ប្រជាពលរដ្ឋចំនួន២៤គ្រួសារ នៅឃុំរុនតាឯក ស្រុកបន្ទាយស្រី ខេត្តសៀមរាប ស្នើប្រមុខរដ្ឋាភិបាល ជួយអន្តរាគមន៍រកដំណោះស្រាយរឿងដីធ្លីរបស់ពួកគាត់ ដោយពួកគាត់ចោទអាជ្ញាធរជាតិអប្សរា ថាបានឈូសឆាយរំលោភយកដីរបស់ពួកគាត់ដោយមិនបានផ្តល់សំណងសមរម្យ។
លោក នឿម សាណន អះអាងជាតំណាងប្រជាពលរដ្ឋទាំង២៤គ្រួសារនោះ បានឱ្យ វីអូឌី ដឹងនៅថ្ងៃអង្គារម្សិលមិញថា ប្រជាពលរដ្ឋបានរស់នៅអាស្រ័យផលលើដីទំហំ៩៦ហិកតានេះ តាំងពីឆ្នាំ១៩៧៩មក ប៉ុន្តែនៅអំឡុងឆ្នាំ២០០៥ អាជ្ញាធរជាតិអប្សរា បានចុះទៅស្រាវជ្រាវនិងទិញដីនោះពីប្រជាពលរដ្ឋក្នុងតម្លៃ៥០០ទៅ៦០០ដុល្លារ។
លោកបន្តថា ការទិញដីនេះ ប្រជាពលរដ្ឋខ្លះបានលក់ តែពលរដ្ឋខ្លះមិនព្រមលក់នោះទេ ដោយស្នើឱ្យមានការដោះដូរដីនៅកន្លែងផ្សេងទៅតាមទំហំដីជាក់ស្តែង ប៉ុន្តែអាជ្ញាធរជាតិអប្សរា បដិសេធ ទើបបណ្តាលឱ្យកើតមានវិវាទដល់បច្ចុប្បន្ន។
លោកបញ្ជាក់ថា៖ «[ដីហ្នឹង] វាអត់ពាក់ព័ន្ធទៅហ្នឹងប្រាសាទ ពាក់ព័ន្ធទៅក្នុងតំបន់អភិរក្ស ឬជាជម្រកព្រៃឈើអីនោះទេ បើសិនជាមានប្រាសាទ ឬតំបន់អភិរក្ស ហេតុអីបានជាឈូសឆាយតំបន់ហ្នឹងធ្វើជាតំបន់អភិវឌ្ឍន៍ អ៊ីចឹងនេះវាអត់មានប៉ះពាល់អីទេនៅក្នុងច្បាប់»។
លោក សាណន បន្ថែមថា ក្រោយមានវិវាទដីធ្លីនេះ ប្រជាពលរដ្ឋបានសុំអន្តរាគមន៍ឱ្យមានដំណោះស្រាយពីអាជ្ញាធរខេត្តជាច្រើនលើកច្រើនសារមកហើយ ប៉ុន្តែនៅមិនទាន់មានការដោះស្រាយណាមួយសមរម្យដល់ពលរដ្ឋនៅឡើយ ទើបពួកគាត់ស្នើដល់លោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះស្រាយជូនប្រជាពលរដ្ឋផង ព្រោះពួកគាត់មានតែដីនេះសម្រាប់បង្កបង្កើនផលចិញ្ចឹមជីវិតប៉ុណ្ណោះ។
លោកថា៖ «អញ្ចឹងរហូតមក មានតែយើងធ្វើវិធីសាស្រ្តមួយទេ ដើម្បីឱ្យប្រមុខរដ្ឋាភិបាល ចៅហ្វាយខេត្ត អាជ្ញាធរដែលពាក់ព័ន្ធហ្នឹង សូមមេត្តាសម្រួលត្រួតពិនិត្យ [ដោះស្រាយ]»។
