ក្រសួងធម្មការ និងសាសនា ប្តឹងទៅតុលាការ ដើម្បីចាត់វិធានការច្បាប់លើលោក ផែង វណ្ណៈ ដោយថា បុគ្គលរូបនេះបានជេរប្រមាថ ញុះញង់ឱ្យមានការរើសអើងទៅលើព្រះសង្ឃ និងធ្វើឱ្យប៉ះពាល់ដល់តម្លៃសាសនារបស់រដ្ឋ។
លិខិតរបស់ក្រសួងធម្មការ និងសាសនា ចុះថ្ងៃទី១៩ ខែមីនា ឱ្យដឹងថា កាលពីថ្ងៃទី១៤ ខែមីនា ឆ្នាំ២០២១ ឈ្មោះ ផែង វណ្ណៈ បានធ្វើការបង្ហោះវីដេអូផ្សាយផ្ទាល់លើបណ្តាញសង្គមហ្វេសប៊ុករបស់ខ្លួន ដោយជេរប្រមាថមកលើព្រះអង្គ ពិន សែម ចៅអធិការវត្តរាជបូណ៌ និងពោលពាក្យគំរាមកំហែងញុះញង់ឱ្យមានការរើសអើងចំពោះព្រះសង្ឃ ព្រះពុទ្ធសាសនារបស់រដ្ឋ និងបំភ្លៃខុសពីការពិត ជាដើម។
ខ្លឹមសារក្នុងលិខិតនោះសរសេរថា៖ «មិនតែប៉ុណ្ណោះ [លោក ផែង វណ្ណៈ] បានប្រមាថយ៉ាងធ្ងន់ធ្ងរដល់អាយុជីវិតអ្នកបួស ដោយបាននិយាយថា បើសិនជាវាយកូនខ្ញុំបែបនេះ ខ្ញុំអត់ទៅប្តឹងទេ ខ្ញុំទៅបាញ់ចោលតែម្តង ចំពោះអ្នកប្រព្រឹត្ត ហើយជនរងគ្រោះដែលត្រូវព្រះចៅអធិការ ពិន សែម វាយនឹងរំពាត់ផ្តៅ បានរត់គេចខ្លួន ព្រោះខ្លាចគេធ្វើបាប និងមិនហ៊ានចូលផ្ទះ និងវាយប្រហារមន្ត្រីថេរសភាសង្ឃខេត្តទៀតផង ដែលធ្វើឱ្យប៉ះពាល់ដល់កិត្តិយស និងតម្លៃសាសនារបស់រដ្ឋ»។
ករណីនេះ ក្រសួងធម្មការ និងសាសនា បានថ្កោលទោសចំពោះទង្វើរបស់លោក ផែង វណ្ណៈ និងបានស្នើដល់ព្រះរាជអាជ្ញាខេត្តកណ្តាល ចាត់វិធានការចំពោះបុគ្គលរូបនេះតាមច្បាប់ជាធរមាន។
ព្រះរាជអាជ្ញារងខេត្តកណ្តាល លោក ទិន សុចិត្រា មានប្រសាសន៍ថា សំណុំរឿងដែលក្រសួងធម្មការប្តឹងលោក ផែង វណ្ណៈ នោះ តុលាការបានទទួលរួចហើយកាលពីម៉ោងប្រហែល១០ព្រឹកនេះ។ ប៉ុន្តែលោកថា តុលាការនឹងបញ្ជូនសំណុំរឿងទៅថ្នាក់លើ ដើម្បីពិនិត្យនិងសម្រេចកោះហៅលោក ផែង វណ្ណៈ ឱ្យចូលបំភ្លឺតាមនីតិវិធីនាពេលឆាប់ៗខាងមុខនេះ។
លោកមានប្រសាសន៍ថា៖ «យើងបានទទួលហើយ យើងនឹងចាត់វិធានការតាមនីតិវិធី។ បើសិនជាទទួលបានដំណឹងអញ្ចឹង [តាម]នីតិវិធី យើងនឹងកោះអញ្ជើញលោក ផែង វណ្ណៈ ឬក៏មានចំណាត់ការតាមនីតិវិធីមកសិន ទើបយើងអាចយល់ថាម៉េចៗបាន ប៉ុន្តែឥលូវ យើងអត់មានចំណាត់ការយល់ឃើញទេ។ ហើយការយល់ឃើញនេះទៀត ការសម្រេចទាល់តែមានការយល់ឃើញពីតំណាងអយ្យការនីមួយៗដែលគាត់កាន់រឿងហ្នឹងទៀត»។
វីអូឌី មិនអាចសុំការបំភ្លឺពីលោក ផែង វណ្ណៈ បានទេនៅថ្ងៃនេះ។
កាលពីថ្ងៃទី២០ ខែមីនា លោក ផែង វណ្ណៈ បានទៅសុំខមាទោសព្រះអង្គ ពិន សែម ចៅអធិការវត្តរាជបូណ៌ ក្រោយពីរូបលោកទទួលកំហុស ពាក់ព័ន្ធរឿងប្រមាថដល់ព្រះអង្គ ក្រោយពីខ្លួនបានធ្វើលិខិតសុំទោសជាសាធារណៈចំពោះព្រះសង្ឃនៅទូទាំងប្រទេស។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា តុលាការគួរតែធ្វើការស្រាវជ្រាវឱ្យបានគ្រប់ជ្រុងជ្រោយ មុននឹងធ្វើការចោទប្រកាន់លើលោក ផែង វណ្ណៈ តាមបណ្តឹងរបស់ក្រសួងធម្មការ និងសាសនា។
លោកបន្តថា សំណុំរឿងលោក ផែង វណ្ណៈ ដែលប្រមាថព្រះសង្ឃតាមបណ្តាញសង្គមបែបនេះ តុលាការគួរតែយកច្បាប់ស្តីពីរបបសារព័ត៌មានមកអនុវត្ត ជាជាងយកច្បាប់ព្រហ្មទណ្ឌមកអនុវត្ត។
លោកមានប្រសាសន៍ថា៖ «ចំណាត់ការផ្លូវច្បាប់ បើយើងពិនិត្យមើលទៅ ខ្ញុំថា គួរតែអនុវត្តតាមច្បាប់ស្តីពីរបបសារព័ត៌មានជាមុនសិន ដើម្បីរក្សាគុណតម្លៃនៃអ្នកសារព័ត៌មាន។ ហើយមួយទៀត ក៏ដើម្បីពង្រឹងនៃវិជ្ជាជីវៈអ្នកសារព័ត៌មានថា ធ្វើអ្វីក៏ត្រូវតែគោរពតាមវិជ្ជាជីវៈរបស់ខ្លួនដែរ»។
កាលពីថ្ងៃទី១៨ ខែមីនា ឆ្នាំ២០២១នេះ ក្រសួងព័ត៌មាន ក៏បានសម្រេចលុបអាជ្ញាបណ្ណអាជីវកម្មគេហទំព័រឈ្មោះ «www.phengvannaknews.com» របស់លោក ផែង វណ្ណៈ ផងដែរ ក្រោយពីម្ចាស់អាជ្ញាបណ្ណរូបនេះបានជេរប្រមាថព្រះសង្ឃ ធ្វើឱ្យប៉ះពាល់យ៉ាងធ្ងន់ធ្ងរលើវិស័យព្រះពុទ្ធសាសនា និងបានបំពានធ្ងន់ធ្ងរលើវិជ្ជាជីវៈនិងកិច្ចសន្យាអាជីវកម្មដែលសាម៉ីខ្លួនបានតម្កល់ទុកនៅក្រសួង៕
