កម្មករបម្រើការងារនៅរោងចក្រមួយនៅខណ្ឌមានជ័យ រាជធានីភ្នំពេញ បានត្អូញត្អែរពីការខ្វះខាតលុយកាក់សម្រាប់ចំណាយប្រចាំថ្ងៃ ខណៈរោងចក្រមិនទាន់បើកប្រាក់ឈ្នួលជូនពួកគេ ដោយសារជាប់ធ្វើចត្តាឡីស័ក។
កម្មករប្រមាណ ២ ៨០០នាក់ របស់រោងចក្រ ឌីន ហាន ស្ថិតក្នុងភូមិថ្មី សង្កាត់ស្ទឹងមានជ័យ ត្រូវបានយកសំណាកទៅធ្វើតេស្តរកជំងឺកូវីដ-១៩ និងតម្រូវឱ្យកម្មករទាំងនោះធ្វើចត្តាឡីស័កនៅផ្ទះឬតាមមណ្ឌលចត្តាឡីស័កផ្សេងៗ ក្រោយកម្មកររោងចក្រនេះជាង៥០នាក់បានឆ្លងជំងឺកូវីដ-១៩។
កម្មករផ្នែកអគ្គិសនីម្នាក់នៅរោងចក្រ ឌីន ហាន លោក ស្តើង ស៊ាង ប្រាប់ វីអូឌី នៅថ្ងៃចន្ទនេះថា ជារៀងរាល់ខែ រោងចក្រ ឌីន ហាន ត្រូវបើកប្រាក់ឈ្នួលជូនកម្មករ នៅថ្ងៃទី១០នៃខែនីមួយៗ ប៉ុន្តែលោកថា ដោយសារតែរោងចក្រមួយនេះផ្ទុះករណីឆ្លងជំងឺកូវីដ-១៩ ទើបរហូតមកដល់ថ្ងៃទី១២ ខែមេសានេះ ថៅកែមិនបានបើកប្រាក់ឈ្នួលជូនកម្មករនៅឡើយទេ។
លោកបន្តថា រូបលោកនិងកម្មករចំនួនទៀតកំពុងប្រឈមនឹងការខ្វះខាតលើការចំណាយថ្លៃអាហារប្រចាំថ្ងៃ និងការចំណាយផ្សេងៗក្នុងអំឡុងពេលធ្វើចត្តាឡីស័កនេះ។
លោកបន្ថែមថា៖ «ផលលំបាករបស់យើង គឺយើងខ្វះខាតលុយសម្រាប់ចំណាយលើការទិញរបស់របរសម្រាប់ហូបចុក។ ម្សិលមិញនេះ បានខាងអាជ្ញាធរនៅភូមិនៅសង្កាត់ហ្នឹង គេបានយកអំណោយមកចែកជូនដល់ពួកយើង ហើយបានជួយរួចមួយគ្រាដែរ»។
កម្មការិនីផ្នែកដេរនៅរោងចក្រ ឌីន ហាន អ្នកស្រី យ៉ុន ផល្លី និយាយថា អ្នកស្រីបានជាប់ធ្វើចត្តាឡីស័កនៅបន្ទប់ជួលតែម្នាក់ឯងតាំងពីថ្ងៃម្សិលមិញ ដោយពុំមានអង្ករនិងលុយសម្រាប់ចាយវាយនោះទេ ខណៈរោងចក្រក៏មិនទាន់បើកប្រាក់ឈ្នួលជូនកម្មករនៅឡើយ។
កម្មការិនីរូបនេះឱ្យដឹងថា នៅព្រឹកមិញនេះ អាជ្ញាធរមូលដ្ឋានបានយកអំណោយខ្លះ មានមី ត្រីខ និងអង្ករ ឱ្យអ្នកស្រីនិងកម្មករមួយចំនួនសម្រាប់ដោះទាល់ពេលកំពុងធ្វើចត្តាឡីស័កនេះ។
