ប្រទេសកម្ពុជា កំពុងពិចារណាដាក់ចេញវិធានការធ្វើតេស្តរកកូវីដ-១៩ ក្នុងទ្រង់ទ្រាយធំ បន្ទាប់ពីរកឃើញករណីឆ្លងជំងឺកូវីដ-១៩ កាន់តែកើនឡើងខ្លាំងពីមួយថ្ងៃទៅមួយថ្ងៃ។
របាយការណ៍ក្រសួងសុខាភិបាល បង្ហាញថា កម្ពុជារកឃើញករណីឆ្លងជំងឺកូវីដ-១៩ ជាសហគមន៍៣ ០៧២នាក់ ចាប់តាំងពីថ្ងៃទី២០ ខែកុម្ភៈមក និងបានឆក់យកជីវិតមនុស្សចំនួន២៤នាក់។ កម្ពុជារកឃើញករណីឆ្លងជាចង្កោមថ្មី ចំនួន៥៧៦ករណី កាលពីថ្ងៃម្សិលមិញ។
ឆ្លើយនឹងសំណួរដែលសួរថា តើកម្ពុជាគ្រោងពន្លឿនតេស្តកូវីដ-១៩ និងមានគម្រោងរៀបចំធ្វើតេស្តទ្រង់ទ្រាយធំឬទេ?
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន ឆ្លើយដោយខ្លីថា៖ «គេកំពុងគិតគូរហើយ»។
អ្នកនាំពាក្យរូបនេះមិនប្រាប់លម្អិតពីគម្រោងនេះទេ។
តេស្តទ្រង់ទ្រាយធំនេះជាការធ្វើតេស្ដជាទូទៅលើក្រុមមនុស្សទាំងមានរោគសញ្ញាឬគ្មានរោគសញ្ញា ហើយរស់នៅឬទាក់ទងក្នុងតំបន់ដែលមានការឆ្លងរីករាលដាលខ្លាំងក្លា ដើម្បីឈានដល់ការធ្វើរោគវិនិច្ឆ័យនិងព្យាបាលឱ្យទាន់ពេលវេលា។ កម្មវិធីធ្វើតេស្តទ្រង់ទ្រាយធំនេះ ត្រូវបានអនុវត្តនៅតាមបណ្ដាប្រទេសមួយចំនួនរួចហើយ ដូចជា អូស្ត្រាលី កូរ៉េខាងត្បួង ចិន និងវៀតណាមជាដើម។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា ស្ថានភាពឆ្លងរាលដាលនៃជំងឺកូវីដ-១៩នេះ កាន់តែអាក្រក់ពីមួយថ្ងៃទៅមួយថ្ងៃ ដែលជាប្រការគួរឱ្យបារម្ភ។ លោកស្នើឱ្យរាជរដ្ឋាភិបាលប្រើវិធីសាស្ត្រធ្វើតេស្តទ្រង់ទ្រាយធំកាន់តែឆាប់ ដើម្បីគ្រប់គ្រងស្ថានភាពអាសន្ននេះ។
លោកបានលើកឡើងថា៖ «ជាពេលវេលាមួយដែលគួរតែធ្វើតេស្តទ្រង់ទ្រាយធំហើយ។ តំបន់ណាដែលមានការឆ្លងខ្លាំង គួរតែធ្វើតេស្តទ្រង់ទ្រាយធំ ដើម្បីឱ្យប្រាកដថា មិនមានអ្នកឆ្លងណាមួយនៅក្រៅរង្វង់នៃការគ្រប់គ្រងរបស់ក្រសួងសុខាភិបាល ជារឿងមួយសំខាន់! បើសិនជាបានធ្វើតេស្តទ្រង់ទ្រាយធំនេះ នោះនឹងអាចកំណត់បានថា តំបន់ណាខ្លះមានហានិភ័យខ្ពស់ តំបន់ណាខ្លះមានហានិភ័យទាប»។
ព្រឹត្តិការណ៍ឆ្លងជាសហគមន៍២០កុម្ភៈ ដំបូងឆ្លងក្នុងចំណោមសហគមន៍ជនជាតិចិនក្នុងខារ៉ាអូខេនិងក្លឹបកម្សាន្តមួយកន្លែង រួចបន្តទៅដល់ក្រុមអ្នកធ្វើការនៅបនល្បែងនិងកាស៊ីណូ ឈានចូលទៅដល់សហគមន៍ អាជីវករលក់ដូរក្នុងផ្សារ និងចុងក្រោយឆ្លងរាលដាលចូលក្នុងរោងចក្រ។
បច្ចុប្បន្ន កម្ពុជាអនុវត្តការធ្វើតេស្តទៅលើអ្នកជាប់ពាក់ព័ន្ធនឹងអ្នកជំងឺដែលមានផ្ទុកជំងឺកូវីដ-១៩ ដោយផ្ទាល់។ ប៉ុន្តែការធ្វើតេស្តបានពង្រីកបន្ថែមទៀត ដោយប្រកាសធ្វើតេស្តជាទូទៅលើអ្នកលក់ដូរក្នុងផ្សារ បន្ទាប់ពីមានករណីឆ្លងជំងឺក្នុងផ្សារអូរឫស្សីក្នុងសប្ដាហ៍នេះ៕