ក្រុមកម្មករដែលតម្រូវឱ្យធ្វើចត្តាឡីស័កតាមបន្ទប់នៅអាគារ៦ជាន់ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ អះអាងថា ពួកគេកំពុងខ្វះខាតទឹកស្អាតប្រើប្រាស់ដែលបង្កជាផលលំបាកក្នុងការរស់នៅ។
កម្មករបម្រើការងារនៅរោងចក្រ ឌីន ហាន លោក សៀន ណុច ប្រាប់ វីអូឌី នៅថ្ងៃអង្គារនេះថា កម្មករ-កម្មការិនី និងប្រជាពលរដ្ឋជាង១ ០០០នាក់ដែលជួលបន្ទប់ស្នាក់នៅអាគារ៦ជាន់ ហៅ «ផ្ទះឡ» ស្ថិតភូមិត្រពាំងថ្លែង សង្កាត់ចោមចៅ ត្រូវបានអាជ្ញាធរឱ្យអ្នកជួលបន្ទប់នៅលើអាគារមួយនេះធ្វើចត្តាឡីស័កទាំងអស់គ្នា តាំងពីថ្ងៃទី១០ ខែមីនា ឆ្នាំ២០២១នេះ។
កម្មកររូបនេះបន្តថា ក្រោយអាជ្ញាធររាំងខ្ទប់មិនឱ្យចេញក្រៅនោះ គឺរូបលោកនិងកម្មករផ្សេងទៀតដែលជួលបន្ទប់ស្នាក់លើអាគារនេះ ពុំមានទឹកប្រើប្រាស់គ្រប់គ្រាន់ឡើយ។
លោកបន្ថែមថា៖ «ផលលំបាកទីមួយ បញ្ហារឿងទឹកដាច់៣ថ្ងៃហើយ។ មួយទៀត ម្ហូបអាហារយើងស៊ីចុកហ្នឹង គេឡើងថ្លៃ ឥលូវយើងកំពុងសុំឱ្យម្ចាស់ផ្ទះជួយចុះថ្លៃបន្ទប់ជួលដែរ»។
កម្មកររបស់រោងចក្រ ឌីន ហាន ម្នាក់ទៀត លោក ហ៊ឺន សុវី ដែលបានជួលបន្ទប់ស្នាក់នៅជាមួយកម្មករ៣នាក់ទៀតនៅអាគារ៦ជាន់នេះ បាននិយាយថា ពួកគាត់កំពុងជួបការលំបាកខ្លាំងជាងគេ ចំពោះតម្រូវការប្រើប្រាស់ទឹក ដោយសារលោកនិងអ្នកស្នាក់នៅក្នុងបន្ទប់ជាមួយនោះ មិនត្រូវឱ្យចេញពីបន្ទប់ដាច់ខាត។
លោកបន្ថែមថា៖ «និយាយទៅ បញ្ហាប្រឈមសម្រាប់ពួកខ្ញុំនៅពេលនេះ គឺខ្វះទឹកប្រើប្រាស់ ពីព្រោះវាបានដាច់២ទៅ៣ថ្ងៃហើយ ដោយអាគារខ្ញុំនៅនេះ៦ជាន់។ អញ្ចឹងពេលគេបិទ មនុស្សអត់ចេញទៅណា ធ្វើឱ្យតម្រូវការប្រើប្រាស់ទឹកច្រើនគ្នា។ ខ្ញុំចង់ឱ្យអាជ្ញាធរនិងម្ចាស់ផ្ទះជួលជួយសម្រួលបញ្ហានេះដល់ពួកខ្ញុំ ពីព្រោះពួកខ្ញុំគេឱ្យធ្វើចត្តាឡីស័កមិនឱ្យចេញទៅណាដាច់ខាត»។
អ្នកនាំពាក្យក្រសួងការ និងបណ្តុះបណ្តាលវិជ្ជាជីវៈ លោក ហេង សួរ មានប្រសាសន៍ថា ប្រសិនបើកម្មករជាប់ធ្វើចត្តាឡីស័កមានបញ្ហានេះ ត្រូវសួរទៅរដ្ឋបាលរាជធានីភ្នំពេញ។
ប៉ុន្តែយ៉ាងណា អភិបាលខណ្ឌពោធិ៍សែនជ័យ លោក ហែម ដារិទ្ធ ប្រាប់ វីអូឌី យ៉ាងខ្លីថា បញ្ហានេះអាជ្ញាធរបានដោះស្រាយហើយ។
លោកបន្ថែមថា៖ «ឥលូវអត់មានករណីនេះកើតឡើងទេ។ មានបញ្ហាថ្ងៃមុនហ្នឹង ម្ចាស់ហ្នឹងភ្លេចបើកម៉ូទ័រ»។
ប្រធានសហភាពការងារកម្ពុជា លោក អាត់ ធន មានប្រសាសន៍ថា តាមព័ត៌មានដែលលោកទទួលបាន គឺមានរោងចក្រចំនួន២ ដែលមានកម្មករធ្វើចត្តាឡីស័កច្រើនជាងគេ គឺរោងចក្រ ឌីន ហាន និងរោងចក្រ ឌីឡាក់។ មេសហជីពរូបនេះបន្តថា ក្នុងករណីកម្មករដែលជាប់ធ្វើចត្តាឡីស័កជួបបញ្ហាផ្សេងៗនោះ អាជ្ញាធរពាក់ព័ន្ធគួរចុះដោះស្រាយជូនពួកគេទាន់ពេលវេលា។
លោកបន្ថែមថា៖ «ខ្ញុំគិតថា អាជ្ញាធរពាក់ព័ន្ធគួរតែរួសរាន់ដើម្បីតទឹក ឬក៏បញ្ជូនទឹកទៅឱ្យពួកគាត់ទាំងទឹកភ្លើង អាហារនិងសម្ភារមួយចំនួនទៀត ដើម្បីជួយសម្រួលឱ្យពួកគាត់ហ្នឹងអាចធ្វើចត្តាឡីស័ក ឬក៏សម្រាកថែរក្សាខ្លួនបានល្អ»។
ក្នុងពិធីថ្លែងសារពិសេសមួយនៅថ្ងៃទី១០ ខែមេសា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានបញ្ជាក់ថា រដ្ឋាភិបាលនឹងផ្តល់ការឧបត្ថម្ភជាប្រាក់៣០០ ០០០រៀលក្នុងមួយគ្រួសារ អង្ករ២៥គីឡូ និងមីមួយកេសតូច ក្នុងអំឡុងពេលធ្វើចត្តាឡីស័ក រួមទាំងចេញថ្លៃទឹកនិងអគ្គិសនីរយៈពេល២ខែផងដែរ សម្រាប់ពលរដ្ឋដែលរស់នៅក្នុងភូមិសាស្ត្រដែលអាជ្ញាធរបានបិទ។
លោកនាយករដ្ឋមន្ត្រី បន្ថែមថា ចំពោះគ្រួសារដែលមានសមាជិកស្លាប់ដោយសារជំងឺកូវីដ-១៩ រដ្ឋនឹងជួយបង់ជំនួសថ្លៃទឹកនិងអគ្គិសនីយ៉ាងតិច៥ខែបន្ថែម និងចំពោះអ្នកដែលសមាជិកឆ្លងជំងឺកូវីដ-១៩ និងធ្វើចត្តាឡីស័ក រដ្ឋជួយចេញថ្លៃទឹកនិងអគ្គិសនីអប្បបរមារយៈពេល៣ខែ៕