រដ្ឋាភិបាលបានឱ្យដឹងថា ទំហំពាណិជ្ជកម្មរបស់កម្ពុជាកាលពីឆ្នាំ២០២០ នាំចេញទៅក្រៅប្រទេស មានទំហំទឹកប្រាក់ ចំនួន១៧ ២១៥,៣៧លានដុល្លារ ពោលគឺមានការកើនឡើង ១៦,៧២% បើធៀបនឹងរយៈពេលដូចគ្នាកាលពីឆ្នាំ២០១៩។
យោងតាមរបាយការណ៍បូកសរុបលទ្ធផលការងារពាណិជ្ជកម្ម ឆ្នាំ២០២០ និងទិសដៅការងារពាណិជ្ជកម្ម ឆ្នាំ២០២១ របស់ក្រសួងពាណិជ្ជកម្ម បានឱ្យដឹងថា ទំហំពាណិជ្ជកម្មធ្វើឱ្យកម្ពុជាសម្រេចបាន៣៥ ៨០៥,៨៥លានដុល្លារអាមេរិក កើនឡើង ២,៥៤% ដែលក្នុងនោះ ការនាំចេញមានចំនួន១៧ ២១៥,៣៧លានដុល្លារអាមេរិក ពោលមានការកើនឡើង ១៦,៧២% ។
ចំណែកការនាំចូលមាន១៨ ៥៩០,៤៨លានដុល្លារអាមេរិក ពោលគឺមានការថយចុះ ៧,៨៤% បើធៀបនឹងរយៈពេលដូចគ្នាក្នុងឆ្នាំ២០១៩។
របាយការណ៍ដដែលឱ្យដឹងទៀតថា កាលពីឆ្នាំ២០២០ ក្រសួងពាណិជ្ជកម្ម បានផ្ដល់អាជ្ញាបណ្ណនាំចេញ ចំនួន៥៣ច្បាប់ មានទឹកប្រាក់៥ ៣០៧ ៨៥៨,៨៧ដុល្លារអាមេរិក និងពន្យារអាជ្ញាបណ្ណនាំចេញ ចំនួន២៣ច្បាប់ និងផ្ដល់លិខិតជូនដំណឹងទំនិញឆ្លងកាត់ ចំនួន៣៣ច្បាប់ និងផ្ដល់អាជ្ញាបណ្ណនាំចូល ចំនួន១០ច្បាប់ ដែលមានទឹកប្រាក់សរុប១ ២៤១ ២៧៥,៣០ដុល្លារអាមេរិក និងបានពន្យារអាជ្ញាបណ្ណនាំចូល ចំនួន១ច្បាប់។
បន្ថែមពីនេះ ឆ្នាំ២០២០ ក្រសួងពាណិជ្ជកម្ម ក៏បានផ្ដល់លិខិតបញ្ជាក់អំពីការនាំចេញនិងនាំចូលត្បូងពេជ្រដែលមិនទាន់កែច្នៃនិងសល់ពីការកែច្នៃ ហើយក្នុងនោះការនាំចូលមានចំនួន២៣ច្បាប់ ដែលមានទឹកប្រាក់ចំនួន២៣ ៨៩៩ ០៦៤,៧០ដុល្លារអាមេរិក រួមទាំងការនាំចេញមានចំនួន២២ច្បាប់ សរុបជាទឹកប្រាក់១៩ ៨២១ ៩៦៦,០៧ដុល្លារអាមេរិក ផងដែរ៕
