អ្នកសារព័ត៌មាន២រូបនៅខេត្តសៀមរាប ត្រូវបានមនុស្សជិត១០នាក់វាយតប់ពេលដែលពួកគេចុះយកព័ត៌មាននៅទីតាំងមួយកន្លែងដែលពលរដ្ឋអះអាងថា ជាទីតាំងលេងល្បែងស៊ីសង។
ប្រធានមន្ទីរព័ត៌មានខេត្តសៀមរាប លោក លីវ សុខុន បានមានប្រសាសន៍នៅថ្ងៃពុធម្សិលមិញថា កាលពីថ្ងៃទី២៩ ខែមីនា ឆ្នាំ២០២១ ក្រុមអ្នកសារព័ត៌មានចំនួនបីនាក់បានចុះទៅយកព័ត៌មាននិងផ្តិតយករូបភាពនៅទីតាំងមួយកន្លែង ស្ថិតនៅក្នុងឃុំខ្នារពោធិ៍ ស្រុកសូទ្រនិគម ក្រោយពីទទួលព័ត៌មានពីប្រជាពលរដ្ឋថា ទីតាំងនោះមានគេលេងល្បែងស៊ីសង។
លោកបន្តថា នៅពេលចុះយកព័ត៌មាននោះ អ្នកសារព័ត៌មានម្នាក់នៅចាំរថយន្ត ចំណែកពីរនាក់ទៀត ក្នុងនោះមានលោក ឈិត សាវី អ្នកសារព័ត៌មានទូរទស្សន៍ BTV និងលោក ប្រាក់ សុខឡេង ជាអ្នកសារព័ត៌មានរបស់គេហទំព័រសារព័ត៌មានរំដោះជាតិ បានចូលទៅកន្លែងកើតហេតុដោយផ្ទាល់ ហើយក៏ត្រូវជនមិនស្គាល់មុខប្រមាណ៧ទៅ៨នាក់បានវាយទៅលើពួកគេ និងបានយកកាមេរ៉ារបស់អ្នកយកព័ត៌មាន BTV។
លោក លីវ សុខុន មានប្រសាសន៍ថា៖ «គ្រាន់តែប្រតាយប្រតប់គ្នា ដៃនិងដៃ វាមិនមាន [របួសធ្ងន់ធ្ងរ] នេះទេ ហើយនិងការប្រតាយប្រតប់គ្នាហ្នឹង មិនកៀកកិតគ្នាខ្លាំងដែរ គ្រាន់តែ! គ្រាន់តែខាងនោះគេមក យើងអ្នកសារព័ត៌មានបោះដៃការពារខ្លួនអញ្ចឹង។ សំខាន់គេចូលវាយ យើងមិនបានប្រុងប្រយ័ត្នមុនអញ្ចឹង វាយត្រូវខ្លាំង ប៉ុន្តែមិនមានរបួសស្នាមទេ គ្រាន់ថាកម្លាំងដៃនេះ»។
ពាក់ព័ន្ធនឹងករណីនេះ ស្នងការនគរបាលខេត្តសៀមរាប លោក ទិត្យ ណារ៉ុង បានមានប្រសាសន៍ថា លោកបានទទួលពាក្យបណ្ដឹងរបស់អ្នកសារព័ត៌មានទាំង២រូបនោះហើយ ហើយលោកបានបញ្ជាឱ្យមន្រ្តីជំនាញធ្វើការស៊ើបអង្កេតស្រាវជ្រាវជុំវិញករណីហិង្សានេះ និងស្វែងរកជនបង្កដើម្បីចាត់វិធានការទៅតាមនីតិវិធីច្បាប់។
លោកមានប្រសាសន៍ថា៖ «ខ្ញុំបានទទួលពាក្យបណ្ដឹងពីជនរងគ្រោះហើយ ខ្ញុំកំពុងធ្វើការស្រាវជ្រាវស៊ើបអង្កេត [ខាងមន្ត្រី]ជំនាញកំពុងតែធ្វើការ ស្ថិតនៅក្នុងការស៊ើបអង្កេតស្រាវជ្រាវ គេកំពុងតែធ្វើការហើយ»។
អធិការស្រុកសូទ្រនិគម លោក ទេព ចាន់ណា បានមានប្រសាសន៍ថា បច្ចុប្បន្ននេះ អាជ្ញាធរកំពុងតែកោះហៅអ្នកពាក់ព័ន្ធជុំវិញករណីនេះមកសួរនាំ។
លោកមានប្រសាសន៍ថា៖ «ស៊ើបអង្កេតហើយ ស៊ើបអង្កេត ប៉ុន្តែវាអត់ទាន់ជុំ! បានន័យថាយើងហៅមនុស្សសួរអត់ទាន់អស់។ មិនទាន់បានចាប់ បានចងអី វាកំពុងឆ្លើយដាក់គ្នា»។
ទោះយ៉ាងណា អ្នកសារព័ត៌មានទូរទស្សន៍ BTV លោក ឈិត សាវី បានបដិសេធអត្ថាធិប្បាយជុំវិញករណីនេះ ខណៈអ្នកសារព័ត៌មានដែលជាជនរងគ្រោះមួយរូបទៀត លោក ប្រាក់ សុខឡេង ពុំអាចទាក់ទងសុំការអត្ថាធិប្បាយបាន។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី បានជំរុញដល់អាជ្ញាធរមានចំណាត់ការទៅលើជនបង្កយកមកផ្តន្ទាទោសតាមច្បាប់ ដើម្បីបញ្ចប់បទល្មើសទៅលើអ្នកសារព័ត៌មាន ខណៈលោកសង្កេតឃើញថា ជនល្មើសដែលបានវាយដំអ្នកសារព័ត៌មាន ជាទូទៅមិនត្រូវបានអាជ្ញាធរមូលដ្ឋានចាប់យកមកផ្ដន្ទាទោសឡើយ។
លោកមានប្រសាសន៍ថា៖ «អាជ្ញាធរគួរតែធានាយុត្តិធម៌ ឬការបង្រ្កាបទៅលើជនដែលប្រព្រឹត្តបទល្មើស ការវាយដំដែលប្រព្រឹត្តបទល្មើសព្រហ្មទណ្ឌ ត្រូវធានាថា ពួកគេត្រូវចាប់មកផ្ដន្ទាទោស។ ការធ្វើដូច្នេះ គឺវាអាចឈានទៅបញ្ចប់ការប្រព្រឹត្តបទល្មើសមកលើអ្នកសារព័ត៌មាន ឬមួយក៏បញ្ចប់និទណ្ឌភាពប្រឆាំងជាមួយនឹងអ្នកប្រព្រឹត្តបទល្មើសមកលើអ្នកសារព័ត៌មានហ្នឹងបាន»។
គួរបញ្ជាក់ថា កាលពីយប់រំលងអធ្រាត្រថ្ងៃទី១៣ ឈានចូលថ្ងៃទី១៤ ខែមីនា ឆ្នាំ២០២១ ចាងហ្វាងកាសែតអាណាចក្រខ្មែរ លោក ប្រន ស៊ាន ក៏ត្រូវបានជនមិនស្គាល់មុខវាយជាច្រើនដំបង បណ្តាលឱ្យរងរបួសធ្ងន់ផងដែរ នៅពេលដែលលោកកំពុងសម្រាន្តលង់លក់ នៅចំណុចមុខប្រាសាទបេងមាលា ក្នុងស្រុកស្វាយលើ ខេត្តសៀមរាប ក្រោយពីលោកត្រឡប់មកពីយកព័ត៌មាននៅស្រុកគូលេន ខេត្តព្រះវិហារ៕