អាជ្ញាធរប្រយុទ្ធប្រឆាំងគ្រឿងញៀន បានបញ្ជូនស្នងការរងខេត្តកំពត និងគូកន២នាក់ទៀត ទៅសាលាដំបូងរាជធានីភ្នំពេញចាត់វិធានការច្បាប់ បន្ទាប់ពីសមត្ថកិច្ចបានចាប់ឃាត់ខ្លួនពាក់ព័ន្ធនឹងគ្រឿងញៀនជិត២គីឡូនៅរាជធានីភ្នំពេញ។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ ប្រាប់ វីអូឌី នៅថ្ងៃនេះថា ក្រុមការងារប្រយុទ្ធប្រឆាំងគ្រឿងញៀន កាលពីយប់ថ្ងៃទី៦ ខែមេសា បានបង្ក្រាបករណីគ្រឿងញៀនមួយករណីនៅចំណុចចំណតរថយន្តផ្សារខាលែនឌែល ម៉ល (បឹងកក់) ស្ថិតក្នុងសង្កាត់ស្រះចក ខណ្ឌដូនពេញ ដោយបានឃាត់ខ្លួនមនុស្ស៣នាក់ ក្នុងនោះមានលោក អ៊ី ឈួន ជាស្នងការរងខេត្តកំពត ម្នាក់ជាមន្ត្រីនគរបាលប៉ុស្តិ៍ និងម្នាក់ទៀតជាជនស៊ីវិល។
លោកបន្តថា ក្នុងប្រតិបត្តិការបង្ក្រាបគ្រឿងញៀននេះ ក្រុមការងារក៏បានរឹបអូសគ្រឿងញៀនប្រភេទម៉េតំហ្វេតាមីន (ICE) ទម្ងន់ជាង១ ៧៣៨ក្រាម (ស្មើនឹងជិត២គីឡូ) ផងដែរ។
លោក ម៉ក់ ជីតូ បន្តទៀតថា ក្រោយពីមន្ត្រីប្រយុទ្ធប្រឆាំងគ្រឿងញៀន សាកសួរជនសង្ស័យទាំង៣នាក់នោះរួច ក៏បានបញ្ជូនខ្លួនជនសង្ស័យនិងសំណុំរឿងទៅព្រះរាជអាជ្ញាអមសាលាដំបូងរាជធានីភ្នំពេញ ដើម្បីចាត់វិធានការច្បាប់បន្តទៀត កាលពីថ្ងៃទី៧ ខែមេសា ម្សិលមិញនេះ។
លោកមានប្រសាសន៍ថា៖ «ខ្ញុំបញ្ជូនទៅព្រះរាជអាជ្ញាហើយ គេនឹងបន្តធ្វើការងារបន្ថែមទៀត បញ្ជូនទៅកាលពីម្សិលមិញ និងចោទប្រកាន់ពួកគាត់ពីបទរក្សាទុកនិងជួញដូរគ្រឿងញៀនខុសច្បាប់»។
ក្រៅពីនេះ អាជ្ញាធរគ្រឿងញៀន លោក ម៉ក់ ជីតូ បញ្ជាក់ថា សមត្ថកិច្ចកំពុងបន្តស្រាវជ្រាវរកអ្នកពាក់ព័ន្ធបន្ថែមទៀតផងដែរ។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង សុំមិនធ្វើការបកស្រាយលើករណីនេះ ដោយលោកអះអាងថា មិនទាន់ទទួលបានសំណុំរឿងនេះនៅឡើយទេរហូតមកដល់ថ្ងៃនេះ។ លោកបន្តថា នៅពេលទទួលបានព័ត៌មាននេះ លោកនឹងផ្តល់ជូននៅពេលក្រោយ។
ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា ហៅកាត់ថា DARAC លោក មាស សុវណ្ណ ជំរុញទៅតុលាការចាត់វិធានការច្បាប់លើស្នងការរងខេត្តកំពត និងគូកន២នាក់ទៀត ដើម្បីជាគំរូល្អដល់សង្គម និងកុំឱ្យអ្នកដទៃប្រព្រឹត្តបទល្មើសបែបនេះបន្តទៀត។
លោកមានប្រសាសន៍ថា៖ «ថ្នាក់ជាសមត្ថកិច្ច [ប្រព្រឹត្តបទល្មើស] ត្រូវដាក់ទោសឱ្យធ្ងន់ […] ព្រោះដោយសារ [ពួកគេ] ជាអ្នកអនុវត្តច្បាប់ដែរ គឺអ្នកប្រព្រឹត្ត យើងគួរតែដាក់ទោសឱ្យសមហេតុសមផល ដើម្បីកុំឱ្យមន្ត្រីក្រោយៗទៀតអត់ហ៊ាន [ហើយ]គោរពឱ្យបានល្អគ្រប់ៗគ្នាទៅ វាអាចថយចុះ [បទល្មើសថយចុះ] បើមិនអស់រលីង ក៏វាថយចុះច្រើនដែរ»។
មាត្រា៤០ នៃច្បាប់ស្ដីពីការត្រួតពិនិត្យគ្រឿងញៀន ឆ្នាំ២០១២ បញ្ញតិ្តថា «អំពើជួញដូរដោយខុសច្បាប់នូវសារធាតុញៀន» ជាការផ្ដល់សម្រាប់លក់ ការលក់ ការទិញដើម្បីលក់ឬដោះដូរ និងការដោះដូរដោយខុសច្បាប់នូវសារធាតុញៀន ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤ ០០០ ០០០រៀល ទៅ ១០ ០០០ ០០០រៀល។
ប៉ុន្តែបើសិនជាជនល្មើសប្រព្រឹត្តច្រើនដង ឬប្រព្រឹត្តនៅក្នុងក្របខណ្ឌនៃមុខងារ ឬនៅក្នុងឱកាសនៃការបំពេញមុខងារ ឬគ្រឿងញៀននោះ (ហ្វេតាមីន មេតំហ្វេតាមីន) មានបរិមាណសុទ្ធចាប់ពី ១៥ក្រាម រហូតដល់ក្រោម ៨០ក្រាម ត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ និងផ្ដន្ទាទោសពិន័យជាប្រាក់ពី ១០ ០០០ ០០០រៀល ទៅ ២០ ០០០ ០០០រៀល។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងក្នុងកិច្ចប្រជុំថ្នាក់រដ្ឋមន្ត្រីអាស៊ាន កាលពីថ្ងៃទី២៦ ខែវិច្ឆិកា ឆ្នាំ២០២០ ថាគ្រឿងញៀននៅតែជាបញ្ហាក្ដៅគគុក ដែលបង្កផលប៉ះពាល់ដល់សន្តិសុខសង្គម និងជីវភាពប្រជាពលរដ្ឋ។ លោកក៏បានអំពាវនាវដល់ប្រទេសនៅក្នុងតំបន់ សហការគ្នាទប់ស្កាត់ការចរាចរគ្រឿងញៀនឱ្យមានប្រសិទ្ធភាព។
អង្គការសហប្រជាជាតិ លើកឡើងក្នុងរបាយការណ៍មួយកាលពីខែឧសភា ឆ្នាំ២០២០ ថា កម្ពុជាឋិតក្នុងចំណោមប្រទេសអាស៊ានចំនួន៤ ដែលរកឃើញករណីជួញដូរថ្នាំញៀនខុសច្បាប់ច្រើនជាងគេបំផុតក្នុងតំបន់ ខណៈតម្លៃធ្លាក់ចុះកាន់តែទាប តែគុណភាពថ្នាំកាន់តែខ្ពស់៕