណ្ឌលចត្តាឡីស័កបានទេ នេះជារឿងមួយសំខាន់ ហើយការគិតគូរទៅដល់ជីវភាពរបស់គាត់ ក៏ជារឿងសំខាន់មួយទៀត»។
ព្រឹត្តិការណ៍សហគមន៍២០កុម្ភៈ ផ្តើមចេញពីក្លឹបកម្សាន្តមួយកន្លែងនៅរាជធានីភ្នំពេញ ក្រោយពីសន្តិសុខសណ្ឋាគារមួយបានជួយឱ្យស្ត្រីជនជាតិចិន៤នាក់ដែលកំពុងធ្វើចត្តាឡីស័កបានចេញទៅក្លឹបនោះ បន្ទាប់មក ក្រសួងក៏បានរកឃើញស្ត្រី២នាក់ក្នុងចំណោម៤នាក់នោះមានផ្ទុកជំងឺកូវីដ-១៩។
ព្រឹត្តិការណ៍សហគមន៍២០កុម្ភៈនេះបានសម្លាប់មនុស្សម្នាក់ មានអ្នកឆ្លងសរុប៩១៥នាក់ ត្រឹមតែជិត២០ថ្ងៃមកនេះ៕