អាជ្ញាធរស្រុកកោះធំ ខេត្តកណ្តាល ស្នើឱ្យម្ចាស់អាជីវកម្មគ្រប់ប្រភេទផ្អាកដំណើរការអាជីវកម្មរបស់ខ្លួនជាបណ្ដោះអាសន្ន ដើម្បីចៀសវាងការចម្លងជំងឺកូវីដ-១៩ ក្នុងសហគមន៍បន្ថែមទៀត។
យោងតាមសេចក្ដីជូនដំណឹងរបស់រដ្ឋបាលស្រុកកោះធំ ដែលចេញផ្សាយនៅថ្ងៃនេះ បានឱ្យដឹងថា ដើម្បីចៀសវាងការចម្លងជំងឺកូវីដ-១៩ ក្នុងសហគមន៍ទ្រង់ទ្រាយធំ រដ្ឋបាលស្រុកស្នើឱ្យម្ចាស់អាជីវកម្មគ្រប់ប្រភេទផ្អាកដំណើរការអាជីវកម្មរបស់ខ្លួនជាបណ្ដោះអាសន្ន ចាប់ពីថ្ងៃប្រកាសនេះរហូតមានការជូនដំណឹងសារជាថ្មី។
លិខិតដដែលក៏បានអំពាវនាវឱ្យប្រជាពលរដ្ឋបង្កើនការយកចិត្តទុកដាក់អនុវត្តនូវវិធានការរបស់រដ្ឋាភិបាល ក្នុងការចូលរួមទប់ស្កាត់ការរីករាលដាលជំងឺកូវីដ-១៩។
ការស្នើនេះធ្វើឡើងបន្ទាប់ពីក្រសួងសុខាភិបាលចេញផ្សាយកាលពីម្សិលមិញថា បានរកឃើញវិជ្ជមានកូវីដ-១៩ លើមនុស្សចំនួន៦៤នាក់នៅស្រុកកោះធំ ពាក់ព័ន្ធនឹងព្រឹត្តិការណ៍២០កុម្ភៈ។
ជាមួយគ្នានេះដែរ គណបក្សប្រជាធិបតេយ្យមូលដ្ឋាន(គបម) កាលពីម្សិលមិញ ក៏ចេញសេចក្តីថ្លែងការណ៍មួយគាំទ្រឱ្យមានការបិទចរាចរណ៍ក្នុងឃុំសំពៅពូន ស្រុកកោះធំ មួយរយៈ ដើម្បីទប់ស្កាត់ការឆ្លងរាលដាលជំងឺកូវីដ-១៩ ពីតំបន់នេះទៅកាន់តំបន់ផ្សេងៗទៀត។
គណបក្សនេះក៏បានអំពាវនាវដល់រដ្ឋាភិបាលនិងប្រជាពលរដ្ឋគ្រប់រូបចូលរួមឧបត្ថម្ភដល់ប្រជាពលរដ្ឋនៅឃុំសំពៅពូននេះ ក្នុងអំឡុងពេលធ្វើចត្តាឡីស័កឬក្នុងអំឡុងពេលបិទភូមិឃុំនេះមួយរយៈផងដែរ។
គណបក្សនេះក៏បានស្នើដល់ស្ថាប័នមីក្រូហិរញ្ញវត្ថុនិងធនាគារ គួរតែពន្យារពេលការបង់រំលស់ដល់អតិថិជនដែលរស់នៅក្នុងឃុំសំពៅពូននេះផងដែរ៕
