អាជ្ញាធរខេត្តព្រះសីហនុ កំពុងរកអត្តសញ្ញាណអ្នកដែលលួចចាក់ដីចូលសមុទ្រ ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ដើម្បីចាត់វិធានការទៅតាមផ្លូវច្បាប់។
ក្នុងសេចក្ដីជូនដំណឹងចុះថ្ងៃទី១៥ ខែមីនា ឆ្នាំ២០២១ រដ្ឋបាលស្រុកស្ទឹងហាវ លោក ឆាយ សុគន្ធដា លើកឡើងថា ក្នុងពេលថ្មីៗនេះ មានប្រជាពលរដ្ឋមួយចំនួនបានធ្វើសកម្មភាពលួចចាក់ដីលុបសមុទ្រ ស្ថិតនៅមុខក្រុមហ៊ុនតេលា ក្នុងភូមិ៤ ដោយគ្មានច្បាប់អនុញ្ញាត។
ករណីនេះ អាជ្ញាធរស្រុក បានតម្រូវឱ្យអ្នកចាក់ដីលុបចូលសមុទ្រនោះ ត្រូវកាយដីចេញវិញឱ្យអស់ជាបន្ទាន់ បើពុំនោះទេនឹងប្រឈមវិធានការច្បាប់។
លោក ឆាយ សុគន្ធដា ប្រាប់ វីអូឌី នៅថ្ងៃនេះថា ដីដែលចាក់ចូលសមុទ្រនោះមានទទឹង៦០ ម៉ែត្រ និងជម្រៅប្រហែល៤០ម៉ែត្រ ដោយការចាក់នោះធ្វើឡើងតាំងពីដើមខែមីនាមកម៉្លេះ។
លោកបន្តថា ក្រោយពីមិនមានបុគ្គលណាចេញមកដោះស្រាយនិងទទួលខុសត្រូវ អាជ្ញាធរក៏បានយកគ្រឿងចក្រនិងរថយន្តចំនួន៤គ្រឿងទៅកាយដីនោះចេញវិញ។
លោកថា៖ «លួចចាក់តាំងពីមុនថ្ងៃទី៤ ខែមីនា ថ្ងៃនោះយើងចុះទៅម្ដងហើយ យើងធ្វើកំណត់ហេតុសួរនាំទៅអត់មានអ្នកណាចេញមុខទេ ហើយអ្នកនៅជិតនោះថា លួចចាក់ពេលយប់ គេក៏មិនដឹងម្ចាស់ដែរ។ ថ្ងៃទី១៥ ខែមីនា ពេលយើងទៅឃើញមានគរថ្មនៅលើកន្លែងចាក់ដីហើយ អ៊ីចឹងយើងចុះទៅរកមិនឃើញ យើងជូនដំណឹងជូនអី ឥលូវយើងយកគ្រឿងចក្រទៅកាយថ្មកាយអីហ្នឹងចេញ បើយើងប្រហែស យប់ហ្នឹងយកថ្មកាយទម្លាក់ទៅទៀត»។
អភិបាលស្រុកស្ទឹងហាវរូបនេះបន្តថា ប្រសិនបុគ្គលអ្នកចាក់ដីចូលសមុទ្រនៅតែមិនព្រមចេញមុខមកទទួលខុសត្រូវទេ អាជ្ញាធរនឹងធ្វើរបាយការណ៍ទៅថ្នាក់លើ រួចដាក់ទៅតុលាការដើម្បីឱ្យចាត់ការតាមនីតិវិធីច្បាប់។
អ្នកសម្របសម្រួលនៃអង្គការការពារសិទ្ធិមនុស្សលីកាដូប្រចាំខេត្តព្រះសីហនុ លោក ស្រេង វ៉ាន់លី យល់ថា អ្នកដែលហ៊ានចាក់ដីលុបសមុទ្របែបនេះ មិនមែនជាប្រជាពលរដ្ឋធម្មតានោះទេ។ លោកបន្តថា ការដែលអាជ្ញាធរឱ្យកាយដីចេញវិញ ដោយពុំមានចាត់វិធានការច្បាប់ទៅលើជនដែលប្រព្រឹត្តនោះ នឹងធ្វើឱ្យមានករណីនេះកើតឡើងនៅពេលក្រោយទៀត។
