អាជីវករមួយចំនួនលក់ដូរនៅផ្សារអូរឫស្សី រាជធានីភ្នំពេញ ស្នើអាជ្ញាធរជាប់ពាក់ព័ន្ធជួយអន្តរាគមន៍ទៅម្ចាស់តូបឱ្យបញ្ចុះតម្លៃជួលតូបរបស់ពួកគេក្នុងអំឡុងពេលបិទផ្សារបណ្ដោះអាសន្ន ក្រោយពេលរកឃើញអាជីវករនិងសន្តិសុខផ្សារជិត៤០នាក់ ឆ្លងជំងឺកូវីដ-១៩។
កាលពីថ្ងៃទី៣ ខែមេសា ឆ្នាំ២០២១ រដ្ឋបាលរាជធានីភ្នំពេញ បានសម្រេចផ្អាកដំណើរការជាបណ្ដោះអាសន្ន មជ្ឈមណ្ឌលពាណិជ្ជកម្មផ្សារអូរឫស្សី រយៈពេល១៤ថ្ងៃ ចាប់ពីថ្ងៃទី៤ ខែមេសា ដល់ថ្ងៃទី១៧ ខែមេសា ឆ្នាំ២០២១ ដើម្បីបង្ការនិងទប់ស្កាត់ការឆ្លងរីករាលដាលវីរុសកូវីដ-១៩ ទៅដល់អាជីវករ អតិថិជន ក៏ដូចជាប្រជាពលរដ្ឋដែលចេញ-ចូលផ្សារនេះ។
ការផ្អាកនេះធ្វើឡើងបន្ទាប់ពីក្រសួងសុខាភិបាលរកឃើញករណីឆ្លងជំងឺកូវីដ-១៩ លើអាជីវករនិងសន្តិសុខមួយចំនួននៅផ្សារអូរឫស្សី កាលពីថ្ងៃទី២ ខែមេសា កន្លងទៅ។
អំឡុងពេលនៃការផ្អាកបណ្ដោះអាសន្ននេះ រដ្ឋបាលរាជធានីភ្នំពេញ ធានារ៉ាប់រងលើការងារសន្តិសុខនិងសុវត្ថិភាពចំពោះសម្ភារនិងអីវ៉ាន់គ្រប់ប្រភេទរបស់អាជីវករដែលបានរក្សាទុកក្នុងតូបនីមួយៗមិនឱ្យមានការបាត់បង់ និងមិនតម្រូវឱ្យមានការបង់ថ្លៃសេវាទៅឱ្យភាគីពាក់ព័ន្ធណាមួយឡើយ។
អ្នកស្រី អឿង ណារី អាយុ៤១ឆ្នាំ ជាអាជីវករលក់គ្រឿងសម្អាងនៅតូបជាន់ផ្ទាល់ដី បានស្នើនៅថ្ងៃអង្គារនេះ ឱ្យមានការបញ្ចុះថ្លៃជួលតូប ដោយសារការបិទផ្សារបណ្តោះអាសន្ននេះបានធ្វើឱ្យចំណូលអ្នកស្រីរងនូវផលប៉ះពាល់ទាំងស្រុង។
អាជីវករដែលមានតូបចំនួន៣ រូបនេះ បានឱ្យដឹងថា តាំងពីមានព្រឹត្តិការណ៍សហគមន៍២០កុម្ភៈមក ម្ចាស់តូបដែលអ្នកស្រីបានជួលចំនួន២ បានបញ្ចុះតម្លៃឱ្យ ១៥%ក្នុងមួយតូប និងតូបមួយទៀតជារបស់អ្នកស្រីផ្ទាល់។
តែយ៉ាងណា អ្នកស្រីបន្តថា ការបញ្ចុះតម្លៃនេះនៅមិនទាន់សមស្របទៅនឹងស្ថានភាពជាក់ស្ដែងនៃការធ្លាក់ចុះចំណូលខ្លាំងនោះ អ្នកស្រីបានស្នើឱ្យមានបញ្ចុះតម្លៃតូបបន្ថែមទៀត។
អ្នកស្រីមានប្រសាសន៍ថា៖ «សំណូមពរម៉្យាង គឺសូមឱ្យប្រធានផ្សារ រដ្ឋាភិបាលអីជួយ ដោយសារខ្ញុំអត់មានចំណូលចូលអីអញ្ចឹង! ខ្ញុំសូមឱ្យខាងគាត់ជួយសំណូមពរដល់ម្ចាស់ទីតាំង ទីកន្លែងអី ដែលគាត់ជួលគេយកលុយពេញៗ ឱ្យគាត់ជួយយកថាធ្វើម៉េចឱ្យបានត្រឹម៥០ភាគរយ ៧០ភាគរយអីទៅ ព្រោះយើងអត់មានចំណូលអីចូលទេ»។
អ្នកស្រី កៅ ផាន់ដារ៉ានី ជាអាជីវករលក់ប្រហិតនៅផ្សារអូរឫស្សីជាន់ផ្ទាល់ដីមួយរូបទៀត បានស្នើឱ្យមានការផ្អាកយកថ្លៃជួលតូបជាបណ្ដោះអាសន្ន រហូតចាំដល់ស្ថានការណ៍ជំងឺកូវីដ-១៩ស្ងប់ស្ងាត់ជាងនេះសិន។
អ្នកស្រីមានប្រសាសន៍ថា៖ «ស្នើឱ្យចុះ [ថ្លៃឈ្នួល] បណ្ដោះអាសន្ន ព្រោះវាអត់មានលក់អីបានទាំងអស់ អត់មានចំណូលអីសោះ សូន្យភាគរយតែម្តង»។
