មន្រ្តីសុខាភិបាល ឱ្យដឹងថា អ្នកជំងឺកូវីដ-១៩ ជាង១ ៤០០នាក់ដែលបានឆ្លងកាលពីពេលថ្មីៗនេះ កំពុងសម្រាកព្យាបាលនៅផ្ទះ រង់ចាំផ្ទេរទៅសម្រាកព្យាបាលនៅតាមមណ្ឌល ដោយសារតែមណ្ឌលព្យាបាលពេញ។
ក្នុងរបាយការណ៍ក្រសួងសុខាភិបាល នៅថ្ងៃទី១៤ ខែមេសា ឆ្នាំ២០២១ បានឱ្យដឹងថា អ្នកជំងឺ១ ៤៩៣នាក់ ថ្មីៗនេះកំពុងរង់ចាំបុគ្គលិកពេទ្យទាក់ទងមកទទួល ដើម្បីបញ្ជូនទៅកន្លែងឬមណ្ឌលសម្រាកព្យាបាលអ្នកជំងឺកូវីដ-១៩ ណាមួយដែលមានគ្រែទំនេរ។
ប្រធានមន្ទីរសុខាភិបាលរាជធានីភ្នំពេញ លោក ងី មានហេង លើកឡើងថា មន្រ្តីសុខាភិបាលនិងរដ្ឋបាលរាជធានីភ្នំពេញ បាននិងកំពុងផ្ទេរអ្នកជំងឺដែលមានលេចនូវអាការរោគឱ្យទៅសម្រាកព្យាបាលបានជាច្រើនរយនាក់រួចមកហើយក្នុងរយៈពេល២-៣ថ្ងៃចុងក្រោយនេះ។
លោក មានហេង មានប្រសាសន៍ថា៖ «យើងកំពុងតែដោះស្រាយ ដោះបណ្តើរនិងដោះតរហូត ពីព្រោះយើងមិនបានត្រៀមមុនសម្រាប់អ្នក១ ០០០នាក់ អញ្ចឹងយើងអត់បានត្រៀម យើងមានត្រៀមត្រឹមរាប់រយ ដល់ព្រឹត្តិការណ៍វាកើនដល់ហ្នឹង ប៉ុន្តែយើងដោះរហូត»។
កាលពីចុងសប្តាហ៍កន្លងទៅនេះ លោកនាយករដ្ឋមន្រ្តី ហ៊ុន សែន បានប្រកាសរៀបចំមជ្ឈមណ្ឌលមហាសន្និបាតកោះពេជ្រ ធ្វើជាទីមណ្ឌលព្យាបាលអ្នកជំងឺកូវីដ-១៩ ដែលអាចទទួលអ្នកជំងឺបានរហូតដល់៥ ០០០នាក់។
លោកបន្ថែមថា មានតែអ្នកជំងឺស្រាលៗប៉ុណ្ណោះដែលត្រូវបានអនុញ្ញាតឱ្យរង់ចាំនៅផ្ទះ ឯអ្នកមានវ័យចំណាស់ឬមានអាការពិបាកដកដង្ហើមឬក្អកខ្លាំងជាដើម ខាងមន្ទីរសុខាភិបាលនឹងបញ្ជូនបុគ្គលិកពេទ្យឱ្យទៅទទួលយកទៅសម្រាកព្យាបាលឯមណ្ឌលព្យាបាលជាបន្ទាន់។
យ៉ាងណា លោក ងី មានហេង និយាយថា បញ្ហាប្រឈមសម្រាប់អ្នកជំងឺកូវីដ-១៩ ដែលកំពុងដាក់ខ្លួនឱ្យដាច់ដោយឡែកក្នុងផ្ទះ ជាញឹកញាប់គឺកើតចេញពីការបារម្ភខ្លាចរបស់អ្នករស់នៅជិតខាង ជាជាងក្នុងចំណោមសមាជិកក្រុមគ្រួសាររបស់ពួកគេ។
ព្រឹត្តិការណ៍សហគមន៍២០កុម្ភៈ បានផ្ទុះការឆ្លងរាលដាលខ្លាំងនៅរាជធានីភ្នំពេញ កាលពីសប្តាហ៍មុន ជាមួយតួលេខឆ្លងជាង១ ០០០ករណី ត្រូវបានរកឃើញក្នុងរយៈពេល២ថ្ងៃ ដែលភាគច្រើនលើសលុបកើតលើអ្នកធ្វើការនៅរោងចក្រកាត់ដេរ និងផ្សារមួយចំនួនក្នុងទីក្រុង។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី ឱ្យដឹងថា អាជ្ញាធរក្រុងបានកំណត់អាទិភាពករណីអ្នកជំងឺកូវីដ-១៩នៅផ្ទះ ទៅតាមស្ថានភាពអាការរោគធ្ងន់ឬស្រាល ហើយទាក់ទងសួរនាំពីស្ថានភាពសុខភាពពួកគេ ថាតើត្រូវទទួលការព្យាបាលនៅមណ្ឌលព្យាបាលឬយ៉ាងណា។
