ប្រជាកសិករមួយចំនួននៅស្រុកបរិបូណ៌ ខេត្តកំពង់ឆ្នាំង ផ្អាកបេះល្ពៅរបស់ពួកគាត់ជាបណ្តោះសន្ន ដោយសារតម្លៃធ្លាក់ចុះមកនៅត្រឹម១៥០រៀលក្នុងមួយគីឡូ ខណៈមន្ត្រីកសិកម្មថា បញ្ហានេះកើតឡើងដោយសារជំងឺកូវីដ-១៩។
ប្រជាកសិករម្នាក់នៅឃុំត្រពាំងចាន់ ស្រុកបរិបូណ៌ អ្នកស្រី សាន សុភ័ណ្ឌ ប្រាប់វីអូឌីថា នៅថ្ងៃទី៨ ខែមេសានេះ ល្ពៅបានធ្លាក់តម្លៃមកនៅត្រឹមតែ១៥០រៀលប៉ុណ្ណោះក្នុងមួយគីឡូក្រាម។ អ្នកស្រីថា គ្រួសារអ្នកស្រីនិងពលរដ្ឋមួយចំនួនបានផ្អាកបេះល្ពៅលក់ហើយ ដោយសារតែតម្លៃថោកពេក មិនអាចទូរទាត់លើការចំណាយ ដូចជា ជួលកម្មករបេះ ដឹកជញ្ជូន ថ្លៃប្រេងបូមទឹក និងថ្នាំផ្សេងៗទៀត។
អ្នកស្រីបន្ថែមថា៖ «ឥលូវតម្លៃ១៥០រៀលទេ។ មានតែចុះថែម គ្មានទីផ្សារ។ គេថា គេបិទផ្លូវទូទាំងប្រទេស។ គេថា យកទៅលក់នៅណារួច! ហើយយើងកសិករម៉េចដឹងថាគេយកទៅលក់នៅណា»។
កសិករម្នាក់ទៀត អ្នកស្រី ឃឿន សុឃា និយាយថា ដំបូងឡើយ ល្ពៅ១គីឡូក្រាមតម្លៃ៧០០រៀល ហើយបានធ្លាក់មកនៅដល់តម្លៃ១៥០រៀលក្នុងមួយគីឡូក្រាម។ អ្នកស្រីថា គ្រួសារអ្នកស្រីបានខ្ចីលុយគេប្រហែល១០លាន ដើម្បីធ្វើដើមទុនដាំល្ពៅនៅឆ្នាំនេះ ដោយអ្នកស្រីសង្សឹមថា ផលល្ពៅនៅឆ្នាំនេះនឹងមានតម្លៃខ្ពស់ជាងឆ្នាំមុន។
អ្នកស្រីបន្ថែមថា៖ «ឈប់បេះលក់ហើយ ទុកបបរបាយជ្រូក ទុកឱ្យគេស៊ីល្អជាង។ ចុះបើ១៥០រៀល យើងលក់ម៉េចកើត។ គេអត់យករបស់[ល្ពៅ]យើង ហើយខាងវៀតណាម គេយក តែយកក្នុងតម្លៃថោក»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង លោក ងិន ហ៊ុន មានប្រសាសន៍ថា មន្ទីរកសិកម្មខេត្តបានព្យាយាមរកទីផ្សារ ដើម្បីមកជួយទិញល្ពៅនិងដំណាំផ្សេងៗរបស់កសិករដែរ ប៉ុន្តែលោកថា រកមិនបាន ដោយសារបញ្ហាជំងឺកូវីដ-១៩ គ្មានអ្នកដើរផ្សារ។ យ៉ាងណា លោកថា បញ្ហាដំណាំល្ពៅមិនមែនជាបញ្ហាទៀតទេ ដោយសារដំណាំមួយនេះមានតែមួយរយៈពេលខ្លី ហើយកសិករដាំក្នុងទំហំដីប្រហែល៧០ទៅ៨០ហិកតាប៉ុណ្ណោះ សម្រាប់អ្នកខេត្តកំពង់ឆ្នាំង។
លោកបន្ថែមថា៖ «ចុះឱ្យយើងធ្វើម៉េច បើបញ្ហាសកលលោកវាអញ្ចឹង! បើទីផ្សារ គេមិនត្រូវវា។ នៅកំពង់ឆ្នាំង បញ្ហាបន្លែត្រីសាច់មិនមានបញ្ហាទេ។ បញ្ហាតែល្ពៅមួយនេះឯង»។
វីអូឌី មិនអាចសុំការឆ្លើយតបពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងអ្នកនាំពាក្យក្រសួងបានទេពាក់ព័ន្ធករណីនេះ ដោយទូរសព្ទចូលច្រើនដងគ្មានអ្នកទទួល។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន ធ្លាប់ប្រាប់វីអូឌីថា ផលដំណាំរបស់កសិករចុះថោកឬធ្លាក់ថ្លៃ មិនមែនទើបតែកើតឡើងអំឡុងវិបត្តិជំងឺកូវីដ-១៩នេះទេ។ លោកថា ជារៀលរាល់ឆ្នាំ ឱ្យតែដល់រដូវកសិករប្រមូលផលដំណាំកសិកម្មអ្វីមួយដែលកសិករផលិតបានច្រើនគួរសម គឺតម្លៃផលដំណាំនោះតែងតែចុះថោកជានិច្ច។
លោក ថេង សាវឿន ជំរុញឱ្យរដ្ឋាភិបាលដោះស្រាយនិងរកវិធីសាស្ត្រដើម្បីជួយដល់ប្រជាពលរដ្ឋ ដើម្បីកុំឱ្យពួកគាត់ត្រូវជួបបញ្ហាប្រឈមរបៀបនេះម្តងហើយម្តងទៀត។
រដ្ឋធម្មនុញ្ញកម្ពុជាមាត្រា៦១, ៦២ និង៦៣ បានចែងថា រដ្ឋត្រូវជំរុញការអភិវឌ្ឍសេដ្ឋកិច្ចគ្រប់វិស័យ ជាពិសេសវិស័យកសិកម្ម សិប្បកម្ម ឧស្សាហកម្ម ចាប់ពីតំបន់ដាច់ស្រយាល ដោយយកចិត្តទុកដាក់ទៅលើនយោបាយទឹក ភ្លើង ផ្លូវ និង មធ្យោបាយដឹកជញ្ជូន បច្ចេកទេសទំនើប និងប្រព័ន្ធឥណទាន។ លើសពីនេះ រដ្ឋត្រូវយកចិត្តទុកដាក់ជួយដោះស្រាយមធ្យោបាយផលិត ការពារថ្លៃផលិតផលជូនកសិករ និងជួយរកទីផ្សារលក់ផលិតផល ដើម្បីជួយឱ្យជីវភាពរស់នៅរបស់ប្រជាពលរដ្ឋមានកម្រិតសមរម្យ៕
