ធនាគារជាតិកម្ពុជា បានណែនាំទៅគ្រឹះស្ថានធនាគារ និងមីក្រូហិរញ្ញវត្ថុ ឱ្យផ្អាកជាបណ្តោះអាសន្ននូវសាខារបស់ខ្លួននៅតំបន់ដែលត្រូវអាជ្ញាធរបិទខ្ទប់ ដើម្បីចូលរួមទប់ស្កាត់ការរីករាលដាលនៃជំងឺឆ្លងកូវីដ-១៩។
តាមសេចក្តីជូនដំណឹងចុះថ្ងៃទី១២ ខែមេសា ឆ្នាំ២០២១នេះ ធនាគារជាតិកម្ពុជា បានដាក់ចេញគោលការណ៍មួយចំនួន ឱ្យគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុ អនុវត្ត ក្នុងនោះត្រូវផ្អាកជាបណ្តោះអាសន្ននូវប្រតិបត្តិការចំពោះសាខា ស្ថិតក្នុងតំបន់បិទខ្ទប់ និងត្រូវជូនដំណឹងដល់សាធារណជនឱ្យបានច្បាស់លាស់អំពីការផ្អាកប្រតិបត្តិការជាបណ្តោះអាសន្ននេះ ។
មួយវិញទៀត ធនាគារជាតិកម្ពុជា បានណែនាំដល់គ្រឹះស្ថានផ្តល់ប្រាក់កម្ចីទាំងនោះ ត្រូវរក្សានូវប្រាក់បៀវត្ស និងអត្ថប្រយោជន៍នានា សម្រាប់បុគ្គលិកគ្រប់រូបដែលខកខានបំពេញការងារនៅសាខាឬការិយាល័យដែលត្រូវបានបិទនោះ ព្រោះជាការអនុវត្តទៅតាមវិធានការសុខាភិបាល ការធ្វើចត្តាឡីស័ក និងវិធានការបិទខ្ទប់នេះ។
ការណែនាំនេះបានធ្វើឡើងក្រោយពីអាជ្ញាធររាជធានីភ្នំពេញ បានសម្រេចបិទភូមិនិងសង្កាត់មួយចំនួនដែលស្ថិតនៅក្នុងខណ្ឌមានជ័យ ខណ្ឌសែនសុខ និងខណ្ឌពោធិ៍សែនជ័យ ក្រោយរកឃើញមានករណីឆ្លងជំងឺកូវីដ-១៩ ច្រើនករណីនៅក្នុងភូមិសាស្ត្រទាំងនោះ៕