ពលរដ្ឋនិងសង្គមស៊ីវិល លើកឡើងថា រដ្ឋាភិបាលគួរតែប្រកាសជាមុន៣ថ្ងៃ ដើម្បីទុកពេលឱ្យពួកគាត់បានត្រៀមខ្លួនជាជាងប្រកាសបិទភ្លាមៗ ដែលប្រឈមហានិភ័យឆ្លងជំងឺកូវីដ-១៩ កាន់តែខ្លាំង ដោយសារការជ្រួលច្របល់ហើយសម្រុកនាំគ្នាទៅទិញស្បៀងអាហារ ភ្លេចគិតពីរឿងសុវត្ថិភាពសង្គម។
អ្នកលក់មីឆានៅម្ដុំជ្រោយចង្វារ អ្នកនាង ស៊ុំ សូនី និយាយថា នៅពេលរដ្ឋាភិបាលប្រកាសបិទភ្លាមៗ គ្រួសារគាត់បារម្ភនិងភ័យខ្លាចអត់មានអីហូប ខណៈគាត់មិនទិញអ្វីទុក ហើយចំណូលដែលរកបាននោះសម្រាប់តែដោះស្រាយបញ្ហាជីវភាពប្រចាំថ្ងៃតែប៉ុណ្ណោះ។
លោកថា៖ «ជាអាជីវករលំបាកខ្លាំងមែនទែន! ទៅណាក៏អត់កើតដែរ លក់ក៏អត់កើត អ្វីដែលលំបាកគឺខ្វះខាតអាហារប្រចាំថ្ងៃ ព្រោះយើងបាត់ប្រាក់ចំណូលទាំងអស់ហើយ»។
ពលរដ្ឋលក់ម្ហូបអាហារពេលល្ងាចនៅក្រុងភ្នំពេញម្នាក់ទៀត លោក ស៊ុន ខេង និយាយថា រូបគាត់មិនជំទាស់វិធានការបិទខ្ទប់របស់រដ្ឋាភិបាលទេ ប៉ុន្តែការសម្រេចបិទធ្វើឡើងលឿនពេក ដែលធ្វើឱ្យពួកគាត់មិនបានត្រៀមខ្លួនទុកជាមុន។
លោកថា៖ «និយាយទៅ បើគាត់ផ្ដល់ព័ត៌មានបានមុនយ៉ាងយូរមួយថ្ងៃ ក៏យើងបានត្រៀមនិងទិញអីទុកដែរ ប៉ុន្តែនេះ យើងដឹងតិចម៉ោងពេក»។
និសិ្សតរៀននៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លោក មុនី សុធារិទ្ធ រៀបរាប់ថា នៅពេលដែលពួកគាត់ទទួលបានសារសំឡេងរបស់ប្រមុខរដ្ឋាភិបាលចែករំលែកតៗគ្នាមក ពួកគាត់មានក្ដីបារម្ភ ទើបធ្វើឱ្យមានការជ្រួលច្របល់បែបនេះ ខណៈព័ត៌មានផ្លូវការដែលចេញពីអាជ្ញាធរមានសមត្ថកិច្ចនៅមានភាពយឺតយ៉ាវ។
លោកបន្តថា ភាពជ្រួលច្របល់នេះ មកពីពួកគាត់គិតថា រដ្ឋាភិបាលនឹងបិទទាំងស្រុង ដោយមិនឱ្យដើរហើរឬមានអ្នកលក់ដូរ ទើបនាំគ្នាសម្រុកទៅផ្សារ ដើម្បីទិញស្បៀងអាហារស្ដុក ហើយភ្លេចគិតពីការឆ្លងជំងឺកូវីដ-១៩។
លោក៖ «ខ្ញុំគិតថា ប្រកាសមុន៣ថ្ងៃ ហើយបញ្ជាក់ពីការបិទឱ្យបានច្បាស់អំពីគោលបំណងនៃការបិទហ្នឹងរបៀបម៉េច ហើយថា តើត្រូវផ្អាកចេញនៅម៉ោងប៉ុន្មាន អ្នកធ្វើការម៉េច អ្នកដឹកជញ្ជូនអីវ៉ាន់ត្រូវធ្វើម៉េច។ អ្នកនៅរាជធានីភ្នំពេញ គាត់អត់ច្បាស់ថា គោលបំណងនៃការបិទ១៤ថ្ងៃហ្នឹងយ៉ាងម៉េចខ្លះ វាអត់ច្បាស់ បើចេញគោលបំណង៣ទៅ៤ឱ្យបានច្បាស់ៗទៅ ដើម្បីងាយស្រួលឱ្យប្រជាពលរដ្ឋអនុវត្តតាម»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណ សង្កេតឃើញថា រាល់ការដាក់ចេញនូវវិធានការរបស់រដ្ឋាភិបាលធ្វើឡើងលឿនពេក ដែលធ្វើឱ្យប្រជាពលរដ្ឋជ្រួលច្របល់គិតរឿងស្បៀងអាហារ ដោយភ្លេចគិតវិធានការសុខាភិបាលបង្ការជំងឺកូវីដ-១៩។
