រដ្ឋាភិបាលបង្កើតគណៈកម្មការចំពោះកិច្ចមួយ ដើម្បីរៀបចំផែនការមេក្នុងការបង្កើនប្រសិទ្ធភាពដំណើរការចាក់វ៉ាក់សាំងប្រឆាំងកូវីដ-១៩ ដែលកំពុងឆ្លងរាលដាលខ្លាំងនៅកម្ពុជា ខណៈវ៉ាក់សាំងចំនួន១លាន៥សែនដូសទៀត នឹងមកដល់កម្ពុជានៅពេលឆាប់ៗខាងមុខ។
អនុក្រឹត្យរបស់រដ្ឋាភិបាលដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃនេះ បានបញ្ជាក់ថា គណៈកម្មការនេះមានសមាជិកសរុបចំនួន២១នាក់ ដោយមានលោកស្រីវេជ្ជបណ្ឌិត ឱ វណ្ណឌីន ជាប្រធាន។
អនុក្រឹត្យដដែលបានបន្តថា ប្រធានគណៈកម្មការនេះមានតួនាទីដឹកនាំ ចាត់ចែង ការចាក់វ៉ាក់សាំងកូវីដ-១៩ នៅទូទាំងប្រទេស និងត្រូវពិនិត្យរៀបចំផែនការ វគ្គបណ្តុះបណ្តាលគ្រូពេទ្យ ផ្គត់ផ្គង់ថវិកា សម្ភារបរិក្ខារចាំបាច់សម្រាប់បម្រើការងារ និងមានសិទ្ធិបង្កើតអនុគណៈកម្មការចំពោះកិច្ច និងលេខាធិការដ្ឋាន សម្រាប់គាំទ្រដំណើរការចាក់វ៉ាក់សាំងក្នុងក្របខណ្ឌទូទាំងប្រទេស។
តាមអនុក្រឹត្យដដែល លោកស្រី ឱ វណ្ណឌីន ក៏អាចកោះប្រជុំដោយមានការអញ្ជើញដៃគូអភិវឌ្ឍន៍ជាតិ-អន្តរជាតិ រួមទាំងអង្គការសហប្រជាជាតិ អង្គការក្រៅរដ្ឋាភិបាល និងបណ្តាស្ថានទូតនានា តាមតម្រូវការចាំបាច់ផងដែរ។
មុនចេញអនុក្រឹតនេះមួយថ្ងៃ លោកនាយករដ្ឋមន្ត្រី ហ៊ុន សែន បានថ្លែងថា យុទ្ធនាការចាក់វ៉ាក់សាំងកន្លងទៅ ទាំងផ្នែកកងទ័ពនិងស៊ីវិលដំណើរការទៅបានល្អ។ ប៉ុន្តែដើម្បីឱ្យយុទ្ធនាការលើកនេះកាន់តែមានភាពល្អប្រសើរថែមទៀតនោះ លោកថា រដ្ឋាភិបាលចាំបាច់ត្រូវបង្កើតគណៈកម្មការចំពោះកិច្ចនេះ ដើម្បីបង្កើនប្រសិទ្ធភាពនៃការចាក់វ៉ាក់សាំង និងការទប់ស្កាត់ការឆ្លងរាលដាលនៃជំងឺកូវីដ-១៩ ខណៈលោកថា វ៉ាក់សាំងខ្លះមានសុពលភាពត្រឹម៦ខែប៉ុណ្ណោះ។
លោកនាយករដ្ឋមន្ត្រី ថ្លែងបន្តថា៖ «ក្នុងគម្រោងអាចនឹងមកដល់១លាន៥សែនដូស ហើយនឹងអាចលើសពីនេះថែមទៀតនោះ ក៏ត្រូវរៀបចំផែនការឱ្យបានច្បាស់ តម្រង់ទៅទិសណា ហើយកម្លាំងពេទ្យដែលត្រូវចាក់ ត្រូវបណ្តុះបណ្តាលយ៉ាងណា ទីកន្លែងរបៀបណា ត្រូវរៀបចំផែនការមេជាក់លាក់ ដើម្បីដំណើរការឱ្យបានល្អ»។
លោកបានគូសបញ្ជាក់ដូច្នេះទៀតថា៖ «យើងមានគម្រោងចាក់វ៉ាក់សាំងយ៉ាងតិចដល់ទៅ១០លាននាក់ ជាចំនួនមួយដ៏ច្រើន ដែលចាំបាច់ត្រូវតែមានការទទួលខុសត្រូវពីស្ថាប័នថ្នាក់ជាតិ»។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចនេះ លោកស្រី ឱ វណ្ណឌីន មិនទាន់អាចប្រាប់បានពីវិធានការដែលនឹងត្រូវដាក់ចេញសម្រាប់ការងារចាក់វ៉ាក់សាំងនេះបាននៅឡើយទេ ដោយថា ត្រូវរង់ចាំពិភាក្សាជាមួយមន្ត្រីពាក់ព័ន្ធជាមុនសិន។
