កម្លាំងជំនាញរបស់ទាហានជើងទឹកសមុទ្ររាម កំពុងស្វែងរកមនុស្ស២នាក់ដែលបាត់ខ្លួន និងមានមនុស្ស៤នាក់ទៀតបានរងរបួស ក្នុងហេតុការណ៍ឆេះអូប័រមួយគ្រឿងនៅលើផ្ទៃសមុទ្រ ខេត្តព្រះសីហនុ។
អ្នកនាំពាក្យក្រសួងការពារជាតិ លោក ឈុំ សុជាតិ ប្រាប់ VOD នៅថ្ងៃអង្គារនេះថា កាលពីម្សិលមិញ អូប័រមួយគ្រឿងរបស់កងទ័ពជើងទឹកមូលដ្ឋានសមុទ្ររាម បានផ្ទុះម៉ាស៊ីនឆេះ នៅពេលមន្ត្រីយោធាចំនួន៦នាក់កំពុងដឹកស្បៀងទៅកាន់កងទ័ពជួរមុខនៅកោះសេះ អំឡុងជួបព្យុះនិងរលកខ្លាំង។
លោកបន្តថា ហេតុការណ៍នេះបានបណ្តាលឱ្យកងកម្លាំង២នាក់នៅលើអូប័រនោះបានបាត់ខ្លួន និង៤នាក់ទៀតរងរបួស ដែលថាមកដល់ពេលនេះ អ្នកបាត់ខ្លួននៅមិនទាន់រកឃើញនៅឡើយ ខណៈអ្នករងរបួសត្រូវបានសង្គ្រោះនិងកំពុងសម្រាកព្យាបាលនៅមន្ទីរពេទ្យ។
លោកបានគូសបញ្ជាក់ថា៖ «ផ្ទុះម៉ាស៊ីនអូប័រ ហើយមនុស្សបាត់ខ្លួនពីរនាក់ គេកំពុងរក ដែលជួបព្យុះ ឥលូវកំពុងរក [អ្នកបាត់ខ្លួនឈ្មោះអីខ្លះដែរ?] អត់ទាន់ដឹងទេ! ខ្ញុំជូនព័ត៌មានបឋមសិន»។
មេបញ្ជាការរងកងទ័ពជើងទឹក និងជាមេបញ្ជាការជួរមុខអគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ លោក ទៀ សុខា មិនទាន់អាចសុំការអត្ថាធិប្បាយបន្ថែមបានទេ ដោយលោកប្រាប់ថា កំពុងជាប់ប្រជុំ៕