ក្រសួងសុខាភិបាលបានដាក់ខេត្តស្វាយរៀងមួយទៀតជាតំបន់ឆ្លងរាលដាលជំងឺកូវីដ-១៩ ដែលតម្រូវឱ្យអាជ្ញាធរអនុវត្តកាតព្វកិច្ចពាក់ម៉ាសនិងរក្សាគម្លាតសុវត្ថិភាព ដើម្បីទប់ស្កាត់ជំងឺឆ្លងជាសកលនេះ។
កាលពីថ្ងៃទី២៤ ខែមីនា ឆ្នាំ២០២១ ក្រសួងសុខាភិបាលបានដាក់ភូមិសាស្ត្ររាជធានី-ខេត្តចំនួន៥ រួមមាន រាជធានីភ្នំពេញ ខេត្តព្រះសីហនុ កណ្តាល ព្រៃវែង និងសៀមរាប ជាភូមិសាស្ត្រដែលត្រូវពាក់ម៉ាសនិងរក្សាគម្លាតសុវត្ថិភាព ក្រោយមានការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានលើកឡើងក្នុងសេចក្តីជូនដំណឹងចុះថ្ងៃទី១៤ ខែមេសានេះថា មូលហេតុដែលក្រសួងដាក់ខេត្តនេះជាភូមិសាស្ត្រត្រូវអនុវត្តវិធានកាតព្វកិច្ចពាក់ម៉ាសនិងរក្សាគម្លាតបុគ្គលនេះ ដោយសារតែក្រសួងមើលឃើញថា ខេត្តនេះមានការឆ្លងរាលដាលជំងឺកូវីដ-១៩ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
សេចក្តីជូនដំណឹងនោះបន្តថា ចំពោះបុគ្គលដែលមានកាតព្វកិច្ចពាក់ម៉ាសនិងរក្សាគម្លាតបុគ្គល ត្រូវបានកំណត់ក្នុងប្រការ៣ និងប្រការ៤ នៃប្រកាសស្តីពីកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពក្នុងអំឡុងពេលនៃការឆ្លងរាលដាលជំងឺកូវីដ-១៩ ក្នុងសហគមន៍។
ក្រសួងបានគូសបញ្ជាក់ថា៖ «អាជ្ញាធរមានសមត្ថកិច្ចគ្រប់លំដាប់ថ្នាក់ចាត់វិធានការ ដើម្បីធានាអនុវត្តឱ្យបានម៉ឺងម៉ាត់នូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព និងសាធារណជនទាំងអស់ចូលរួមអនុវត្តឱ្យបានខ្ជាប់ខ្ជួននូវកាតព្វកិច្ចនេះ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩»។
បើតាមសេចក្តីជូនដំណឹងរបស់ក្រសួង កាតព្វកិច្ចនេះត្រូវធ្វើចាប់ពីថ្ងៃជូនដំណឹងនេះរហូតដល់មានការជូនដំណឹងជាថ្មី។
អភិបាលរងខេត្តស្វាយរៀង លោក តូច ប៉ូលីវា មានប្រសាសន៍ថា អាជ្ញាធរពាក់ព័ន្ធបានអនុវត្តជាបន្តបន្ទាប់មកហើយនូវវិធានសុខាភិបាលនេះ ប៉ុន្តែក្រោយទទួលបានការជូនដំណឹងពីក្រសួងសុខាភិបាលនេះ ខេត្តនឹងចាប់ផ្តើមអនុវត្តវិធានសុខាភិបាលបន្ថែមទៀត ដើម្បីពង្រឹងការទប់ស្កាត់ការឆ្លងរាលដាលជំងឺកូវីដ-១៩។