អ្នកនាំពាក្យអាជ្ញាធរជាតិអប្សរា លោក ឡុង កុសល បានច្រានចោលការចោទប្រកាន់របស់ប្រជាពលរដ្ឋ ហើយថា បញ្ហាដីធ្លីនេះ ក្រុមការងារអាជ្ញាធរជាតិអប្សរា បានដោះស្រាយរួចហើយ។ លោកបានអះអាងថា ការទាមទាររបស់ប្រជាពលរដ្ឋធ្វើឡើងដោយមិនបានផ្អែកទៅលើផ្នែកច្បាប់និងភាពជាក់ស្ដែងនៃទីតាំងនោះទេ។
លោកបញ្ជាក់ថា៖ «ករណីស្ថាប័នរដ្ឋទៅរំលោភលើដីរបស់ប្រជាពលរដ្ឋ អាហ្នឹងគឺជារឿងមិនពិតទេ។ ទី២ ខ្ញុំសូមបញ្ជាក់ថែមទៀត អំពីថា ក្នុងការទាមទាររបស់បងប្អូនប្រជាពលរដ្ឋ វាមានលក្ខខណ្ឌមួយចំនួន ដែលការទាមទាររបស់គាត់មួយចំនួន វាមិនត្រឹមត្រូវ មិនសមហេតុមិនសមផល ដែលក្រុមការងារពីមុនគេបានដោះស្រាយរួចរាល់ហើយ ខាងផ្នែកជំនាញគ្រប់ផ្នែកពាក់ព័ន្ធ គេដោះស្រាយរួចរាល់ហើយ»។
តែយ៉ាងណា លោកថា អាជ្ញាធរជាតិអប្សរា នឹងបន្តពិនិត្យនិងដោះស្រាយជាមួយប្រជាពលរដ្ឋបន្តទៀត។ លោកក៏បានស្នើសុំឱ្យប្រជាពលរដ្ឋទាំងនោះចូលរួមសហការក្នុងការដោះស្រាយជាមួយអាជ្ញាធរដោយភាពស្មោះត្រង់ និងបញ្ឈប់រាល់សកម្មភាពទាំងឡាយណាដែលធ្វើឱ្យមានផលប៉ះពាល់ដល់ដំណើរការនៃការដោះស្រាយនេះ។
មន្រ្តីស៊ើបអង្កេតនៃសមាគមការពារសិទ្ធិមនុស្សអាដហុកប្រចាំខេត្តសៀមរាប លោក សួស ណារិន ដែលបានតាមដានរឿងនេះ មានប្រសាសន៍ថា ករណីជម្លោះដីធ្លីនេះ អាជ្ញាធរខេត្តបានដោះស្រាយពេលថ្មីៗនេះ ដោយផ្ដល់សំណងជាដីលំនៅដ្ឋានក្នុងមួយគ្រួសារទំហំ២០គុណ៣០ម៉ែត្រ ប៉ុន្តែពលរដ្ឋ២៤គ្រួសារនេះមិនព្រមទទួលយក។
លោកបន្តថា៖ «ការពីមុន មានគ្នា៣០គ្រួសារ ប៉ុន្ដែអាជ្ញាធរគាត់បានដោះស្រាយបញ្ហាជាសំណងលុយកាក់ខ្លះទៅ នៅសល់២៤គ្រួសារ។ អញ្ចឹងចុងក្រោយ គេដោះស្រាយជាដី ម្នាក់មួយឡូត៍ៗ តែពួកគាត់មិនព្រម គាត់ចង់ទាមទារដីទាំងអស់របស់គាត់៩០ហិកតា ដែលកាលមុនមាន១៥០ហិកតាជាង»។
ទោះយ៉ាងណា លោកស្នើឱ្យអាជ្ញាធរពាក់ព័ន្ធដោះស្រាយបញ្ហាដីធ្លីនេះឱ្យបានសមរម្យ និងទទួលបានផលប្រយោជន៍ទាំងអស់គ្នា៕