មន្ត្រីជាន់ខ្ពស់រដ្ឋាភិបាលស្នើដល់ប្រជាពលរដ្ឋរក្សាភាពស្ងៀមស្ងាត់ និងចៀសវាងសម្រុកទៅផ្សារដែលបង្កេីតបានជាភាពកកកុញមនុស្សច្រេីន និងជំរុញនូវហានិភ័យកាន់តែខ្ពស់ក្នុងការឆ្លងវីរុសកូវីដ-១៩។
ការស្នើនេះបានធ្វើឡើងក្រោយពីមានសារជាសំឡេងផ្ញើតៗគ្នានៅក្នុងបណ្តាញសង្គម ថានឹងមានការបិទរាជធានីភ្នំពេញ និងក្រុងតាខ្មៅ ខេត្តកណ្តាល ចាប់ពីយប់នេះរហូតដល់២សប្តាហ៍ ដោយសារតែស្ថានភាពនៃការឆ្លងរាលដាលនៃជំងឺកូវីដ-១៩ កាន់តែមានភាពធ្ងន់ធ្ងរដែលពិបាកគ្រប់គ្រង។
ក្រោយពីមានការចែករំលែកតៗគ្នានូវសារជាសំឡេងនេះ ប្រជាពលរដ្ឋរស់នៅក្នុងរាជធានីភ្នំពេញជាច្រើនបាននាំគ្នាសម្រុកទៅផ្សារនានា ដើម្បីទិញស្បៀងអាហារទុក។
ករណីនេះ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានអំពាវនាវតាមរយៈបណ្តាញសង្គមតេឡេក្រាម ឱ្យប្រជាពលរដ្ឋរក្សាភាពស្ងៀមស្ងាត់ និងត្រូវជឿជាក់លើវិធានការរបស់រដ្ឋាភិបាលដែលមានការគិតគូរត្រឹមត្រូវ និងមិនបិទជិតឈឹងមិនឱ្យមានវិធីក្នុងការរកម្ហូបអាហារទទួលទាននោះឡេីយ។
លោកស្រីបន្តថា ការសម្រុកទៅផ្សាររបស់ប្រជាពលរដ្ឋយ៉ាងច្រើនកកកុញនេះ នឹងជំរុញនូវហានិភ័យកាន់តែខ្ពស់ក្នុងការឆ្លងនូវវីរុសកូវីដ-១៩។
លោកស្រី ឱ វណ្ណឌីន បញ្ជាក់ថា៖ «បងប្អូនអាចនឹងឆ្លងជំងឺកូវីដ-១៩ បានគ្រប់ពេលនៅពេលដែលនៅកន្លែងប្រជ្រៀតគ្នាខ្លាំងពេកនោះ ឬកន្លែងដែលមិនមានគម្លាតគ្នាពីមួយម៉ែត្រកន្លះឡេីង ហេីយមិនមានពាក់ម៉ាស់ និងលាងដៃញឹកញាប់ទេនោះ។ សូមត្រូវចងចាំថា វីរុសកូវីដ-១៩ សប្បាយចិត្តខ្លាំង ចូលចិត្តខ្លាំង និងពេញចិត្តជាទីបំផុត ក្នុងការដេីរចម្លងពីបុគ្គលម្នាក់ទៅម្នាក់ទៀតបានយ៉ាងងាយស្រួលដោយមិនមានរបាំងហាមឃាត់ ឬសម្លាប់វីរុសដ៏សាហាវនេះនោះ»។
មន្ត្រីសុខាភិបាលរូបនេះក៏បានអំពាវនាវជាថ្មីដល់ប្រជាពលរដ្ឋចូលរួមអនុវត្តវិធានការ «៣ការពារ ៣កុំ» និងចាក់វ៉ាក់សាំងការពារកូវីដ-១៩ ព្រមទាំងចូលឆ្នាំនៅផ្ទះ ដេីម្បីឈ្នះនូវការវាយលុករបស់វីរុសកូវីដ-១៩។
ទោះជាយ៉ាងណា រហូតមកដល់ម៉ោង៩យប់ថ្ងៃពុធនេះនៅមិនទាន់មានការបញ្ជាក់ជាផ្លូវការណាមួយរបស់មន្ត្រីរដ្ឋាភិបាល ជុំវិញវិធានការបិទរាជធានីភ្នំពេញ និងក្រុងតាខ្មៅ ខេត្តកណ្តាល នេះនៅឡើយទេ។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី សុំមិនទាន់អត្ថាធិប្បាយជុំវិញករណីនេះ ដោយលោកឱ្យរង់ចាំការប្រកាសជាផ្លូវការរបស់រដ្ឋាភិបាល៕