លោក ស្រេង វ៉ាន់លី ជំរុញឱ្យអាជ្ញាធរចាត់វិធានការច្បាប់ទៅលើបុគ្គលនោះ ជាជាងកាយដីចេញ បើមិនដូច្នេះទេ នឹងមិនអាចទប់ស្កាត់ការរំលោភបំពានយកដីសមុទ្រពីសំណាក់ជនខិលខូច ឬអ្នកមានលុយមានអំណាចបានឡើយ។
លោកថា៖ «មួយទៀតថា ចាក់នៅពេលយប់ រកអ្នកចាក់មិនឃើញ យើងមើលទៅដូចជាមិនពិបាកក្នុងការរកទេ ពីព្រោះការចាក់លុប វាប្រើមនុស្សនិងប្រើគ្រឿងចក្រអីផ្សេងទៀត។ អ៊ីចឹងយើងអាចរកឃើញ ប៉ុន្តែចេតនាហ្នឹងដូចជាមិនចង់ធ្វើទៅលើករណីហ្នឹង ហើយបែរជាកាយចេញទៅវិញ។ នេះជាការចំណាយទៅលើថវិការដ្ឋមួយផ្នែកដែរ ដែលយើងមិនរកអ្នកដែលប្រព្រឹត្តខុសមកអនុវត្តច្បាប់ បែរជាចំណាយថវិកានិងពេលវេលាសម្រាប់ទៅកាយរំដោះសមុទ្រទៅវិញ។ គួរណាតែសិក្សាស្រាវជ្រាវអង្កេតរឿងហ្នឹងឱ្យបានច្បាស់លាស់ ដើម្បីស្វែងរកអ្នកដែលបានប្រព្រឹត្តហ្នឹងមកផ្ដន្ទាទោសតាមផ្លូវច្បាប់ ដើម្បីជាគំរូទៅដល់អ្នកក្រោយ»។
បើតាមច្បាប់ភូមិបាល ឆ្នាំ២០០១ មាត្រា២៥៩ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈ ត្រូវផ្ដន្ទាទោសពិន័យជាប្រាក់ ៥ ០០០ ០០០ រៀល (ប្រាំលានរៀល) ដល់ ៥០ ០០០ ០០០ រៀល (ហាសិបលានរៀល) ឬ/និង ផ្ដន្ទាទោសជាប់ពន្ធនាគារពី១ឆ្នាំដល់៥ឆ្នាំ។
កាលពីខែធ្នូ ឆ្នាំ២០១៩ លោកនាយករដ្ឋមន្ត្រី ហ៊ុន សែន បានណែនាំទៅលោក ជា សុផារ៉ា រដ្ឋមន្ត្រីក្រសួងរៀបចំដែនដី និងអភិបាលខេត្តជាប់មាត់សមុទ្រទាំង៤ ត្រូវការពារតំបន់ឆ្នេរឱ្យបានពីការរំលោភបំពានយកដីជាកម្មសិទ្ធិ ខណៈលោកបារម្ភថា បើតំបន់ឆ្នេរនៅតែរងការបំផ្លាញ នោះកម្ពុជាអាចនឹងត្រូវប្រឈមនឹងការដកចេញពីសមាជិកតំបន់ឆ្នេរស្អាតលើពិភពលោក។
បើតាមរបាយការណ៍ក្រសួងទេសចរណ៍ ឆ្នេរសមុទ្រកម្ពុជាមានប្រវែង៤៤០គីឡូម៉ែត្រ ស្ថិតនៅក្នុងខេត្តចំនួន៤ រួមមាន ខេត្តកំពត កែប កោះកុង និងខេត្តព្រះសីហនុ៕