លោកនាយករដ្ឋមន្ត្រី ហ៊ុន សែន ប្រាប់ទៅមន្ត្រីពាក់ព័ន្ធឱ្យធ្វើយុទ្ធនាការរយៈពេល១៥ថ្ងៃ ដើម្បីចាក់វ៉ាក់សាំងប្រឆាំងវីរុសកូវីដ-១៩ ជូនមនុស្សចាស់វ័យចាប់ពី៦០ឆ្នាំឡើងបន្ថែមទៀត ដោយផ្តោតតែពលរដ្ឋដែលនៅរាជធានីភ្នំពេញ។
តាមសារជាសំឡេង នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានរំឭកថា ក្នុងរយៈពេល១ខែនៃព្រឹត្តិការណ៍សហគមន៍២០កុម្ភៈនេះ អ្នកឆ្លងជំងឺកូវីដ-១៩ បានកើនដល់ជាង១ ០០០នាក់ ដែលចំនួននេះកើនឡើងជាង២ដង បើធៀបទៅនឹងរយៈពេលជាង១ឆ្នាំដែលកម្ពុជាចាប់ផ្ទុះជំងឺនេះមក។
លោកបញ្ជាក់ថា ជំងឺរាតត្បាតនេះកំពុងវាយលុកខ្លាំងនៅរាជធានីភ្នំពេញ និងផ្នែកខ្លះនៃខេត្តកណ្តាល ដែលទាមទារឱ្យមន្ត្រីពាក់ព័ន្ធត្រូវយកចិត្តទុកដាក់បន្តទៀតទៅលើការប្រយុទ្ធប្រឆាំងនឹងជំងឺនេះតាមវិធានការដែលបានដាក់ចេញ។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន ក៏បានជំរុញដល់ប្រធានគណៈកម្មការចំពោះកិច្ច និងរដ្ឋបាលរាជធានីភ្នំពេញ ត្រូវធ្វើយុទ្ធនាការរយៈពេល១៥ថ្ងៃ ដើម្បីចាក់វ៉ាក់សាំងប្រភេទ អាស្ត្រាហ្សេណិកា ដែលសល់ជាង១១០ ០០០ដូស ដល់មនុស្សចាស់វ័យចាប់ពី៦០ឆ្នាំឡើង ដែលយុទ្ធនាការនេះនឹងត្រូវធ្វើឡើងក្រោយពីស្ថាប័នទាំងពីរនេះរៀបចំផែនការរួចរាល់។
លោកនាយករដ្ឋមន្ត្រី ហ៊ុន សែន ថ្លែងថា៖ «ចំនួនវ៉ាក់សាំង Astra Zeneca ដែលនៅសល់សម្រាប់មនុស្ស៥៥ ៧០០នាក់។ សូមស្នើសុំលោកជំទាវ ឱ វណ្ណឌីន ឯកឧត្តម ឃួង ស្រេង ធ្វើយុទ្ធនាការចាក់វ៉ាក់សាំងរយៈពេល១៥ថ្ងៃ នៅរាជធានីភ្នំពេញ ហើយដែលមណ្ឌលចាក់វ៉ាក់សាំងទាំងនោះត្រូវតែធ្វើនៅតាមខណ្ឌនីមួយៗ ដែលងាយស្រួលឱ្យបងប្អូនយើងមកទទួលវ៉ាក់សាំង»។
មួយវិញទៀត លោកថា ក្រុមការងារនេះត្រូវធ្វើយ៉ាងណារៀបចំចាក់វ៉ាក់សាំងទៅតាមលំដាប់អាទិភាព ដើម្បីឱ្យអ្នកទៅទទួលវ៉ាក់សាំង អាចរក្សាគម្លាតសុវត្ថិភាព ដើម្បីបញ្ចៀសហានិភ័យនៃការឆ្លង។
លោកនាយករដ្ឋមន្ត្រី ហ៊ុន សែន ក៏សុំការយោគយល់ផងដែរចំពោះប្រជាពលរដ្ឋដែលមិនទាន់ទទួលបានវ៉ាក់សាំងនេះ ប៉ុន្តែលោកថា ពួកគេនឹងទទួលបានដូចគ្នានៅពេលខាងមុខ។
លោកបញ្ជាក់ថា៖ «បើគ្មានការផ្លាស់ប្តូរទេ វ៉ាក់សាំងស៊ីណូវ៉ាក់ នឹងមកដល់នៅថ្ងៃទី២៦ ខែមីនា នេះបើយោងតាមការជូនដំណឹងពីភាគីមិត្តចិន ដែលយើងបានទិញស៊ីណូវ៉ាក់ ១លាន៥សែនដូស ក្រៅពីនេះក៏យើងនៅសល់ជំនួយពីមិត្តចិននូវវ៉ាក់សាំងស៊ីណូហ្វាម ៤០ម៉ឺនដូសទៀត ដែលសង្ឃឹមថានឹងបានទទួលនៅមុនចូលឆ្នាំខ្មែរ»។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ច លោកស្រី ឱ វណ្ណឌីន មានប្រសាសន៍យ៉ាងខ្លីថា ក្រុមការងារត្រូវការពេលខ្លះមុននឹងកំណត់ថ្ងៃសម្រាប់ការចាក់វ៉ាក់សាំងបន្តជូនដល់មនុស្សចាស់។
លោកស្រីថា៖ «យើងត្រូវការបណ្តុះបណ្តាលសិន បណ្តុះបណ្តាលរួចហើយបានយើងកំណត់ថ្ងៃចាក់»។
បើតាមនាយករដ្ឋមន្ត្រី យុទ្ធនាការចាក់វ៉ាក់សាំងប្រឆាំងវីរុសកូវីដ-១៩ ដែលធ្វើឡើងចាប់ពីថ្ងៃទី១០ ខែកុម្ភៈ ឆ្នាំ២០២១ មកដល់ថ្ងៃម្សិលមិញនេះ មានមន្ត្រីនិងពលរដ្ឋដែលមានអាទិភាពជាង៣០០ ០០០នាក់ហើយដែលបានចាក់វ៉ាក់សាំង ខណៈយុទ្ធនាការ១៥ថ្ងៃនេះនឹងបន្តចាក់ទៅលើមនុស្សវ័យចំណាស់ជាង៥០ ០០០នាក់ទៀត។
គិតត្រឹមថ្ងៃសុក្រនេះ កម្ពុជាបានរកឃើញអ្នកឆ្លងកូវីដ១៩ សរុបចំនួន១ ៥៨៧នាក់ ព្យាបាលជា៩១៧នាក់ កំពុងសម្រាកព្យាបាល៦៥៨នាក់ និងស្លាប់ម្នាក់ និងមនុស្សរាប់រយនាក់ទៀត កំពុងធ្វើចត្តាឡីស័កឬតាមដានសុខភាព៕