លោកបន្តថា ការប្រកាសអនុវត្តភ្លាមៗ និងភាពជ្រួលច្របល់របស់ប្រជាពលរដ្ឋ ដោយសារពួកគាត់នៅមិនទាន់មានជំនឿទៅលើរដ្ឋាភិបាលក្នុងការរដោះស្រាយបញ្ហាជូនពួកគាត់អំឡុងពេលបិទខ្ទប់នោះ។
លោកបន្តថា រដ្ឋាភិបាលក៏ដូចជាអាជ្ញាធរគួរតែធ្វើការសិក្សាឬត្រៀមរៀបចំក្រុមការងារដោះស្រាយបញ្ហាផ្សេងៗជូនដល់ប្រជាពលរដ្ឋឱ្យច្បាស់លាស់ មុននឹងសម្រេចបិទខ្ទប់ ដើម្បីបញ្ចៀសការឆ្លងជំងឺកូវីដ-១៩ និងដើម្បីឱ្យពលរដ្ឋមានភាពកក់ក្ដៅផងដែរ។
លោកថា៖ «ពាក់ព័ន្ធនឹងការរាំងខ្ទប់នេះ គួរតែមានការប្រកាសព័ត៌មានឱ្យជាក់លាក់ដែរ ដើម្បីកុំឱ្យពួកគាត់មានភាពជ្រួលច្របល់។ អ៊ីចឹងអាចប្រកាសទៅថា យប់ហ្នឹងមានការបិទហើយ បងប្អូនដែលទៅរកទិញម្ហូបអី សូមកុំឱ្យព្រួយបារម្ភ ព្រោះមិនមានការបិទចរាចរណ៍ដល់ថ្នាក់មិនឱ្យទៅទិញម្ហូបអាហារសម្រាប់ទទួលទានទេ។ យើងប្រកាសជាមុន ដើម្បីកុំឱ្យមានការជ្រួលច្របល់»។
កាលពីថ្ងៃទី១៤ ខែមេសា ឆ្នាំ២០២១ រដ្ឋាភិបាលបានចេញសេចក្តីសម្រេចជាផ្លូវការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ជាបណ្តោះអាសន្ន រយៈពេល១៤ថ្ងៃ គិតចាប់ពីម៉ោងសូន្យថ្ងៃទី១៥ ខែមេសានេះ ដល់ថ្ងៃទី២៨ ខែមេសា ឆ្នាំ២០២១។ សេចក្តីសម្រេចនេះ ធ្វើឡើងដើម្បីទប់ស្កាត់ការឆ្លងរាលដាលនៃជំងឺកូវីដ-១៩ មិនឱ្យទៅតំបន់ផ្សេងទៀតដែលធ្វើឱ្យពិបាកគ្រប់គ្រង។
មុនសេចក្តីសម្រេចចេញជាផ្លូវការនោះ សំឡេងរបស់លោកនាយករដ្ឋមន្ត្រី ហ៊ុន សែន ត្រូវបានគេចែកចាយក្នុងបណ្តាញសង្គមហ្វេសប៊ុក ដែលធ្វើឱ្យពលរដ្ឋមានការព្រួយបារម្ភ ហើយមនុស្សជាច្រើនសម្រុកទៅផ្សារឬផ្សារទំនើបផ្សេងទៀត តាមតំបន់ពួកគេរស់នៅរៀងៗខ្លួន ដើម្បីទិញស្បៀងឬសម្ភារមួយចំនួនសម្រាប់ស្តុកទុកបរិភោគនិងប្រើប្រាស់។
ទិដ្ឋភាពពលរដ្ឋសម្រុកទៅទិញស្បៀងទុក បានចែកចាយពាសពេញក្នុងបណ្តាញសង្គមនោះ បង្ហាញពីការប្រាសចាកពីគោលការណ៍រក្សាគម្លាតសង្គម បណ្តាលឱ្យក្តីបារម្ភពាក់ព័ន្ធការឆ្លងរីករាលដាលជំងឺកូវីដ-១៩ផងដែរ។
