អាជីវករ និងប្រជាពលរដ្ឋមួយចំនួនត្អូញត្អែរពីតម្លៃទំនិញឡើងថ្លៃ ក្នុងនោះ បន្លែ សាច់ ឡើងថ្លៃចន្លោះពី១ពាន់រៀល ទៅ៥ពាន់រៀលក្នុង១គីឡូក្រាម ខណៈជំងឺកូវីដ-១៩ កាន់តែរីករាលដាល និងបុណ្យចូលឆ្នាំខ្មែរខិតជិតមកដល់។
អាជីវករលក់សាច់ជ្រូកនៅផ្សារដើមគរ និយាយថា គាត់លក់សាច់ជ្រូកប្រហែលជា១០០គីឡូក្នុងមួយថ្ងៃ ក្នុងនោះ សាច់សុទ្ធមួយគីឡូតម្លៃ ២២ ០០០រៀល សាច់បីជាន់តម្លៃ ២៥ ០០០រៀលក្នុងមួយគីឡូក្រាម បើធៀបកាលពីមួយសប្តាហ៍មុន សាច់ជ្រូកឡើងថ្លៃប្រហែល ៥ ០០០រៀលក្នុងមួយគីឡូក្រាម។
អាជីវកររូបនោះបញ្ជាក់ថា ដើមចមដែលនាំឱ្យសាច់ឡើងថ្លៃ ដោយសារតែវិបត្តិជំងឺកូវីដ-១៩ កំពុងរីករាលដាលខ្លាំង និងស្របពេលបុណ្យចូលឆ្នាំខ្មែរខិតចូលមកដល់។
អាជីវកររូបនោះនិយាយថា៖ «វាឡើងថ្លៃតែម្តង ណាមួយចូលឆ្នាំជិតមកដល់ អត់មានកម្មករនៅកាប់ យើងជួលគេកាប់ វាថ្លៃ។ ហើយយើងយកមកវាថ្លៃដែរ លក់វិញឡើងថ្លៃដែរ បើលក់ថ្លៃគឺថ្លៃទាំងអស់គ្នា មិនមែនលក់ថ្លៃតែយើងម្នាក់ឯងឯណា បើយកមកលក់ថ្លៃម្នាក់ឯងម៉េចកើត»។
អាជីវករលក់សាច់គោនៅផ្សារដើមគរ អ្នកស្រី ប៉ុល ធីលីដា និយាយថា សាច់គោមួយគីឡូតម្លៃ ៤៥ ០០០រៀល បើធៀបជាមួយនឹងមួយសប្តាហ៍មុន តម្លៃសាច់គោឡើង ៥ ០០០រៀលក្នុងមួយគីឡូក្រាម។ អាជីវកររូបនោះបញ្ជាក់ថា គាត់មិនចង់លក់ថ្លៃទេ ប៉ុន្តែគាត់នាំចូលមកពីកន្លែងបោះដុំធំក្នុងតម្លៃថ្លៃដែរ។
អាជីវករនោះនិយាយថា៖ «ផ្សារដើមគរ យើងបោះដុំ ឥលូវ [តម្លៃ]៤៥ ០០០រៀល ពីមុន [តម្លៃ]៤០ ០០០រៀល គេកាប់មក គេបោះឱ្យយើងឡើងថ្លៃ យើងលក់ឡើងថ្លៃដែរ»។
អង្គុយលក់បន្លែនៅក្នុងផ្សារទួលទំពូង អ្នកស្រី សេង វណ្ណារី និយាយថា ត្រសក់តម្លៃ ៣ ០០០រៀល ស្ពៃតឿតម្លៃ ៣ ៥០០រៀល និងស្ពៃខ្មៅ ៤ ០០០រៀលក្នុងមួយគីឡូក្រាម បើធៀបជាមួយនឹងមួយសប្តាហ៍មុន តម្លៃខុសគ្នាប្រហែលជា ១ ០០០រៀលក្នុងមួយគីឡូ។
អាជីវកររូបនោះបញ្ជាក់ថា រយៈពេលប៉ុន្មានថ្ងៃចុងក្រោយនេះ គាត់លក់បន្លែមិនសូវដាច់ដូចមុនទេ ដោយសារមិនសូវមានមនុស្សចូលផ្សារ ស្របពេលជំងឹកូវីដ-១៩ កំពុងផ្ទុះរីករាលដាលកាន់តែខ្លាំងជាដើម។
អ្នកស្រីនិយាយថា៖ «និយាយទៅប៉ុន្មានថ្ងៃហ្នឹង តាំងពីគេបិទផ្លូវមក ដូចថា បន្លែមិនសូវមាន ដល់អញ្ចឹងវាឡើងថ្លៃ វាស្ងាត់មនុស្សផង អត់សូវមានគេមកផ្សារ ដោយយើងកូវីដផង ប៉ះពាល់អត់មានលុយឱ្យថ្លៃបន្ទប់[ជួល]គេផង អត់មានលុយផ្ញើទៅអ្នកផ្ទះ តែចូលឆ្នាំមិនបានទៅផង»។
ប្រជាពលរដ្ឋម្នាក់រស់នៅរាជធានីភ្នំពេញ អ្នកនាង ឡុង ស្រីពៅ និយាយថា តម្លៃបន្លែនិងសាច់ឡើងថ្លៃចន្លោះពី ១ ០០០រៀល ទៅ ៥ ០០០រៀលក្នុងមួយគីឡូក្រាម ធ្វើឱ្យប៉ះពាល់ដល់ជីវភាពគ្រួសារគាត់ ខណៈការរកចំណូលក្នុងគ្រួសារកំពុងជួបការលំបាក ដោយសារការឆ្លងរាលដាលនៃជំងឺកូវីដ-១៩។