អ្នកស្រីបន្ថែមថា តម្លៃជួលតូបដែលអ្នកស្រីជួលនោះគឺ ២០០ដុល្លារក្នុងមួយខែ ប៉ុន្តែខែមុននេះ ខាងម្ចាស់តូបបានចុះថ្លៃ៥០ដុល្លារ ប៉ុន្តែអ្នកស្រីថា ចំនួនបញ្ចុះតម្លៃនេះមិនបានឆ្លើយតបទៅនឹងអ្វីដែលអ្នកស្រីកំពុងជួបប្រទះនោះទេ។
ប្រធានផ្សារអូរឫស្សី លោក ហ៊ត វ៉ាន់ធី មានប្រសាសន៍ប្រាប់វីអូឌីថា ករណីបញ្ចុះតម្លៃជួលតូបនេះមិនមែនជាសិទ្ធិសម្រេចរបស់លោកទាំងស្រុងនោះឡើយ។ តែយ៉ាងណា លោកថា នឹងពិភាក្សាគ្នាជាមួយភាគីពាក់ព័ន្ធដើម្បីដោះស្រាយជុំវិញករណីនេះ។
លោកមានប្រសាសន៍ថា៖ «រឿងបញ្ចុះតម្លៃ ខ្ញុំមិនមែនអ្នកបញ្ចុះណា! ចាំជជែកគ្នា តែឥលូវផ្សារវាបិទ»។
វីអូឌី មិនអាចសុំការអត្ថាធិប្បាយបន្ថែមពីអភិបាលខណ្ឌ៧មករា លោក លីម សុភា បានទេជុំវិញករណីនេះ ដោយលោកថាជាប់រវល់ប្រជុំ។
ទំព័រហ្វេសប៊ុករបស់ អនុគណៈកម្មការស្រាវជ្រាវជំងឺកូវីដ-១៩ បានឱ្យដឹងនៅថ្ងៃនេះ ថា អ្នកលក់ដូរនៅផ្សារអូរឫស្សីសរុបចំនួន៣៦នាក់ត្រូវបានរកឃើញវិជ្ជមានកូវីដ-១៩។
កាលពីម្សិលមិញនេះ រដ្ឋបាលខណ្ឌ៧មករា ក៏បានអំពាវនាវឱ្យអាជីវករដែលប្រកបអាជីវកម្មនៅផ្សារអូរឫស្សីទាំងអស់ទៅពិនិត្យយកសំណាករកមេរោគកូវីដ-១៩ នៅវិទ្យាល័យបាក់ទូក ឱ្យបានគ្រប់ៗគ្នា។
ក្នុងករណីដែលអាជ្ញាធរពិនិត្យឃើញថា មានករណីខកខានឬគេចវេះមិនបានទៅយកសំណាក អាជ្ញាធរមិនអនុញ្ញាតឱ្យអាជីវករដែលមិនបានទៅយកសំណាករកមេរោគកូវីដ-១៩ ទាំងនោះចូលប្រកបអាជីវកម្មលក់ដូរនៅពេលដែលផ្សារបើកដំណើរការឡើងវិញឡើយ។
ជាមួយគ្នានេះ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឱ្យប្រជាពលរដ្ឋដែលចេញចូលផ្សារអូរឫស្សីនេះ ជាប្រចាំឬញឹកញាប់ទាំងអស់ដែលមានរោគសញ្ញាសង្ស័យ ត្រូវប្រញាប់ទៅធ្វើតេស្តរកមេរោគកូវីដ-១៩ ដែលមានទីតាំងនៅ វិទ្យាល័យបាក់ទូក វិទ្យាល័យបឹងត្របែក មណ្ឌលសុខភាពចាក់អង្រែក្រោម មន្ទីរពេទ្យខ្មែរ-សូវៀត សាលាបឋមសិក្សា សុភមង្គល ដែលមានទីតាំងក្រោយផ្សារស៊ិនជូរី និង មន្ទីរពេទ្យបង្អែកនៅតាមបណ្តាខេត្តនានា។ សម្រាប់អ្នកដែលគ្មានរោគសញ្ញា ត្រូវដាក់ខ្លួនដាច់ដោយឡែកនិងតាមដានសុខភាពរបស់ខ្លួនរយៈពេល១៤ថ្ងៃចាប់ពីថ្ងៃដែលអ្នកបានប៉ះពាល់ឬបានទៅផ្សារអូរឫស្សីនេះ៕
កែតម្រូវ៖ វីអូឌី សូមធ្វើការកែតម្រូវកថាខណ្ឌទី៦៖ «អាជីវករដែលមានតូបចំនួន៣រូបនេះ បានឱ្យដឹងថា តាំងពីមានព្រឹត្តិការណ៍សហគមន៍២០កុម្ភៈមក ម្ចាស់តូបបានបញ្ចុះតម្លៃតូបចំនួន២ ចំនួន១៥%ក្នុងមួយតូប និងមួយទៀតត្រូវបង់ថ្លៃពេញដដែល»។ ខ្លឹមសារដែលត្រឹមត្រូវគឺ «អាជីវករដែលមានតូបចំនួន៣រូបនេះ បានឱ្យដឹងថា តាំងពីមានព្រឹត្តិការណ៍សហគមន៍២០កុម្ភៈមក ម្ចាស់តូបដែលអ្នកស្រីបានជួលចំនួន២ បានបញ្ចុះតម្លៃឱ្យ១៥%ក្នុងមួយតូប និងតូបមួយទៀតជារបស់អ្នកស្រីផ្ទាល់»។
