អ្នកជំងឺ២នាក់ទៀតនៅថ្ងៃនេះបានស្លាប់ដោយសារកូវីដ-១៩ ខណៈមនុស្សចំនួន៥៥នាក់បន្ថែមទៀតត្រូវបានរកឃើញថាបានឆ្លងជំងឺនេះ។
សេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី២៥ ខែមីនា ឆ្នាំ២០២១ ឱ្យដឹងថា អ្នកជំងឺ២នាក់ជាបុរសជនជាតិខ្មែរនិងចិនដែលបានស្លាប់នោះ គឺដោយសារតែរលាកសួតទាំងសងខាងធ្ងន់ធ្ងរនិងខ្សោយសួតខ្លាំងដែលបណ្ដាលមកពីជំងឺកូវីដ-១៩។
ក្រសួងបន្តថា បុរសជនជាតិខ្មែរម្នាក់ដែលបានស្លាប់ មានអាយុ៣៨ឆ្នាំ ស្នាក់នៅភូមិសាមគ្គី សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ត្រូវបានក្រសួងរកឃើញថា បានឆ្លងជំងឺកូវីដ-១៩ កាលពីថ្ងៃទី១៦ ខែមីនា ឆ្នាំ២០២១ ដោយសម្រាកព្យាបាលនៅសណ្ឋាគារ Great Duke។ ប៉ុន្តែរហូតដល់ថ្ងៃទី២០ ខែមីនា ក្រុមគ្រូពេទ្យបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតវិញ ក្រោយពីបុរសរូបនេះមានអាការហត់។
ក្រសួងបន្តថា បុរសរូបនោះបានរងនូវការវាយលុកលឿនពីវីរុសកូវីដ-១៩ ធ្វើឱ្យខ្សោយសួតធ្ងន់ធ្ងរខ្លាំង រលាកសួតសងខាងធ្ងន់ធ្ងរខ្លាំង ទើបបណ្តាលឱ្យស្លាប់។
ចំណែកអ្នកស្លាប់ដោយសារជំងឺកូវីដ-១៩ម្នាក់ទៀតនោះ ក្រសួងថា ជាជនជាតិចិន អាយុ៤៣ឆ្នាំ ជាបុគ្គលិកកាស៊ីណូ នៅស្រុកកោះធំ ខេត្តកណ្តាល និងត្រូវបានរកឃើញឆ្លងកូវីដ-១៩ កាលពីថ្ងៃទី១១ ខែមីនា ឆ្នាំ២០២១។
ក្រសួងបន្ថែមទៀតថា ក្រោយពីបានដាក់ឱ្យសម្រាកព្យាបាលនៅមន្ទីរពេទ្យជ័យជំនះ រហូតដល់ថ្ងៃទី១៨ ខែមីនា ក្រុមគ្រូពេទ្យបានបញ្ជូនអ្នកជំងឺជនជាតិចិននោះទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតវិញ បន្ទាប់ពីមានអាការហត់ខ្លាំង។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ក្រសួងនឹងពន្លឿនការចាក់វ៉ាក់សាំងប្រឆាំងនឹងជំងឺកូវីដ-១៩ ជូនប្រជាពលរដ្ឋ ដើម្បីទប់ស្កាត់កុំឱ្យមានប្រជាពលរដ្ឋស្លាប់ដោយសារជំងឺនេះបន្ថែមទៀត។ ប៉ុន្តែនៅពេលសួរថា តើការចាក់វ៉ាក់សាំងនោះនឹងចាប់ផ្ដើមពេលណា លោកស្រីសុំមិនធ្វើអត្ថាធិប្បាយ រង់ចាំអនុសាសន៍របស់ប្រមុខរដ្ឋាភិបាលជាមុនសិន។
លោកស្រីថា៖ «ធ្វើម៉េចរុញការចាក់វ៉ាក់សាំងឱ្យបានលឿន ដើម្បីការពារភាពធ្ងន់ធ្ងរហ្នឹង។ ខ្ញុំកំពុងរុញការចាក់វ៉ាក់សាំងហ្នឹង»។
ក្នុងរយៈពេលជាង១ខែមកនេះ អ្នកស្លាប់ដោយសារជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ បានកើនដល់ចំនួន៧នាក់ហើយ។
ក្រៅពីអ្នកស្លាប់ចំនួន២នាក់ នៅថ្ងៃនេះ ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ចំនួន៥៥នាក់បន្ថែមទៀតផងដែរ។
ក្រសួងបន្តថា អ្នកជំងឺកូវីដ-១៩ ទាំង៥៥នាក់ ក្នុងនោះមានខ្មែរចំនួន៥៤នាក់ និងជនជាតិវៀតណាមម្នាក់ ដោយអ្នកទាំងនោះត្រូវបានរកឃើញនៅរាជធានីភ្នំពេញ ខេត្តសៀមរាប កណ្ដាល ព្រះសីហនុ ត្បូងឃ្មុំ និងកំពង់ធំ។
ក្រៅពីការរកឃើញករណីឆ្លងថ្មីនេះ ក្រសួងថា ក៏មានអ្នកជាសះស្បើយចំនួន២៣នាក់ដែរកាលពីថ្ងៃម្សិលមិញ។
អ្នកសិក្សាពីបញ្ហាសង្គម លោកបណ្ឌិត សេង សារី មានប្រសាសន៍ថា ការស្លាប់របស់អ្នកជំងឺកូវីដ-១៩ ជាការរំឭកដល់ប្រជាពលរដ្ឋឱ្យបង្កើនការប្រុងប្រយ័ត្ននិងការពារសុខភាពពីជំងឺឆ្លងនេះ។ លោកបង្ហាញក្ដីបារម្ភនៃការរីករាលដាលជំងឺនេះ អាចកាន់តែធ្ងន់ធ្ងរទៅ ប្រសិនបើរដ្ឋាភិបាល និងប្រជាពលរដ្ឋមិនបានចូលរួមទប់ស្កាត់ឱ្យមានប្រសិទ្ធភាពទេនោះ។
លោកថា៖ «អ្នកខ្លះក៏មានទស្សនៈថា វាជាជំងឺនយោបាយ ឬជាជំងឺមិនច្បាស់លាស់អីអញ្ចឹង។ ទី២ សម្រាប់ខ្ញុំ វាទើបចាប់ផ្ដើមទេ ហើយវានឹងបន្តរីករាលដាលបន្តទៀត បើមិនមានយន្តការច្បាស់លាស់ ទាំងកម្រិតរដ្ឋាភិបាល ទាំងកម្រិតប្រជាពលរដ្ឋ និងកម្រិតសហគមន៍»។
បើតាមរបាយការណ៍ក្រសួងសុខាភិបាល ឱ្យដឹងថា គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី២៥ ខែមីនា ឆ្នាំ២០២១ អ្នកជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ សរុប១ ៣៤៨ នាក់ ខណៈអ្នកឆ្លងនៅទូទាំងប្រទេសចំនួន១ ៨៧២នាក់ ក្នុងនោះ ព្យាបាលជាសះស្បើយ១ ០៥៦នាក់ និងកំពុងសម្រាកព្យាបាលចំនួន៨០៩នាក់ ហើយករណីស្លាប់កើនដល់៧នាក់៕
