រដ្ឋាភិបាលថៃបានផ្ដល់ជំនួយសប្បុរសធម៌នូវទឹកប្រាក់ចំនួន១០០ ០០០ដុល្លារដល់រដ្ឋាភិបាលកម្ពុជា ដើម្បីដោះស្រាយតម្រូវការចាំបាច់នានារបស់ពលករខ្មែរដែលកំពុងធ្វើចត្តាឡីស័កនៅមជ្ឈមណ្ឌលចត្តាឡីស័កកូវីដ-១៩ នៅតាមបណ្តោយព្រំដែនកម្ពុជា-ថៃ។
ពិធីប្រគល់-ទទួលមូលប្បទានបត្រជាទឹកប្រាក់១០០ ០០០ដុល្លារដែលជាជំនួយសប្បុរសធម៌របស់រដ្ឋាភិបាលថៃនេះ បានធ្វើឡើងដោយមានការចូលរួមពីសំណាក់រដ្ឋមន្ត្រីការបរទេសកម្ពុជា លោកប្រាក់ សុខុន និងឯកអគ្គរាជទូតថៃប្រចាំនៅកម្ពុជា លោក ប៉ាន់យ៉ារ៉ាក់ ភូលថាប់ នៅទីស្តីការក្រសួងការបរទេសកម្ពុជា។
សេចក្តីប្រកាសព័ត៌មានរបស់ក្រសួងការបរទេសកម្ពុជា និងសហត្រិបត្តិការអន្តរជាតិកម្ពុជា នៅថ្ងៃសុក្រនេះ បានឱ្យដឹងថា ការផ្តល់ជំនួយជាបន្តបន្ទាប់របស់រដ្ឋាភិបាលថៃ រួមជាមួយនឹងការផ្តល់ជំនួយសប្បុរសធម៌នូវទឹកប្រាក់ចំនួន១០០ ០០០ដុល្លារនេះ ពិតជាបានរួមចំណែកដល់កិច្ចខិតខំប្រឹងប្រែងក្នុងការប្រយុទ្ធប្រឆាំងនឹងជំងឺកូវីដ-១៩នៅកម្ពុជា ព្រមទាំងបង្កភាពងាយស្រួលដល់ពលករកម្ពុជាដែលបានទៅធ្វើការនិងស្នាក់នៅប្រទេសថៃផងដែរ។
សេចក្តីប្រកាសព័ត៌មានបន្ថែមថា៖ «ការផ្ដល់ជំនួយសប្បុរសធម៌នេះ មិនមែនត្រឹមតែបានឆ្លុះបញ្ចាំងពីកាយវិការមនុស្សធម៌ដ៏ល្អប្រសើរប៉ុណ្ណោះទេ ប៉ុន្តែថែមទាំងបានបង្ហាញយ៉ាងច្បាស់អំពីទំនាក់ទំនងមិត្តភាពជាប្រពៃណី សាមគ្គីភាព និងភាពជាអ្នកជិតខាងដ៏ល្អរវាងប្រទេសទាំងពីរផងដែរ»។
កាលពីថ្ងៃទី១៩ ខែធ្នូ ឆ្នាំ២០២០ ក្រសួងសុខភាពសាធារណៈថៃបានរកឃើញករណីឆ្លងក្នុងសហគមន៍ដែលផ្ទុះឡើងនៅខេត្តសាមុតសាខន ក្នុងចំណោមពលករបរទេសដែលធ្វើការនៅផ្សារចែកចាយបង្គារមួយកន្លែង ហើយក្នុងអំឡុងពេលនោះដែរ ពលករខ្មែរដែលធ្វើការនៅប្រទេសថៃបាននាំគ្នាត្រឡប់មកកម្ពុជាវិញជាបន្តបន្ទាប់រហូតមកដល់បច្ចុប្បន្ន។
បើតាមក្រសួងសុខាភិបាល គិតមកដល់ថ្ងៃម្សិលមិញ កម្ពុជាបានរកឃើញពលករខ្មែរមកពីថៃចំនួន៩១នាក់បានឆ្លងជំងឺកូវីដ-១៩ ក្នុងនោះបានព្យាបាលជាសះស្បើយចំនួន៩០នាក់៕