គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវទៅគណបក្សនយោបាយ អង្គការសង្គមស៊ីវិលជាតិនិងអន្តរជាតិ រួមទាំងអ្នកពាក់ព័ន្ធផ្សេងទៀត ឱ្យចូលរួមសហការ ដើម្បីជំរុញដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិថ្មីនេះឱ្យសម្រេចបានជោគជ័យ។
គ.ជ.ប បាននិយាយក្នុងលិខិតជូនដំណឹងរបស់ខ្លួនចុះថ្ងៃទី១៥ ខែមីនា ឆ្នាំ២០២១នេះថា ការបរិច្ឆេទនៃការបោះឆ្នោតក្រុមប្រឹក្សាឃុំ-សង្កាត់ អាណត្តិទី៥ នឹងត្រូវប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ខាងមុខ។
គ.ជ.ប បន្តថា៖ «អាស្រ័យដូចបានជម្រាបជូនខាងលើនេះ សូមគណបក្សនយោបាយ សមាគម អង្គការមិនមែនរដ្ឋាភិបាលជាត-អន្តរជាតិ និងប្រជាពលរដ្ឋកម្ពុជានៅទូទាំងប្រទេស ជ្រាបជាព័ត៌មាន និងសហការជំរុញឱ្យដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ សម្រេចបានជោគជ័យ»។
ការបោះឆ្នោតជ្រើសតាំងតំណាងរាស្ត្រ ឆ្នាំ២០១៨ កន្លងទៅ បណ្តុំអង្គការរសង្គមស៊ីវិលមួយចំនួន រួមទាំងអង្គការឃ្លាំមើលការបោះឆ្នោត ខុមហ្វ្រែល ផងដែរ បានប្រកាសដកខ្លួន មិនដាក់អ្នកសង្កេតការឃ្លាំមើលដំណើរការបោះឆ្នោតពេលនោះទេ ក្រោយពីតុលាការបានរំលាយអតីតគណបក្សប្រឆាំងចេញពីឆាកនយោបាយ។
សហរដ្ឋអាមរិក និងសហភាពអឺរ៉ុប ក៏បានប្រកាសផ្តាច់ជំនួយពី គ.ជ.ប ផងដែរ នូវអ្វីដែលសហគមន៍អន្តរជាតិទាំងនោះថា ដើម្បីជំរុញឱ្យរដ្ឋាភិបាលវិលទៅរកគន្លងប្រជាធិបតេយ្យវិញ៕