លោក ម៉េត មាសភក្តី មានប្រសាសន៍ថា៖ «ស្ថានភាពខ្លះ លោកអាចគេហៅថា ឋិតក្នុងកម្រិតមួយដែលយើងកុងស៊ុលតាមទូរសព្ទក្នុងជំហានដែលមិនធ្ងន់ធ្ងរខ្លាំង ហើយស្របពេលដែលយើងកំពុងតែរៀបចំទីតាំងបន្ថែមទៀត។ មិនមែននៅក្នុងន័យហ្នឹង យើងមានន័យថា ទុកលោកនៅផ្ទះនោះទេ ប៉ុន្តែវាមានតាមស្ថានភាព ដើម្បីឱ្យវាស៊ីជាមួយហ្នឹងទីតាំងដែលយើងកំពុងតែរៀបចំបណ្តើរៗ។ រៀបចំ[ហើយ] បានបញ្ជូនៗ»។
កាលពីសប្តាហ៍មុន លោកនាយករដ្ឋមន្រ្តី ហ៊ុន សែន បានបញ្ជាទៅក្រសួងសុខាភិបាលឱ្យរៀបចំគោលការណ៍ណែនាំសម្រាប់អ្នកជំងឺកូវីដ-១៩ ដែលមានស្ថានភាពជំងឺស្រាលអាចព្យាបាលនៅផ្ទះបាន។
ពលរដ្ឋរស់នៅក្នុងខណ្ឌមានជ័យ ឈ្មោះ ពេជ្រ រីយ៉ា និយាយថា ម្តាយរបស់គាត់មានវ័យ៥១ឆ្នាំ បាននៅផ្ទះរយៈពេល៣ថ្ងៃមកហើយ ដើម្បីរង់ចាំទទួលការព្យាបាលនៅមណ្ឌលព្យាបាល បន្ទាប់ពីធ្វើតេស្តឃើញវិជ្ជមានកូវីដ-១៩ នៅថ្ងៃទី៧ ខែមេសា។ លោកថា រថយន្តសាមុយពេទ្យបានមកយកម្តាយរបស់លោកទៅព្យាបាលនៅថ្ងៃទី១១ ខែមេសា បន្ទាប់ពីលោកបង្ហោះសារលើបណ្តាញហ្វេសប៊ុក រៀបរាប់ពីកង្វល់ចំពោះអាការម្តាយរបស់លោកដែលមានបញ្ហាពិបាកដកដង្ហើមនិងឈឺក្បាលខ្លាំងបានមួយថ្ងៃ។
លោក រីយ៉ា បន្ថែមថា គាត់បានទូរសព្ទទៅគ្រូពេទ្យដើម្បីពិគ្រោះយោបល់ ហើយគ្រូពេទ្យបានណែនាំឱ្យម្តាយរបស់គាត់ប្រើថ្នាំវីតាមីនC ថ្នាំក្អក និងថ្នាំបញ្ចុះកម្តៅ ទៅតាមអាការ និងឱ្យគាត់ញាំទឹកក្តៅអ៊ុនៗឱ្យបានញឹកញាប់។
លោកនិយាយថា៖ «ខ្ញុំក៏បានព្យាយាមទាក់ទងទៅខាងគ្រូពេទ្យអញ្ចឹងទៅ ហើយខាងក្រសួងសុខាភិបាលគាត់ក៏បានឱ្យខ្ញុំព្យាយាមសង្គ្រោះបឋមខ្លួនឯងនៅផ្ទះ ប៉ុន្តែយើងអត់ដឹងថា ខ្លួនឯងអាចសង្គ្រោះបឋមខ្លួនឯងបានដល់កម្រិតណា ព្រោះអីយើងមិនមែនជាអ្នកជំនាញខាងហ្នឹងអញ្ចឹង»។
ប្រភពដដែលបន្ថែមថា សមាជិកគ្រួសាររបស់គាត់មានគ្នា៨នាក់បានតេស្តឃើញអវិជ្ជមាននៅក្នុងការធ្វើតេស្តលើកទី១។ លោកបន្តថា ផ្ទះរបស់លោកមានជាន់លើក្រោម ហើយម្តាយរបស់លោកនៅជាន់លើ ឯអ្នកដទៃស្នាក់នៅជាន់ក្រោម និងទទួលខុសត្រូវយកម្ហូបអាហារ និងរបស់របរផ្សេងៗឱ្យម្តាយ។