លោកថា ការដាក់ចេញនូវវិធានការពាក់ម៉ាសនិងរក្សាគម្លាតសុវត្ថិភាពរបស់ក្រសួង ធ្វើឡើងក្រោយពីខេត្តស្វាយរៀង មានករណីឆ្លងជំងឺកូវីដ-១៩ នៅតំបន់សេដ្ឋកិច្ចពិសេស ក្រុងបាវិត ពិសេសនៅក្នុងកាស៊ីណូ។
លោក តូច ប៉ូលីវា បញ្ជាក់ថា៖ «នៅក្នុងកាស៊ីណូ មកដល់ម៉ោងនេះ [ព្រឹកថ្ងៃទី១៤ ខែមេសា] ទាំងប្រជាពលរដ្ឋទាំងអីនៅក្នុងមន្ទីរពេទ្យព្យាបាលមានចំនួន១៥១នាក់ ក្រៅពីហ្នឹងជាហើយ ជិត៥០នាក់»។
ប្រការ៣ និងប្រការ៤ នៃប្រកាសរបស់ក្រសួងសុខាភិបាល កំណត់ថា បុគ្គលដែលវិជ្ជមានកូវីដ-១៩ បុគ្គលដែលមានកាតព្វកិច្ចធ្វើចត្តាឡីស័ក អ្នកបើកបរនិងអ្នករួមដំណើរលើមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជនគ្រប់ប្រភេទ អ្នកផ្តល់សេវាផ្ទាល់ដល់អតិថិជន និងបុគ្គលផ្សេងៗទៀតដែលកំពុងស្ថិតនៅតាមទីសាធារណៈដែលមានមនុស្សច្រើន ឬទីកន្លែងដែលមានការជួបជុំមនុស្សចាប់ពី២នាក់ឡើងទៅ។
ប្រកាសដដែលបន្តថា ចំពោះទីកន្លែងដែលតម្រូវឱ្យពាក់ម៉ាសវិញ ត្រូវធ្វើនៅគ្រប់ទីកន្លែងសាធារណៈនានា ដូចជា ភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ គ្លីនិក ឬមន្ទីរសម្រាកព្យាបាលជំងឺ ឬទីកន្លែងផ្សេងៗទៀតដែលបិទជិត។
ចំពោះកាតព្វកិច្ចត្រូវរក្សាគម្លាតសុវត្ថិភាពវិញ គឺបុគ្គលដែលស្ថិតនៅកន្លែងធ្វើការនៃសហគ្រាស ឬគ្រឹះស្ថានឯកជន ទីតាំងអាជីវកម្ម ឬទីកន្លែងសាធារណៈដែលមានមនុស្សច្រើន ត្រូវអនុវត្តគម្លាតសុវត្ថិភាពឱ្យបានយ៉ាងតិច«១ម៉ែត្រកន្លះ»ពីបុគ្គលមួយទៅបុគ្គលមួយទៀត។ ប៉ុន្តែក៏លើកលែងផងដែរសម្រាប់អ្នកដែលកំពុងរស់នៅជាមួយគ្នា សម្រាប់ការធ្វើដំណើរក្នុងមធ្យោបាយឯកជន រវាងជនពិការ ចាស់ជរា ឬកុមារជាមួយអ្នកមើលថែទាំពួកគេ ចំពោះអ្នកផ្តល់និងទទួលសេវាកម្មណាមួយ ចំពោះការហ្វឹកហាត់ឬប្រកួតកីឡា និងរវាងកូនកំលោះនិងកូនក្រមុំ ជាដើម។
បើតាមប្រកាសរបស់ក្រសួងសុខាភិបាល បើសិនបុគ្គលណាមិនអនុវត្តទៅតាមកាតព្វកិច្ចដែលតម្រូវនេះទេ គឺជំហានដំបូង ពួកគេនឹងរងនូវការព្រមាននិងណែនាំពីមន្រ្តីសុខាភិបាលឬអាជ្ញាធរមានសមត្ថកិច្ច។ ប៉ុន្តែបើសិននៅតែមិនអនុវត្តទៀត គឺនឹងប្រឈមការពិន័យជាទឹកប្រាក់ពីចន្លោះពី ២០០ ០០០រៀល ទៅ ១ ០០០ ០០០ រៀល ជាកំហិត៕