ក្រសួងទេសចរណ៍ ណែនាំដល់មន្ទីរទេសចរណ៍ទាំងអស់សហការជាមួយអាជ្ញាធរ បិទរមណីយដ្ឋានទេសចរណ៍នៅទូទាំងប្រទេសជាបណ្ដោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
យោងតាមលិខិតរបស់រដ្ឋមន្ត្រីក្រសួងទេសចរណ៍ ផ្ញើទៅប្រធានមន្ទីរទេសចរណ៍រាជធានី-ខេត្ត កាលពីថ្ងៃម្សិលមិញ បានលើកឡើងថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ក្រសួងណែនាំដល់មន្ទីរទេសចរណ៍រាជធានី-ខេត្ត សហការជាមួយរដ្ឋបាលរាជធានី-ខេត្ត និងអាជ្ញាធរមូលដ្ឋាន ត្រូវធ្វើការហាមឃាត់ការធ្វើដំណើរ និងការបិទរមណីយដ្ឋានទេសចរណ៍ គោលដៅទេសចរណ៍ សហគមន៍ទេសចរណ៍ និងកន្លែងដែលមានសក្ដានុពលទេសចរណ៍ទូទាំងប្រទេសជាបណ្ដោះអាសន្ន រយៈពេល១៤ថ្ងៃ ចាប់ពីថ្ងៃទី៧ ដល់ថ្ងៃទី២០ ខែមេសា ឆ្នាំ២០២១ ជាកំហិត។
ទន្ទឹមនឹងនេះ ក្រសួងក៏បានជំរុញឱ្យមន្ទីរទេសចរណ៍ទាំងអស់ត្រូវចាត់តាំងក្រុមការងារ ដើម្បីតាមដានត្រួតពិនិត្យការងារនេះឱ្យបានម៉ត់ចត់ ដោយមិនត្រូវអនុញ្ញាតឱ្យមានសកម្មភាពទេសចរណ៍ណាមួយដំណើរការនៅក្នុងមូលដ្ឋានរបស់ខ្លួន ក្នុងអំឡុងពេលនេះឡើយ។
ពាក់ព័ន្ធនឹងករណីនេះដែរ អាជ្ញាធរជាតិអប្សារា និងគ្រឹះស្ថានអង្គរ កាលពីថ្ងៃម្សិលមិញ ក៏បានប្រកាសពីការបិទការចូលទស្សនាប្រាសាទនានា និងផ្អាកការលក់សំបុត្រចូលទស្សនាក្នុងរមណីយដ្ឋានអង្គររយៈពេល១៤ថ្ងៃដែរ គិតចាប់ពីថ្ងៃទី៧ ដល់ថ្ងៃទី២០ ខែមេសា ឆ្នាំ២០២១៕