សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) អំពាវនាវដល់បណ្តាអ្នកសារព័ត៌មាន និងអ្នកប្រើប្រាស់ បណ្តាញសង្គមទាំងអស់ រួមគ្នាពង្រឹងក្រមសីលធម៌ក្នុងការផ្សព្វផ្សាយព័ត៌មាន ដោយកុំផ្សាយព័ត៌មានក្លែងក្លាយ ជាពិសេសពាក់ព័ន្ធជំងឺកូវីដ-១៩ ដែលនាំឱ្យអាប់អួក្នុងសង្គម បង្កើតឱ្យមានទោសខ្លួនឯង។
ក្នុងសេចក្តីអំពាវនាវរបស់ ស.ស.ស.ក បានឱ្យដឹងនៅថ្ងៃនេះថា នាពេលបច្ចុប្បន្ននេះ សម្រាប់ប្រទេសកម្ពុជា ក៏ដូចជាពិភពលោកទាំងមូលដែរ គឺត្រូវការការចូលរួមផ្សព្វផ្សាយបញ្ជ្រាបការយល់ដឹង ដើម្បីទប់ស្កាត់ការឆ្លងរីករាលដាលជំងឺកូវីដ-១៩។
ករណីនេះ (ស.ស.ស.ក) អំពាវនាវដល់អ្នកសារព័ត៌មាន រួមទាំងអ្នកប្រើប្រាស់បណ្តាញសង្គម ចូលរួមដោយមនសិការ ចៀសវាងឆក់ឱកាសនៅក្នុងគ្រាលំបាកនេះបង្កើតនិងផ្សព្វផ្សាយព័ត៌មានក្លែងក្លាយនិងព័ត៌មានបំពុល ដែលនាំឱ្យមានការយល់ខុស បង្កើតទោសកំហុសឱ្យខ្លួនឯង និងបង្កើតភាពអាប់អួក្នុងសង្គម។
ស.ស.ស.ក បញ្ជាក់ថា ថ្មីៗនេះមានការបង្កើតព័ត៌មានក្លែងក្លាយតាមរយៈបណ្តាញសង្គម Facebook, YouTube, និង Tik Tok ដែលកំពុងកើនឡើង រហូតក្រសួងព័ត៌មានសម្រេចលុបអាជ្ញាបណ្ណអង្គភាពសារព័ត៌មានមួយចំនួន ដែលប្រើប្រាស់ខុសវិជ្ជាជីវៈ ជាដើម។
សេចក្តីអំពាវនាវបញ្ជាក់ដូច្នេះថា៖ «ពិតណាស់ ពហុមតិ គឺជាសួនច្បារនៃប្រជាធិបតេយ្យ។ ក៏ប៉ុន្តែបើពហុមតិពោរពេញដោយការប្រមាថ ការបំភ្លៃ និងការបំពុល នោះគឺជាទង្វើដែលនាំឱ្យអាប់ឱនដល់កិត្តិយស សេចក្តីថ្លៃថ្នូររបស់ប្រជាជាតិ និងជាមេរោគសង្គមទៅវិញទេ»។
សេចក្តីអំពាវនាវបន្តថា៖ «បញ្ហាប្រើប្រាស់សិទ្ធិសេរីភាពហួសព្រំដែនប៉ាតណាប៉ាតណី ខ្វះការទទួលខុសត្រូវនិងគ្មានសុជីវធម៌ ភាសាប្រមាថចំពោះអ្នកចាក់វ៉ាក់សាំងថាជាសត្វត្រូវគេពិសោធ និងការប្រឌិតព័ត៌មានចំពោះអ្នកស្លាប់ថា ស្លាប់ដោយសារការចាក់វ៉ាក់សាំង នេះគឺជាទង្វើអសីលធម៌អាក្រក់ហួសហេតុ»។
ស.ស.ស.ក បន្ថែមថា អ្នកសារព័ត៌មានត្រូវមានក្រមសីលធម៌វិជ្ជាជីវៈ ការពិតត្រឹមត្រូវ មានតុល្យភាព និងអាចផ្ទៀងផ្ទាត់បាន និងមិនត្រូវបញ្ចេញមតិគំនិតយោបល់ហួសហេតុ ដែលនាំឱ្យមានគ្រោះថ្នាក់ដល់សង្គមនិងខ្លួនឯង។
កាលពីថ្ងៃទី១៨ ខែមីនា ឆ្នាំ២០២១នេះ ក្រសួងព័ត៌មានបានសម្រេចលុបប្រកាសលេខ ៣៣៦ ព.ម ក្រប ចុះថ្ងៃទី២៨ ខែកញ្ញា ឆ្នាំ២០១៨ របស់ខ្លួនដែលអនុញ្ញាតឱ្យលោក ផែង វណ្ណៈ បើកដំណើរការអាជីវកម្មគេហទំព័រឈ្មោះ «www.phengvannaknews.com»។ ក្រសួងបានបញ្ជាក់ក្នុងប្រកាសដដែលថា ម្ចាស់អាជ្ញាបណ្ណបានជេរប្រមាថព្រះសង្ឃ ធ្វើឱ្យប៉ះពាល់យ៉ាងធ្ងន់ធ្ងរលើវិស័យព្រះពុទ្ធសាសនាដែលជាសាសនារបស់រដ្ឋ ហើយជាការបំពានធ្ងន់ធ្ងរលើវិជ្ជាជីវៈនិងកិច្ចសន្យាអាជីវកម្មដែលសាម៉ីខ្លួនបានតម្កល់ទុកនៅក្រសួង។
ក្រោយមក នៅថ្ងៃទី២៦ ខែមីនា ឆ្នាំ២០២១ ក្រសួងព័ត៌មានបានសម្រេចលុបអាជ្ញាបណ្ណសារព័ត៌មានចំនួន២ទៀត រួមមាន កាសែតឈ្មោះ «យុវជនតេជោ» និងគេហទំព័រឈ្មោះ ស្ទឹងច្រាលប៉ុស្តិ៍ «www.Stengchralpost.com» ដែលបានផ្សព្វផ្សាយព័ត៌មានបំភ្លៃការពិត បំពុលសង្គម បង្កឱ្យមានភាពច្របូកច្របល់ ដែលជាការបំពានយ៉ាងធ្ងន់ធ្ងរលើវិជ្ជាជីវៈនៃច្បាប់ស្តីពីរបបសារព័ត៌មាន និងកិច្ចសន្យាអាជីវកម្មដែលសាម៉ីខ្លួនដាក់តម្កល់នៅក្រសួងព័ត៌មាន។
កាលពីពេលថ្មីៗនេះក៏មានម្ចាស់គណនី Tik Tok ដែលមានឈ្មោះ «Rachana BK» បានបង្ហោះវីដេអូមានខ្លឹមសារជាសំឡេងថា «ភ្នំពេញ គេអាចបិទច្រកយប់ហ្នឹង គេប្រកាសអាសន្នបិទច្រកលែងឱ្យចូលភ្នំពេញ» ត្រូវបានអគ្គស្នងការដ្ឋាននគរបាលជាតិ ហៅមកសួរនាំ និងធ្វើកិច្ចសន្យាឱ្យត្រឡប់ទៅផ្ទះវិញផងដែរ៕