លោកថា ពួកគេមានការប្រុងប្រយ័ត្ននិងការពារខ្ពស់តាមដែលអាចធ្វើទៅបាន ដូចជា ពាក់ស្រោមដៃ បាញ់អាល់កុលលើរបស់របរប្រើប្រាស់ផ្សេងៗ ហើយលាងសម្អាតចានឆ្នាំងដែលម្តាយរបស់គាត់បានប្រើ រួចដាក់ដោយឡែកពីអ្នកដទៃ ជាដើម។
លោក ពេជ្រ រីយ៉ា និយាយថា៖ «បើសិនយើងទុកគាត់នៅយូរ យើងមានហានិភ័យខ្ពស់ក្នុងការចម្លងពីម្នាក់ទៅម្នាក់។ បើជាអ្នកផ្ទះអត់មាន មានវិជ្ជមានតែគាត់ បើយើងនៅជាមួយគ្នាយូរ យើងអាចមានករណីឆ្លងដែរអញ្ចឹង»។
គាត់បន្ថែមថា ម្តាយរបស់គាត់គឺជាអាជីវករផ្សារអូរឫស្សី និងកំពុងសម្រាកព្យាបាលនៅមណ្ឌលព្យាបាលម៉ូឌែន២ ដែលជាមជ្ឈមណ្ឌលអាពាហ៍ពិពាហ៍ម៉ូឌែន២ ក្នុងសង្កាត់ចាក់អង្រែ ដែលត្រូវបានអាជ្ញាធររាជធានីភ្នំពេញ កែប្រែសម្រាប់ដាក់អ្នកជំងឺកូវីដ-១៩ ឱ្យសម្រាកព្យាបាល។
ពលរដ្ឋជាអាជីវករលក់ទំនិញតាមអនឡាយម្នាក់ បានប្រាប់ VOD ក្នុងលក្ខខណ្ឌសុំមិនបញ្ចេញឈ្មោះថា ម្តាយវ័យ៦១ឆ្នាំរបស់គាត់ដែលជាអាជីវករលក់គ្រឿងអគ្គិសនីនៅផ្សារអូរឫស្សី បានធ្វើតេស្តឃើញវិជ្ជមានកូវីដ-១៩ នៅថ្ងៃទី១១ ខែមេសា បន្ទាប់ពីផ្តល់សំណាកបាន២ថ្ងៃ។
ស្រ្តីវ័យ៣៨ឆ្នាំរូបនេះនិយាយថា គ្រូពេទ្យបានប្រាប់ឱ្យម្តាយគាត់នៅផ្ទះរង់ចាំ បន្ទាប់ពីសាកសួរពីអាការជំងឺរបស់គាត់ ដឹងថា មានក្អកនិងផ្តាសាយតិចតួច។ គាត់ថា នៅថ្ងៃបន្តបន្ទាប់ អាការម្តាយគាត់វិវត្តទៅសភាពធ្ងន់ធ្ងរបន្តិចម្តងៗ រហូតដល់គាត់មានបញ្ហាពិបាក ថប់ខ្យល់ដង្ហើមខ្លាំង នៅយប់ថ្ងៃទី១៣ ខែមេសា។
ពលរដ្ឋរូបនេះនិយាយថា៖ «ចាប់ពីព្រឹកគាត់ដកដង្ហើមពិបាករហូតដល់ពេលយប់ខ្លាំង ម៉ោង៧ គាត់ចាប់ផ្តើមពិបាកខ្លាំង ហើយពេលហ្នឹងខ្ញុំស្លន់ស្លោមែនទែនហ្មង! ខ្ញុំអស់ជម្រើស ខ្ញុំតេទៅ១១៥ ច្រើនដង គេនៅតែឱ្យខ្ញុំចាំ។ គេថាដោយសារអត់មានកន្លែងសម្រាប់អ្នកជំងឺអញ្ចឹង ហើយចាំគេទាក់ទងថ្នាក់លើ ហើយគេនឹងជូនព័ត៌មានអញ្ចឹង ហើយខ្ញុំចាំហើយចាំទៀត តែវាអត់មានលទ្ធផល»។
គាត់ថា គាត់បានសម្រេចបង្ហោះសារលើបណ្តាញសង្គម Facebook ពីទុក្ខកង្វល់របស់ខ្លួន ហើយក៏មានមិត្តភក្តិផ្តល់លេខទំនាក់ទំនងមន្រ្តីជាន់ខ្ពស់ក្រសួងសុខាភិបាល ហើយគាត់ក៏ទាក់ទងសុំអន្តរាគមន៍ជួយបញ្ជូនអ្នកជំងឺទៅសម្រាកព្យាបាលនៅមន្ទីរពេទ្យហ្លួងម៉ែ នៅយប់ថ្ងៃទី១៣ ខែមេសា ទាន់ពេល៕