កម្ពុជាទទួលបានហិរញ្ញប្បទានចំនួន៧លានដុល្លារអាមេរិកពីប្រទេសកូរ៉េ (KOICA) ដើម្បីជួយលើកកម្ពស់សមត្ថភាពវិស័យអប់រំនៅកម្ពុជាឱ្យកាន់តែមានភាពល្អប្រសើរ។
ពិធីចុះហត្ថលេខាប្រគល់និងទទួលថវិកាជំនួយនេះ ត្រូវបានធ្វើឡើងតាមប្រព័ន្ធវីដេអូ នៅថ្ងៃទី២៤ ខែមីនា ឆ្នាំ២០២១ រវាងប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំការិយាល័យប្រទេសកម្ពុជា លោក នោ ហ្យន់ជូន (Rho Hyun-Jun) និងលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។
យោងតាមសេចក្តីប្រកាសព័ត៌មានរបស់ KOICA បានឱ្យដឹងថា ខ្លួនបានផ្តល់ហិរញ្ញប្បទានចំនួន៧លានដុល្លារសហរដ្ឋអាមេរិក ជួយលើកកម្ពស់សមត្ថភាពការអប់រំបច្ចេកវិទ្យាពត៌មានវិទ្យានៅមជ្ឈមណ្ឌលគរុកោសល្យភូមិភាគខេត្ត និងសាលាមធ្យមសិក្សាបឋមភូមិ នៅប្រទេសកម្ពុជា។
តំណាងរបស់ KOICA លោក Rho Hyunjun បានឱ្យដឹងនៅថ្ងៃនេះថា គម្រោងនេះផ្តោតសំខាន់លើការចូលរួមចំណែករបស់ក្រសួងអប់រំ យុវជន និងកីឡា ដើម្បីលើកកម្ពស់គុណវុឌ្ឍិគ្រូឧទ្ទេស និងគ្រូបង្រៀន ក្នុងការអប់រំបច្ចេកវិទ្យាព័ត៌មានវិទ្យានៅតាមមជ្ឈមណ្ឌលគរុកោសល្យភូមិភាគខេត្ត និងសាលាមធ្យមសិក្សាបឋមភូមិ នៅខេត្តកំពង់ចាម ព្រៃវែង តាកែវ និងកណ្តាល។
បន្ថែមពីនេះ KOICA នឹងផ្តល់អាហារូបករណ៍ថ្នាក់អនុបណ្ឌិតដល់គ្រូឧទ្ទេស ធ្វើបច្ចុប្បន្នភាពកម្មវិធីសិក្សា សៀវភៅសិក្សាកុំព្យូទ័រ បំពាក់កុំព្យូទ័រ និងកែលម្អបន្ទប់សម្រាប់បង្រៀនកុំព្យូទ័រ នៅតាមមជ្ឈមណ្ឌលគរុកោសល្យភូមិភាគខេត្ត និងសាលាមធ្យមសិក្សាបឋមភូមិទាំងនោះផងដែរ។
លោក Rho Hyunjun បញ្ជាក់ថា៖ «KOICA សង្ឃឹមថា គម្រោងនេះនឹងធ្វើឱ្យប្រសើរឡើងលើការអប់រំបច្ចេកវិទ្យាព័ត៌មានវិទ្យានៅប្រទេសកម្ពុជា ក៏ដូចជាចូលរួមចំណែកគាំទ្រដល់គោលដៅយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស តាមរយៈការពង្រឹងគុណភាពអប់រំ វិទ្យាសាស្ត្រ និងបច្ចេកវិទ្យា»។
KOICA មានគោលបំណងលើកកម្ពស់ទំនាក់ទំនងមិត្តភាពសហប្រតិបត្តិការ និងការផ្លាស់ប្តូរគ្នាទៅវិញទៅមកជាមួយបណ្តាប្រទេសកំពុងអភិវឌ្ឍន៍តាមរយៈកម្មវិធីជំនួយអភិវឌ្ឍន៍ផ្លូវការ (ODA) សម្រាប់ការអភិវឌ្ឍសេដ្ឋកិច្ចសង្គមរបស់បណ្តាប្រទេសទាំងនោះ៕