រដ្ឋបាលខេត្តព្រះសីហនុ ណែនាំដល់អាជ្ញាធរស្រុកទាំងអស់ត្រូវពង្រឹងការអនុវត្តសារាចររបស់រាជរដ្ឋាភិបាល និងណែនាំទៅប្រធានផ្សារ អ្នកគ្រប់គ្រងផ្សារក្នុងដែនសមត្ថកិច្ចរបស់ខ្លួន ឱ្យបញ្ឈប់ការយកភាស៊ី និងសេវាផ្សេងៗពីប្រជាពលរដ្ឋដែលក់ដូរតាមកញ្ច្រែង កញ្ជើ និងល្អី។
យោងតាមលិខិតរបស់រដ្ឋបាលខេត្តព្រះសីហនុ ផ្ញើទៅកាន់អភិបាលក្រុង-ស្រុក នៅថ្ងៃទី២២ ខែមីនា ឆ្នាំ២០២១នេះ បានណែនាំដល់អាជ្ញាធរក្រុង-ស្រុកទាំងនោះ ត្រូវអនុវត្តខ្លឹមសារសារាចររបស់រដ្ឋាភិបាល និងត្រូវណែនាំបន្តទៅប្រធានផ្សារនិងអ្នកគ្រប់គ្រងផ្សារ ពាក់ព័ន្ធនឹងការប្រមូលភាស៊ី បង់ថ្លៃជួលតូប រាន ស្តង់ ព្រមទាំងកន្លែងលក់ដូរដទៃទៀតពីអាជីវករទៅតាមការកំណត់ក្នុងសៀវភៅបន្ទុក។
លិខិតដដែលក៏បានណែនាំដល់អាជ្ញាធរទាំងនោះ ត្រូវណែនាំបន្តទៅប្រធានផ្សារ អ្នកគ្រប់គ្រងផ្សារនៅក្នុងដែនសមត្ថកិច្ចរបស់ខ្លួនឱ្យបញ្ឈប់ការយកភាស៊ីនិងសេវាផ្សេងៗចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី និងត្រូវបង្កលក្ខណៈងាយស្រួល ដោយរៀបចំទីតាំងសមស្រប ដល់ប្រជាពលរដ្ឋដែលលក់ដូរអីវ៉ាន់តិចតួចតាមកញ្ច្រែង កញ្ជើ ល្អី នោះ។
រដ្ឋបាលខេត្តក៏បានណែនាំឱ្យលើកស្លាកតារាងតម្លៃភាស៊ីនៅតាមទីផ្សារក្នុងដែនសមត្ថកិច្ចរបស់ខ្លួនផងដែរ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ បានមានប្រសាសន៍ប្រាប់វីអូឌីនៅថ្ងៃនេះថា ការណែនាំនេះបានធ្វើឡើងក្រោយពីរដ្ឋបាលខេត្តបានរកឃើញភាពមិនប្រក្រតី លើការទារភាស៊ីនៅតាមទីផ្សារក្នុងខេត្តព្រះសីហនុនេះ។
លោកថា៖ «ជាក់ស្តែង ដូចករណីសន្តិសុខមជ្ឈមណ្ឌលពាណិជ្ជកម្មខាងលើស្រាប់ ដើម្បីបង្ការបញ្ហាបែបនេះ ត្រូវក្រើនរំឭកនូវការអនុវត្តខ្លឹមសារសារាចររបស់រាជរដ្ឋាភិបាល»។
ការណែនាំនេះបានធ្វើឡើងបន្ទាប់ពីមានករណីសន្តិសុខមជ្ឈមណ្ឌលពាណិជ្ជកម្មក្រុងព្រះសីហនុម្នាក់ បានទាត់បំផ្លាញពងទារបស់អាជីវករ ដោយសារតែទារថ្លៃភាស៊ីចំនួន៣ម៉ឺនរៀលលើសសៀវភៅបន្ទុកពីអាជីវករនោះមិនបាន កាលពីព្រឹកថ្ងៃទី២០ ខែមីនា ឆ្នាំ២០២១។
បើតាមអ្នកនាំពាក្យរដ្ឋបាលខេត្ត កាលពីថ្ងៃ២០ ខែមីនា អភិបាលខេត្តព្រះសីហនុ លោក គួច ចំរើន បានកោះប្រជុំបន្ទាន់មួយជុំវិញករណីសន្តិសុខមជ្ឈមណ្ឌលពាណិជ្ជកម្មក្រុងព្រះសីហនុ បានទារថ្លៃភាស៊ីលើសសៀវភៅបន្ទុក និងបំផ្លាញទំនិញពងទារបស់អាជីវករនោះ។