អ្នកនាងស្នើទៅរដ្ឋាភិបាលជួួយអន្តរាគមន៍ដល់អ្នកលក់បន្លែនិងសាច់ លក់នៅតម្លៃសមរម្យក្នុងអំឡុងពេលប្រទេសកំពុងជួបវិបត្តិជំងឺឆ្លងនេះ។
អ្នកនាងស្នើដូច្នេះថា៖ «អំឡុងកូវីដនេះពិបាកណាស់ បើសិនជាកន្លែងលក់បន្លែគេបញ្ចុះតម្លៃ ហើយសាច់ចុះដូចបន្លែដែរទៅ កុំឡើងថ្លៃអី! ជិតចូលឆ្នាំខ្មែរហើយ គ្មានបានទៅណាទេ ប្រាក់ខែក៏គ្មានដែរ»។
វីអូឌី មិនអាចសុំការបំភ្លឺជុំវិញករណីនេះពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងអ្នកនាំពាកក្រសួងកសិកម្ម លោក ស្រី វុទ្ធី បានទេនៅរសៀលនេះ។
ចំណែកប្រតិភូរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្ម លោក ងិន ឆាយ សុំមិនធ្វើការបកស្រាយ ដោយសារជាប់រវល់ប្រជុំ។
នាយិកាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ( CEDAC) លោកស្រី តុង ចាន់ធាង សង្កេតឃើញថា ក្រោយពីរដ្ឋាភិបាលចេញបម្រាមគោចរ មិនអនុញ្ញាតឱ្យប្រជាពលរដ្ឋធ្វើដំណើរចេញពីរាជធានីភ្នំពេញទៅតាមបណ្តាខេត្ត និងពីបណ្តាខេត្តមករាជធានីភ្នំពេញវិញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩នោះ បានធ្វើឱ្យពលរដ្ឋមួយចំនួននាំគ្នាសម្រុកទិញបន្លែសាច់ទុក ដែលអាចធ្វើឱ្យឈ្មួញឆ្លៀតឱកាសដំឡើងថ្លៃ។
លោកស្រីអំពាវនាវថា៖ «ដើម្បីទប់ស្កាត់ការដំឡើងតម្លៃផលិតផល ជាពិសេសម្ហូបអាហារ ក្នុងស្ថានភាពដែលយើងកំពុងតែលំបាកស្រាប់ ហើយប្រជាជនបាត់បង់ចំណូលប្រចាំថ្ងៃរបស់គាត់ថែមទៀត កាន់តែធ្វើឱ្យគាត់លំបាក យើងគួរតែមានការអន្តរាគមន៍ពីខាងស្ថាប័នពាក់ព័ន្ធនៅក្នុងករណីនេះ មិនអាចបណ្តោយទៅតាមតែអ្នកលក់ ឬក៏យើងអាចថា ឈ្មួញដំឡើងតម្លៃអញ្ចឹងមិនបានទេ»។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា កម្ពុជាបានចំណាយថវិកាខ្ទង់ ២០០លានដុល្លារអាមេរិកក្នុងមួយឆ្នាំៗ ទៅលើការនាំចូលបន្លែពីបរទេស ដើម្បីផ្គត់ផ្គង់តម្រូវការក្នុងស្រុក។ ក្រសួងថា បន្លែនាំចូលទាំងនោះ ភាគច្រើននាំចូលពីប្រទេសវៀតណាម និងប្រទេសចិន។
បើតាមរបាយការណ៍ក្រសួងដដែលនេះ កម្ពុជាត្រូវការបន្លែប្រមាណពី ៥០០ទៅ ៦០០តោនក្នុងមួយថ្ងៃៗ ក្នុងនោះនៅដើមឆ្នាំនេះ កម្ពុជានាំចូលប្រមាណ ៣០ភាគរយ បន្ទាប់ពីបរិមាណនៃការនាំចូលបន្លែពីបរទេសចូលមកកម្ពុជា បានកើនឡើងដល់ទៅ ៥០ភាគរយ កាលពីពាក់កណ្ដាលឆ្នាំមុន។
អំឡុងខែកញ្ញា ឆ្នាំ២០១៧ អង្គការ USAID របស់អាមេរិក បានបង្ហាញរបាយការណ៍ថា ពលរដ្ឋកម្ពុជាជាង ៧០ភាគរយ កំពុងប្រកបរបរកសិកម្ម ប៉ុន្តែកសិករអាចដាំបន្លែបានតែ ១ភាគ៣ នៃតម្រូវការទីផ្សារ ដោយសារបញ្ហាផ្សេងៗ៕