រដ្ឋាភិបាល នៅថ្ងៃនេះ បានដាក់ឱ្យដំណើរការគម្រោងធានារ៉ាប់រងការខ្ចីប្រាក់ ឬហៅថា «ធានាឥណទាន» ដែលមានទំហំទឹកប្រាក់២០០លានដុល្លារ ដើម្បីឱ្យអាជីវកម្មមីក្រូ ខ្នាតតូចនិងមធ្យម និងអាជីវកម្មខ្នាតធំ មានលទ្ធភាពពង្រឹងអាជីវកម្មរបស់ខ្លួនក្នុងអំឡុងវិបត្តិជំងឺកូវីដ-១៩ ។
សេចក្តីប្រកាសព័ត៌មាន ស្តីពី «ការដាក់ឱ្យដំណើរការគម្រោងធានាឥណទាន ដើម្បីស្តារអាជីវកម្មរបស់សាជីវកម្មធានាឥណទានកម្ពុជា ទំហំ២០០លានដុល្លារ» របស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៩ ខែមីនានេះថា គម្រោងនេះមានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូ ខ្នាតតូច មធ្យម និងអាជីវកម្មខ្នាតធំ មានលទ្ធភាពទទួលបានហិរញ្ញប្បទានពីគ្រឹះស្ថានហិរញ្ញវត្ថុចូលរួម (PFIs) សម្រាប់កៀរគរទុនបង្វិល វិនិយោគ និងការពង្រីកអាជីវកម្ម។
ក្រសួងគូសបញ្ជាក់ថា សាជីវកម្មធានាឥណទានកម្ពុជានេះជាក្រុមហ៊ុនមុនដំបូងបង្អស់នៅកម្ពុជា ដែលត្រូវបានបង្កើតឡើងដោយរដ្ឋាភិបាល និងជាសហគ្រាសសាធារណៈក្រោមអាណាព្យាបាលបច្ចេកទេសនិងហិរញ្ញវត្ថុរបស់ក្រសួង និងមានបេសកកម្មចម្បងគឺផ្តល់ការធានាឥណទានដល់ (PFIs) ដើម្បីគាំទ្រដល់អាជីវកម្មដែលមានលទ្ធភាពសង ប៉ុន្តែខ្វះទ្រព្យបញ្ចាំ នៅពេលស្នើសុំឥណទាន។
មួយវិញទៀត ក្រសួងថា កញ្ចប់ដំបូងនៃគម្រោងនេះនឹងចូលរួមបង្កើនទំហំឥណទានថ្មីនៅក្នុងវិស័យធនាគារចំនួន២០០លានដុល្លារ សម្រាប់អាជីវកម្ម ដែលស្នើសុំឥណទានពី PFIs របស់សាជីវកម្មធានាឥណទាននៅកម្ពុជា រួមមាន គ្រឹះស្ថានមីក្រូហិរញ្ញវត្ថុ និងធនាគារមួយចំនួននៅកម្ពុជា ដែលកំពុងរៀបចំខ្លួនដើម្បីក្លាយជាគ្រឹះស្ថានហិរញ្ញវត្ថុចូលរួម របស់សាជីវកម្មធានាឥណទានកម្ពុជា។
ក្រសួងក៏បានដកស្រង់សម្តីរដ្ឋលេខាធិការក្រសួងហិរញ្ញវត្ថុ និងជាប្រធានក្រុមប្រឹក្សាភិបាលរបស់សាជីវកម្មធានាឥណទានកម្ពុជា លោក រស់ សីលវ៉ា មកចុះផ្សាយថា គម្រោងនេះនឹងចូលរួមគាំទ្រដល់គោលនយោបាយរក្សាកំណើនសេដ្ឋកិច្ច ប្រកបដោយចីរភាព និងបរិយាបន្នរបស់រាជរដ្ឋាភិបាល និងស្របតាមគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥។ លោកបានស្នើឱ្យធនាគារ និងគ្រឹះស្ថានមីក្រូហិរញ្ញវត្ថុ គាំទ្រដល់សាជីវកម្មធានាឥណទានកម្ពុជានេះ តាមរយៈការចូលរួមជា PFIs និងពង្រីកអភិបាលកិច្ចឥណទាន។