តែលោកស្រីថា យុទ្ធនាការចាក់វ៉ាក់សាំងកន្លងទៅ ក្រសួងមានការព្រួយបារម្ភពីហានិភ័យសុខភាព ដោយសារតែការសម្រុកមកចាក់វ៉ាក់សាំងរបស់ពលរដ្ឋភាគច្រើន បានប្រជ្រៀតគ្នា មិនរក្សាគម្លាតសុវត្ថិភាព តាមការណែនាំរបស់ក្រសួងសុខាភិបាល។
លោកស្រីថា៖ «យើងខិតខំពន្យល់ហើយ តែបងប្អូនយើងគាត់ហាក់ដូចជាមិនបានយល់ពីបញ្ហានេះ ពីព្រោះគាត់ចង់បានតែការចាក់វ៉ាក់សាំង ហើយពេលខ្លះគាត់ក៏ភ្លេចគិតថា មិនទាន់ទាំងបានចាក់វ៉ាក់សាំងផង គាត់បានកូវីដទៅមុន ហើយដល់បានកូវីដទៅមុន ទៅដល់ផ្ទះមានកូវីដ ថាអាហ្នឹងបន្ទោសវ៉ាក់សាំងទៀត »។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី យល់ថា ការពង្រឹងប្រសិទ្ធភាពការងារ ចាំបាច់ត្រូវពង្រឹងប្រសិទ្ធភាពស្ថាប័នដែលមានស្រាប់ ដោយពុំចាំបាច់ទៅបង្កើតគណៈកម្មការថ្មីនោះទេ។
តែយ៉ាងណា លោកថា ជាការល្អបើក្រុមការងារថ្មីនេះអាចជំរុញប្រសិទ្ធភាពការងារបាន ដូចជា ការចាក់វ៉ាក់សំាងការពារជំងឺឆ្លងនេះដល់អ្នកងាយរងគ្រោះឬពលរដ្ឋសាមញ្ញបានគ្រប់គ្នានោះ។
លោកថា៖ «យើងមិនបានប្រឆាំងឬជំទាស់ទៅនឹងការបង្កើតគណៈកម្មការនេះទេ។ យើងចង់ធ្វើម៉េចបង្កើតក៏បង្កើតចុះ តែធ្វើម៉េចបង្កើនប្រសិទ្ធភាពការងារហ្នឹងឱ្យខ្ពស់ ហើយធ្វើម៉េចកុំឱ្យមានការខ្ជះខ្ជាយថវិកាជាតិជាដើម»។
កម្ពុជាបានចាប់ផ្តើមយុទ្ធនាការចាក់វ៉ាក់សាំងប្រឆាំងវីរុសកូវីដ-១៩ ប្រភេទ «ស៊ីណូហ្វាម» ដែលជាជំនួយរបស់ចិន ចាប់តាំងពីថ្ងៃទី១០ ខែកុម្ភៈ ឆ្នាំ២០២១ និងវ៉ាក់សាំងប្រភេទ «អាស្ត្រាហ្សិណិកា» កាលពីថ្ងៃទី០៤ ខែមីនា ឆ្នាំ២០២១ ដែលគិតមកដល់ថ្ងៃម្សិលមិញនេះ ពលរដ្ឋដែលបានទទួលវ៉ាក់សាំងទាំងពីរប្រភេទនេះ សរុបមានចំនួន១៧០ ៦៥៩នាក់។
ការចាក់វ៉ាក់សាំងប្រឆាំងជំងឺកូវីដ-១៩នេះ រដ្ឋាភិបាលផ្តោតលើក្រុមមនុស្សអាទិភាព ដូចជា កម្លាំងប្រដាប់អាវុធ គ្រូពេទ្យ អ្នកសារព័ត៌មាន កម្មករប្រមូលសំរាម និងអ្នកមានអាទិភាពមួយចំនួនទៀត រួមទាំងពលរដ្ឋវ័យ៦០ឆ្នាំមួយចំនួន ក្នុងរាជធានីភ្នំពេញ ខេត្តកណ្តាល និងខេត្តព្រះសីហនុ ដែលជារាជធានី-ខេត្តមានហានិភ័យខ្ពស់ពាក់ព័ន្ធព្រឹត្តិការណ៍សហគមន៍២០កុម្ភៈ។
តែយ៉ាងណា លោកនាយករដ្ឋមន្ត្រី ហ៊ុន សែន ក៏បានបង្ហើបកាលពីថ្ងៃម្សិលមិញដែរថា រដ្ឋាភិបាលក៏គ្រោងចាក់វ៉ាក់សាំងប្រឆាំងកូវីដ-១៩ ដល់កម្មករក្នុងវិស័យកាត់ដេរ អ្នកប្រកបមុខរបរសេដ្ឋកិច្ចក្រៅប្រព័ន្ធ និងគ្រូបង្រៀនតាមបំបន់ដែលមានហានិភ័យផងដែរ៕
