អតីតម្ចាស់អាជ្ញាបណ្ណគេហទំព័រព័ត៌មាន លោក ផែង វណ្ណៈ បានសុំទោសជាសាធារណៈចំពោះព្រះសង្ឃគ្រប់ព្រះអង្គនៅទូទាំងប្រទេសនិងប្រជាពលរដ្ឋ ក្រោយពីលោកបាននិយាយពាក្យប្រមាថដល់ព្រះសង្ឃនិងមន្ត្រីរាជការ។
ការសុំទោសជាសាធារណៈនេះ បានធ្វើឡើងបន្ទាប់ពីព្រះមេគណខេត្តសៀមរាប បានថ្វាយលិខិតទៅសម្តេចព្រះសង្ឃនាយក នន្ទ ង៉ែត ជួយស្នើទៅរដ្ឋាភិបាលថ្កោលទោសនិងចាត់វិធានការលើលោក ផែង វណ្ណៈ ពាក់ព័ន្ធនឹងករណីដែលរូបលោកបាននិយាយក្នុងវីដេអូនៅលើបណ្តាញសង្គម ជេរប្រមាថព្រះចៅអធិការវត្តរាជបូណ៌ ព្រះអង្គ ពិន សែម ដែលប្រើផ្តៅវាយលើសិស្សគណធ្វើខុសវិន័យសាសនា។
នៅក្នុងលិខិតសុំទោសជាសាធារណៈរបស់លោក ផែង វណ្ណៈ ចុះថ្ងៃទី១៨ ខែមីនា ឆ្នាំ២០២១ បានសរសេរថា មូលហេតុដែលនាំឱ្យរូបលោកសុំទោសជាសាធារណៈនេះ ដោយសារតែគាត់មិនបានដឹងពីវិន័យផ្ទៃក្នុងវត្តរបស់ព្រះសង្ឃ ដែលតម្រូវឱ្យអប់រំដោយប្រើអំពើហិង្សាមិនខុសច្បាប់។
លិខិតដដែលបន្តថា ការរិះគន់និងការប្រមាថដល់ព្រះចៅអធិការវត្តរាជបូណ៌ នៅក្នុងខេត្តសៀមរាប គឺលោកមិនមានចេតនាប្រមាថដល់ព្រះសង្ឃគ្រប់អង្គនៅទូទាំងប្រទេស ឬធ្វើឱ្យប៉ះពាល់ដល់ព្រះពុទ្ធសាសនានោះទេ ដោយគ្រាន់តែចង់ឱ្យជនរងគ្រោះទទួលបានយុត្តិធម៌តែប៉ុណ្ណោះ។
ករណីនេះ លោក ផែង វណ្ណៈ អះអាងថា បើសិនជាការរិះគន់នោះខុស រូបលោកសុខចិត្តសុំទោសព្រះសង្ឃនិងប្រជាពលរដ្ឋជាសាធារណៈ ដើម្បីលុបលាងកំហុសនោះវិញ។
លោកបានសរសេរក្នុងលិខិតនោះថា៖ «បើសិនជាស្ថាប័នសង្ឃនិងប្រជាពលរដ្ឋមួយចំនួនយល់ថា ការរិះគន់និងការប្រមាថបុគ្គលសង្ឃដែលប្រើហិង្សា ជាការប្រមាថចំពោះព្រះសង្ឃនិងព្រះពុទ្ធសាសនា ខ្ញុំសុំទោសជាសាធារណៈចំពោះកំហុសឆ្គង ចាប់ពីថ្ងៃទី១៨ ខែមីនា ឆ្នាំ២០២១នេះតទៅ»។
ពាក់ព័ន្ធនឹងករណីនេះដែរ កាលពីថ្ងៃម្សិលមិញ ក្រសួងព័ត៌មាន បានសម្រេចលុបអាជ្ញាបណ្ណអាជីវកម្មគេហទំព័រឈ្មោះ «www.phengvannaknews.com» របស់លោក ផែង វណ្ណៈ ដោយសារម្ចាស់អាជ្ញាបណ្ណរូបនេះបំពានលើវិជ្ជាជីវៈ តាមរយៈការជេរប្រមាថព្រះសង្ឃ ធ្វើឱ្យប៉ះពាល់យ៉ាងធ្ងន់ធ្ងរលើវិស័យព្រះពុទ្ធសាសនាដែលជាសាសនារបស់រដ្ឋ ហើយជាការបំពានធ្ងន់ធ្ងរលើវិជ្ជាជីវៈ និងកិច្ចសន្យាអាជីវកម្មដែលសាម៉ីខ្លួនបានតម្កល់ទុកនៅក្រសួង៕