អ្នកស្រីបន្ថែមថា៖ «មិនដឹងថា គេឱ្យយើងនៅដាច់ដោយឡែកទេ ហើយណាមួយកៀកថ្ងៃបើកលុយទៀត មិនបានត្រៀមលុយទុកចាយទេ។ ដោយសារតែខ្ញុំអត់ខ្លាំង អ្នកធ្វើការជាមួយខ្ញុំហ្នឹង គេបានថតកាតខ្ញុំយកទៅផុស ហើយបានអាជ្ញាធរហ្នឹងគេយកអង្ករមកឱ្យ។ តែរឿងលុយវិញ គាត់ថា ចាំវគ្គក្រោយ»។
បុគ្គលិកផ្នែករដ្ឋបាលរោងចក្រ ឌីន ហាន ឈ្មោះ លីន ប្រាប់វីអូឌីថា ថៅកែមិនចង់យឺតយ៉ាវក្នុងការបើកប្រាក់ឈ្នួលជូនកម្មករនោះទេ ប៉ុន្តែដោយសារពេលនេះទាំងបុគ្គលនិងកម្មកររបស់រោងចក្រស្ទើរទាំងអស់បានជាប់ធ្វើចត្តាឡីស័ក ដែលធ្វើឱ្យភាគីរោងចក្រពិបាកក្នុងការបើកប្រាក់ឈ្នួលនេះជូនកម្មករ។ យ៉ាងណា លោកថា ភាគីរោងចក្រកំពុងដំណើរការរៀបចំបើកប្រាក់ឈ្នួលជូនកម្មករតាមរយៈវីង។
លោកបន្ថែមថា៖ «បើអ្នកណាអាចចេញក្រៅបើកបាន យើងនឹងវេរ[លុយ]ឱ្យគាត់។ មុននឹងវេរ យើងបញ្ជាក់លេខទូរសព្ទជាមួយគាត់។ បើគាត់ចេញក្រៅបើកអត់បាន ឱ្យយើងធ្វើម៉េច! មានអ្នកខ្លះគាត់ថា ចាំចូលធ្វើការងារវិញចាំបើកឱ្យគាត់ក៏បាន គាត់អត់ខ្វល់រឿងលុយទេពេលនេះ គាត់អាចឱ្យម៉ែឪគាត់ផ្ញើមកឱ្យចាយបណ្តោះអាសន្នក៏បាន ក្នុងកាលទេសៈនេះ យើងគួរធ្វើម៉េច យើងបន្ទោសអ្នកណា»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេពាក់ព័ន្ធករណីនេះ។
ក្នុងពិធីថ្លែងសារពិសេសមួយនៅថ្ងៃទី១០ ខែមេសា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានបញ្ជាក់ថា រដ្ឋាភិបាលនឹងផ្តល់ការឧបត្ថម្ភជាប្រាក់ ៣០០ ០០០រៀលក្នុងមួយគ្រួសារ អង្ករ២៥គីឡូ និងមីមួយកេសតូច ក្នុងអំឡុងពេលធ្វើចត្តាឡីស័ក រួមទាំងចេញថ្លៃទឹកនិងអគ្គិសនីរយៈពេល២ខែផងដែរ សម្រាប់ពលរដ្ឋដែលរស់នៅក្នុងភូមិសាស្ត្រដែលអាជ្ញាធរបានបិទ។
លោកនាយករដ្ឋមន្ត្រី បន្ថែមថា ចំពោះគ្រួសារដែលមានសមាជិកស្លាប់ ដោយសារជំងឺកូវីដ-១៩ រដ្ឋនឹងជួយបង់ជំនួសថ្លៃទឹកនិងអគ្គិសនីយ៉ាងតិច៥ខែបន្ថែម និងចំពោះអ្នកដែលសមាជិកឆ្លងជំងឺកូវីដ-១៩ និងធ្វើចត្តាឡីស័ក រដ្ឋជួយចេញថ្លៃទឹកនិងអគ្គិសនីអប្បបរមារយៈពេល៣ខែ៕