រដ្ឋាភិបាលសម្រេចផ្តល់ប្រាក់ឧបត្ថម្ភទៅដល់មន្រ្តីរាជការនិងកងកម្លាំងប្រដាប់អាវុធ ក្នុងម្នាក់ចំនួន៥០ ០០០រៀល ក្នុងឱកាសពិធីបុណ្យចូលឆ្នាំខ្មែរ និង ៥០ ០០០រៀលទៀតសម្រាប់ពិធីបុណ្យភ្ជុំបិណ្ឌឆ្នាំនេះ។
នៅក្នុងអនុក្រឹត្យស្តីពីការផ្តល់ប្រាក់ឧបត្ថម្ភក្នុងឱកាសពិធីបុណ្យចូលឆ្នាំខ្មែរ និងបុណ្យភ្ជុំបិណ្ឌ ចុះថ្ងៃទី១៩ ខែមីនា ឆ្នាំ២០២១នេះ រដ្ឋាភិបាលបានសម្រេចផ្តល់ប្រាក់ឧបត្ថម្ភនេះទៅដល់មន្រ្តីរាជការទាំងថ្នាក់ជាតិ និងថ្នាក់ក្រោមជាតិ និងកងកម្លាំងប្រដាប់អាវុធ រួមនឹងគ្រួសារជនពលីនិងគ្រួសារជនមរណៈដែលជាអតីតយុទ្ធជនផងដែរ។
អនុក្រឹត្យបញ្ជាក់ថា ប្រាក់ឧបត្ថម្ភនេះត្រូវបានផ្តល់សម្រាប់ម្នាក់ៗឬមួយគ្រួសារតែមួយកន្លែងនិងតែមួយលើកតែប៉ុណ្ណោះ។
បើតាមអនុក្រឹត្យដដែល ប្រាក់ឧបត្ថម្ភសម្រាប់ពិធីបុណ្យចូលឆ្នាំខ្មែរចំនួន៥០ ០០០រៀល នឹងត្រូវបើកជូនសាម៉ីជនម្នាក់ៗយ៉ាងយូរត្រឹមថ្ងៃទី១០ ខែមេសា ឆ្នាំ២០២១ និងប្រាក់ឧបត្ថម្ភសម្រាប់ពីធីបុណ្យភ្ជុំបិណ្ឌចំនួន៥០ ០០រៀលទៀត នឹងផ្តល់ជូនក្នុងពេលបើកប្រាក់បៀវត្សនៃខែតុលា ឆ្នាំ២០២១។
គួរបញ្ជាក់ថា ពិធីបុណ្យចូលឆ្នាំខ្មែរប្រពៃណីជាតិ ឆ្នាំនេះ នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា និងពិធីបុណ្យភ្ជុំបិណ្ឌ នឹងប្រព្រឹត្តទៅចាប់ពីថ្ងៃទី០៥ ដល់ថ្ងៃទី០៧ ខែតុលា ខាងមុខ៕