ក្រោយពិនិត្យដើមហេតុនៃបញ្ហាដែលបានកើតឡើងនេះ រដ្ឋបាលខេត្តរកឃើញថា សន្តិសុខរូបនោះពិតជាមានចេតនាបំផ្លាញទំនិញរបស់អាជីវករ មិនមែនជាការថយប៉ះធ្វើឱ្យខូចខាតនោះទេ ដែលករណីនេះ អភិបាលខេត្តបានបញ្ជាឱ្យនាំខ្លួនសន្តិសុខរូបនោះទៅសួរនាំបន្ថែម បើទោះជាករណីនេះមានការស្រុះស្រួលគ្នានិងផ្តល់សំណងទៅដល់អាជីវករលក់ពងទានោះហើយក៏ដោយ ព្រោះករណីនេះបានបង្កឱ្យប៉ះពាល់ដល់ការងារគ្រប់គ្រងរបស់អាជ្ញាធរសាធារណៈ។
លោក អ៊ី សុខឡេង អភិបាលក្រុងព្រះសីហនុ បានមានប្រសាសន៍ថា លោកនឹងកោះប្រជុំ ជាមួយប្រធានផ្សារទាំងអស់ និង មន្ទីរសេដ្ឋកិច្ចនិងហរិញ្ញវត្ថុខេត្ត នៅថ្ងៃពុធសប្ដាហ៍នេះ ដើម្បីផ្សព្វផ្សាយនិងណែនាំអំពីចំណាត់ការរបស់រដ្ឋបាលខេត្ត ជុំវិញការទារភាស៊ីនេះ។
លោកមានប្រសាសន៍ថា៖ «ការអនុវត្តសារាចររបស់រាជរដ្ឋាភិបាល គឺត្រូវតែធ្វើ ហើយអាហ្នឹងមិនអាចប្រធានផ្សារមួយៗគាត់ទៅយកភាស៊ីខុសពីសារាចរណែនាំអញ្ចឹងទេ ហើយករណីថាផ្សារណាមួយគាត់យកខុសពីសារាចរណែនាំ អាហ្នឹងគាត់ទទួលខុសត្រូវចំពោះមុខច្បាប់ខ្លួនគាត់ទៅ»។
លោក ជិន ជឿន អាយុ៤១ឆ្នាំ ជាអ្នកលក់បាយឆានិងមីឆាតាមរទេះ បង្ហាញក្តីរីករាយដែលអាជ្ញាធរខេត្តណែនាំឱ្យពិនិត្យបន្ថែមលើការទារភាស៊ីនេះ។
លោកថា៖ «ព្រោះអីប្រជាពលរដ្ឋឥលូវក៏ពិបាករកស៊ីដែរ ហើយគាបសង្កត់ពីអាជ្ញាធរ ខាងយកភាស៊ីយកអី បង់លិចបង់កើត យកភាស៊ីពីគ្នាលក់កំប៉ិកកំប៉ុក ដេញគ្នាមុខក្រោយ ខ្លះរើមិនទាន់ ខ្ចាយខូចខាតរបស់គ្នា»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បានគាំទ្រចំពោះចំណាត់ការរបស់អាជ្ញាធរខេត្តព្រះសីហនុ ដែលឱ្យរឹតបន្តឹងលើការងារទារភាស៊ីរបស់ប្រធានផ្សារ និងអ្នកគ្រប់គ្រងផ្សារ ឱ្យបានត្រឹមត្រូវ។
លោកមានប្រសាសន៍ថា៖ «យើងគាំទ្រទៅនឹងចំណាត់ការរបស់អភិបាលខេត្តព្រះសីហនុ ទាក់ទងទៅនឹងការបញ្ឈប់ការយកភាស៊ីនេះ អ្នកលក់ដូរកំប៉ិកកំប៉ុកតាមកញ្ច្រែង កញ្ជើ ល្អី ទាំងអស់ហ្នឹង វាជាចំណុចមួយជួយសម្រាលបន្ទុកអ្នករកស៊ីតូចតាចផងដែរ។
លោកក៏បានស្នើឱ្យពិនិត្យនិងបញ្ឈប់ការទារភាស៊ីពីអ្នកលក់ដូរតិចតួចនៅតាមឆ្នេរផងដែរ។
លោក វន់ ពៅ បន្តថា៖ «ជាទូទៅ អ្នកលក់ដូរតាមឆ្នេរទាំងអស់ហ្នឹង គឺគាត់ត្រូវបង់ភាស៊ីទៅឱ្យអាជ្ញាធរតាមតូចតាមធំអញ្ចឹង កន្លែងតាមតូចតាមធំ ហើយកន្លងទៅ យើងធ្លាប់ទទួលបានព័ត៌មានថា កន្លែងខ្លះវារាប់ពាន់រាប់ម៉ឺន តម្រៀបជួល[បន្ត]គ្នា ប៉ុន្តែវាមានកន្លែងខ្លះ មួយពាន់ពីរពាន់អញ្ចឹងដែរ»។
យោងតាមសារាចររបស់រដ្ឋាភិបាល ចុះថ្ងៃទី០៩ ខែធ្នូ ឆ្នាំ២០១៦ បានសម្រេចលុបចោលការបង់ថ្លៃភាស៊ី និងការបង់ថ្លៃសេវាផ្សេងទៀត ចំពោះការលក់ដូររបស់ប្រជាពលរដ្ឋតាមកញ្ច្រែង កញ្ជើ ល្អី ដើម្បីកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាពលរដ្ឋ ព្រមទាំងកែលម្អសេវាសាធារណៈជូនប្រជាពលរដ្ឋ៕