អង្គការសង្គមស៊ីវិលនិងពលរដ្ឋរិះគន់អាជ្ញាធរខេត្តកោះកុងថា មិនបានចាត់វិធានការតឹងរ៉ឹងចំពោះបុគ្គលដែលបានចាក់ដីរំលោភចូលដីចំណីព្រែកនិងព្រៃកោងកាង។
នៅក្នុងខែមីនា ឆ្នាំ២០២១នេះ រដ្ឋបាលខេត្តកោះកុង បានចេញលិខិតមួយដោយឱ្យអ្នកស្រី លាង ហ៊ីម ហៅ ម៉ាហ្គោល យកគ្រឿងចក្រមកជីកកាយអាចម៍ដីចេញវិញឱ្យអស់ ដោយទុករយៈពេលមួយសប្តាហ៍ ក្រោយរកឃើញថា បុគ្គលរូបនេះបានចាក់ដីចូលទៅក្នុងចំណីព្រែក និងព្រៃកោងកាងរបស់រដ្ឋ ស្ថិតក្នុងចំណុចភូមិទួលគគីរក្រោម ឃុំទួលគគីរ ស្រុកមណ្ឌលសីមា។
ពលរដ្ឋម្នាក់រស់នៅខេត្តកោះកុង លោក យួន ឈីវ ដែលចុះផ្តិតយករូបភាពផ្ទាល់ និងបានផ្សព្វផ្សាយលើបណ្តាញសង្គមហ្វេសប៊ុកកាលពីថ្ងៃម្សិលមិញ បានលើកឡើងថា អ្នកស្រី លាង ហ៊ីម ដែលលោកថាជាអ្នកមានលុយមានអំណាចនោះ ពុំទាន់កាយដីចេញនៅឡើយទេ ហើយបានចាក់ដីបន្ថែមលើកន្លែងចាស់នោះទៀតផង។
លោកបន្ថែមថា៖ «កាយពីកន្លែងហ្នឹង ចាក់កន្លែងហ្នឹងដដែលហ្នឹង ឱ្យនិយាយថាម៉េចឥលូវ! បងប្អូនជួយពិចារណាមើល ពេលចាក់អញ្ចឹង ពង្រីកដីបានដីកាន់តែធំជាងមុនទៀតដដែលហ្នឹង។ ល្មមៗបានហើយ កុំសម្បើមពេកហ្អី»។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា អ្នកស្រី លាង ហ៊ីម ដែលគេស្គាល់ថា ជាឈ្មួញដីដ៏ល្បីម្នាក់នៅខេត្តកោះកុងនោះ គឺពុំទាន់កាយដីចេញអស់នៅឡើយទេរហូតមកដល់ថ្ងៃនេះ ខណៈរដ្ឋបាលខេត្តកោះកុង ទុកពេលឱ្យកាយអាចម៍ដីចេញវិញឱ្យអស់ត្រឹមតែមួយសប្តាហ៍។
មន្ត្រីសិទ្ធិមនុស្សរូបនេះលើកឡើងថា ករណីឈ្មួញដីកាយដីចេញវិញយឺតយ៉ាវនេះ គឺដោយសារកម្សោយនិងការមិនអនុវត្តច្បាប់តឹងរ៉ឹងរបស់អាជ្ញាធរទៅលើជនល្មើសដែលមានលុយមានអំណាច។ លោកបន្ថែមថា អាជ្ញាធរខេត្តហាក់អនុវត្តច្បាប់មានស្តង់ដារពីរ ព្រោះកន្លងមក ប្រសិនជាពលរដ្ឋក្រីក្រទៅរុករានដីព្រៃរបស់រដ្ឋ គឺនឹងមានការចាត់វិធានការច្បាប់តឹងរ៉ឹង ខណៈអ្នកមានលុយមានអំណាច មិនត្រូវបានអនុវត្តបែបនេះឡើយ។
លោកបន្ថែមថា៖ «អាជ្ញាធរហាក់ដូចជាផ្តល់តម្លៃនិងពេលវេលាទៅដល់អ្នកមានលុយមានអំណាចទាំងអស់ហ្នឹង បែរជាមិនយកច្បាប់មកអនុវត្តឱ្យបានតឹងរ៉ឹង ដើម្បីជាការព្រមានទៅដល់អ្នកផ្សេងៗទៀតកុំឱ្យហ៊ានកាប់ទន្ទ្រានឬលបលួចយកដីសាធារណៈរបស់រដ្ឋ និងតំបន់ការពារហ្នឹងទៅធ្វើជាកម្មសិទ្ធិ»។
មេឃុំទួលគគីរ អ្នកស្រី គឹម សុខេម បានទទួលស្គាល់ថា ឈ្នួញដី អ្នកស្រី លាង ហ៊ីម ពិតជាពុំទាន់បានកាយអាចម៍ដីចេញតាមការកំណត់របស់រដ្ឋបាលខេត្តកោះកុងមែន។ មេឃុំរូបនេះឱ្យដឹងថា នៅព្រឹកថ្ងៃនេះ អ្នកស្រីបានហៅអ្នកចាក់លុបព្រៃកោងកាងនោះ ដើម្បីណែនាំហើយ។
អ្នកស្រីអះអាងថា មូលហេតុដែលយឺតយ៉ាវនោះ ដោយសារគ្រឿងចក្រខូច ហើយបានសុំពន្យារពេលពីរបីថ្ងៃទៀត។
អ្នកស្រីបន្ថែមថា៖ «គាត់កាយចេញតើ! ប៉ុន្តែឥលូវហ្នឹងគ្រឿងចក្រវាខូច ឥលូវគេយកទៅធ្វើហើយ ហើយស្អែកនេះគាត់មកកាយហើយ ខ្ញុំហៅគាត់មកជួបថ្ងៃមិញនេះ គាត់សុំពន្យារពេលពីរបីថ្ងៃទៀត»។
វីអូឌី មិនអាចសុំការឆ្លើយតបពីអ្នកស្រី លាង ហ៊ីម ដែលរងការចោទប្រកាន់ថាបានចាក់ដីចូលមាត់ព្រែកនិងលុបដីលើព្រៃកោងកាងបានទេ នៅថ្ងៃនេះ។
ពាក់ព័ន្ធករណីនេះ អភិបាលរងខេត្តកោះកុង លោក សុខ សុទ្ធី ធ្លាប់ប្រាប់វីអូឌីថា អ្នកស្រី លាង ហ៊ីម បានចាក់ដីលុបមាត់ព្រែកនិងព្រៃកោងកាង ទំហំប្រហែល៣ ៣០២ម៉ែត្រការ៉េ។ លោកថា ក្រោយទទួលព័ត៌មាននេះ រដ្ឋបាលខេត្តបានតម្រូវឱ្យកាយដីចេញ និងស្តារព្រៃកោងកាងឡើងវិញផងដែរ។
ក្នុងពិធីបុណ្យសមុទ្រលើកទី៨ នៅខេត្តកំពត កាលពីខែធ្នូ ឆ្នាំ២០១៩ លោកនាយករដ្ឋមន្រ្តី ហ៊ុន សែន បានថ្លែងថា កម្ពុជាត្រូវការពារឆ្នេរសមុទ្រឱ្យបានគង់វង្ស ដោយមិនត្រូវឱ្យមានការចាក់ដីចូលសមុទ្រឬការកាប់ព្រៃកោងកាង ដើម្បីទន្ទ្រានយកដីនោះឡើយ៕
