ស្ថានឯកអគ្គរាជទូតកម្ពុជាប្រចាំសហរដ្ឋអាមេរិក បានអំពាវនាវដល់ប្រជាពលរដ្ឋខ្មែរដែលកំពុងរស់នៅនិងសិក្សានៅសហរដ្ឋអាមេរិក មានការប្រុងប្រយ័ត្ន ខណៈនៅតំបន់មួយចំនួនក្នុងប្រទេសនេះកើតមានអំពើហិង្សាច្រើនទៅលើពលរដ្ឋអាស៊ី។
យោងតាមសេចក្តីប្រកាសព័ត៌មានរបស់ស្ថានទូតកម្ពុជាប្រចាំសហរដ្ឋអាមេរិក ចុះថ្ងៃទី១៨ ខែមីនា ឆ្នាំ២០២១នេះ បានលើកឡើងថា ស្ថានទូតមានក្តីបារម្ភជាខ្លាំង ក្រោយទទួលបានព័ត៌មាន ស្តីពីកំណើននៃអំពើហិង្សាទៅលើពលរដ្ឋអាស៊ី និងពលរដ្ឋអាមេរិកដើមកំណើតអាស៊ី ដែលបានកើតឡើងនៅតំបន់មួយចំនួនក្នុងសហរដ្ឋអាមេរិក។
ករណីនេះ ស្ថានទូតបានអំពាវនាវដល់ប្រជាពលរដ្ឋ សិស្សនិងនិសិ្សតខ្មែរ និងពលរដ្ឋខ្មែរអាមេរិកាំងទាំងអស់ដែលកំពុងរស់នៅនិងសិក្សានៅទីនោះ ត្រូវមានការប្រុងប្រយ័ត្នខ្ពស់បំផុត ហើយក្នុងករណីទទួលរងឬមើលឃើញហេតុការណ៍ហិង្សាណាមួយនោះ ត្រូវរាយការណ៍ទៅប៉ូលិសឬអាជ្ញាធរមូលដ្ឋាន។
សេចក្តីប្រកាសព័ត៌មានដដែលបន្តថា ក្នុងករណីត្រូវការកិច្ចអន្តរាគមន៍ពីស្ថានទូត ក៏អាចទាក់ទងតាមទូរសព្ទនិងអ៊ីម៉ែលរបស់ស្ថានទូតខ្មែរប្រចាំនៅសហរដ្ឋអាមេរិក នោះស្ថានទូតនឹងខិតខំដោះស្រាយតាមលទ្ធភាពដែលអាចធ្វើទៅបាន៕