អ្នកនាំពាក្យគ្រឹះស្ថានមីក្រូហិរញ្ញវត្ថុកម្ពុជា លោក កាំង តុងងី ដែលស្ថិតនៅក្នុងក្រុមការងារបង្កើតគម្រោងធានាឥណទាននេះដែរ មានប្រសាសន៍ថា ការបង្កើតគម្រោងនេះឡើង ដោយសារតែកន្លងមក រដ្ឋាភិបាលនិងភាគីពាក់ព័ន្ធរកឃើញនូវបញ្ហាប្រឈមចម្បងមួយរបស់សហគ្រាសខ្នាតតូចនិងធម្យម (SME) នោះគឺពួកគេពិបាកក្នុងការទទួលបានឥណទានពីធនាគារ និងមីក្រូហិរញ្ញវត្ថុ ក្នុងអត្រាការប្រាក់ទាប ក៏ដូចជាការទទួលបានឥណទានចំនួនតិច។
លោកបន្តថា គម្រោងនេះនឹងធ្វើឱ្យគ្រឹះស្ថានធនាគារ ក៏ដូចជាមីក្រូហិរញ្ញវត្ថុ ហ៊ានផ្តល់ប្រាក់កម្ចីទៅ (SME) ច្រើនជាងមុន ដោយសារតែរាល់ហានិភ័យដែលបានកើតឡើង ធានាឥណទាននេះចេញសងទៅម្ចាស់បំណុលពី៧០ទៅ៨០ភាគរយ។
លោកថា៖ «នៅពេលដែលរដ្ឋាភិបាលចេញក្រេឌីតការ៉េនធីស្គ្រីនហ្នឹងមក វាធ្វើឱ្យហានិភ័យរបស់ធនាគារនិងមីក្រូហិរញ្ញវត្ថុធ្លាក់ចុះ អ៊ីចឹង Bank [ធនាគារ] និង អឹមអេហ្វអាយ (MFI) គាត់ហ៊ានផ្តល់កម្ចីទៅឱ្យ អឹមអេហ្វអាយ បានច្រើនជាងមុន បើកាលណា អឹមអេហ្វអាយ បានកម្ចីច្រើនជាងមុន មានន័យថា សន្ទុះពាណិជ្ជកម្មគាត់ គាត់នឹងមានការកើនឡើង ហើយវាជួយដល់កំណើនសេដ្ឋកិច្ច ក៏ដូចជាកំណើនក្នុងស្រុកដែរ»។
ប្រធានសមាគមសហគ្រាសខ្នាតតូច និងមធ្យម លោក តែ តាំងប៉ មិនអាចសុំការអត្ថាធិប្បាយបានទេ។
ចំណែកប្រធានណៈកម្មការនាយកគណបក្សប្រជាធិបតេយ្យមូលដ្ឋាន និងជាអ្នកជំនាញផ្នែកកសិកម្ម លោកបណ្ឌិត យ៉ង សាំងកុមារ មានប្រសាសន៍ថា ការផ្តល់ឱកាសក្នុងការផ្តល់ទុនបង្វិលដល់សហគ្រាសខ្នាតតូចនិងធម្យម ឱ្យបានឈរជើងឡើងវិញក្នុងអំឡុងវិបត្តិជំងឺកូវីដ-១៩នេះ ជាការប្រសើរ។
ប៉ុន្តែលោកថា រដ្ឋាភិបាលក៏ត្រូវសិក្សាមើលផងដែរថា តើមុខជំនួញអ្វីខ្លះដែលត្រូវទទួលបានមុនគេ ជាពិសេសមុខជំនួញដែលមានសក្តានុពល និងកំពុងរងផលប៉ះពាល់ និងត្រូវការទុនបន្ថែម ដើម្បីផលិតនិងពង្រីកការងារ។
លោកថា៖ «ការផ្តល់ទុនគ្រាន់តែជាជ្រុងមួយ ប៉ុន្តែត្រូវមានវិធានការផ្សេងៗ ឧទាហរណ៍ ការងារក្នុងកសិកម្មអញ្ចឹង ត្រូវមានការសហការគ្នាជាមួយសហគមន៍ សម្របសម្រួលធ្វើម៉េចកុំឱ្យម្នាក់ៗផលិតអ្វីមួយច្រើនពេក ធ្វើឱ្យប៉ះពាល់ទីផ្សារ ទាក់ទងនឹងការធ្វើពាណិជ្ជកម្ម ទាក់ទងការដឹកជញ្ជូន ការស្តុក ការកែច្នៃពីតំបន់មួយទៅតំបន់មួយ»។
បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច អាជីវកម្មដែលមានម្ចាស់ភាគហ៊ុនសញ្ជាតិកម្ពុជា ដែលកាន់កាប់ភាគហ៊ុនលើសពី ៥០% អាចទទួលបានការធានាឥណទានពីសាជីវកម្មធានាឥណទានកម្ពុជា តាមរយៈ PFIs នេះ៕