បញ្ហានេះ ប្រមុខរដ្ឋាភិបាលលោក ហ៊ុន សែន កាលពីអធ្រាត្រថ្ងៃទី១៤ ខែមេសា បានចេញមុខសុំទោសចំពោះការលួចបញ្ចេញសំឡេងរបស់លោកអំពីការបិទរាជធានីភ្នំពេញ និងក្រុងតាខ្មៅ មុនសេចក្តីសម្រេចចេញជាផ្លូវការ ដែលបណ្តាលឱ្យប៉ះពាល់ដល់អារម្មណ៍ពលរដ្ឋ។
លោកថា នេះជាទង្វើខ្វះការទទួលខុសត្រូវរបស់បុគ្គលនៅក្នុងគណៈរដ្ឋមន្ត្រី ដែលត្រូវចាត់វិធានការពេលក្រោយ។
លោកថា៖ «ពិតមែនហើយ ខ្ញុំសូមអភ័យទោស ដោយសារតែរឿងរ៉ាវមិនទាន់ចេញសេចក្ដីសម្រេច ប៉ុន្តែបែរជាបានបែកធ្លាយទៅជាមុន ដោយបុគ្គលខ្វះការទទួលខុសត្រូវនៅក្នុងក្បាលម៉ាស៊ីនដឹកនាំរបស់បក្សនិងរដ្ឋ។ ខ្ញុំសូមសារភាពដោយត្រង់ថា សកម្មភាពនោះនឹងត្រូវទទួលវិន័យនៅពេលក្រោយ នៅពេលដែលយើងរកឃើញ»។
យ៉ាងណា សេចក្តីសម្រេចបិទភូមិសាស្ត្ររាជធានីភ្នំពេញ និងក្រុងតាខ្មៅ រយៈពេល២សប្ដាហ៍ ដោយអនុវត្តចាប់ពីម៉ោងសូន្យថ្ងៃទី១៥ ខែមេសា ដល់ថ្ងៃទី២៨ ខែមេសា បានបញ្ជាក់ថា ការធ្វើដំណើរចេញក្រៅពីលំនៅឋានអាចត្រូវបានអនុញ្ញាតករណីចាំបាច់ ដូចជា ទៅបំពេញការងារ ឬប្រកបមុខរបរ ឬអាជីវកម្មមួយចំនួន ដោយមានភ្ជាប់ឯកសារបញ្ជាក់ពីការងារ មុខរបរ ឬអាជីវកម្ម ដែលចេញដោយទីកន្លែងអាជីវកម្មពាក់ព័ន្ធ ឬអាជ្ញាធរដែនដីដែលនៅទីតាំងជិតបំផុត។
ចំណែកការធ្វើដំណើរទៅកន្លែងលក់ម្ហូបអាហារឬគ្រឿងឧបភោគបរិភោគ និងសម្ភារប្រើប្រាស់ចាំបាច់ប្រចាំថ្ងៃ ដែលអនុញ្ញាតឱ្យបើកដំណើរការដោយអាជ្ញាធរ ប៉ុន្តែការធ្វើដំណើរនោះ អាចធ្វើឡើងដោយសមាជិកយ៉ាងច្រើន២នាក់ក្នុងមួយលំនៅឋាន និងមិនឱ្យចេញលើសពី៣ដងក្នុងមួយសប្តាហ៍ ក្នុងភូមិសាស្ត្រក្រុងឬខណ្ឌដែលខ្លួនរស់នៅ ដោយត្រូវយកតាមខ្លួននូវអត្តសញ្ញាណបណ្ណសញ្ជាតិខ្មែរឬបណ្ណសម្គាល់ខ្លួន។
សេចក្តីប្រកាសឬសេចក្តីសម្រេចរបស់រដ្ឋាភិបាល និងអាជ្ញាធរក្រុងភ្នំពេញ រយៈពេលចុងក្រោយនេះ បានចេញជាបន្តបន្ទាប់ ដូចជា ការដាក់បម្រាមគោចរមិនឱ្យមានការធ្វើដំណើរ និងមិនឱ្យមានការជួបជុំចាប់ពីម៉ោង៨យប់ដល់ម៉ោង៥ភ្លឺក្នុងភូមិសាស្ត្រក្រុងភ្នំពេញ។
ការសម្រេចបិទមិនឱ្យមានការធ្វើដំណើរពីខេត្តមួយទៅខេត្តមួយលើកលែងករណីចាំបាច់មួយចំនួន និងបិទរមណីយដ្ឋានទេសចរណ៍ទូទាំងប្រទេសជាបណ្តោះអាសន្ន រយៈពេល១៤ថ្ងៃ គិតចាប់ពីថ្ងៃទី៧ រហូតដល់ថ្ងៃទី២០ ខែមេសា ឆ្នាំ២០២១ ។
សេចក្តីសម្រេចទាំងនេះ រដ្ឋាភិបាលបញ្ជាក់ថា ធ្វើឡើងក្នុងគោលបំណងដើម្បីទប់ស្កាត់ការឆ្លងរីករាលដាលជំងឺកូវីដ-១៩ ពីតំបន់មួយទៅកាន់តំបន់មួយទៀតតែប៉ុណ្ណោះ៕