មន្ត្រីសង្គមស៊ីវិលដែលធ្វើការងារស្និទ្ធជាមួយពលរដ្ឋប្រកបរបរក្រៅប្រព័ន្ធ បានស្នើទៅកាន់រដ្ឋាភិបាលឬអាជ្ញាធររាជធានីភ្នំពេញ ឱ្យបង្កើនចំនួនថ្ងៃចាក់វ៉ាក់សាំងជូនអ្នកបើកបរត្រីចក្រយានយន្តឬរ៉ឺម៉កកង់បីបន្ថែមទៀត ត្បិតចំនួនថ្ងៃដែលអាជ្ញាធរកំណត់សម្រាប់ចាក់ជូនពួកគេនៅមិនទាន់គ្រប់គ្រាន់នៅឡើយ។
ការស្នើនេះ ក្រោយពេលរដ្ឋបាលរាជធានីភ្នំពេញបានចេញលិខិតមួយកាលពីថ្ងៃទី១៣ ខែមេសា ឆ្នាំ២០២១ បញ្ជាក់ពីការរៀបចំការចាក់វ៉ាក់សាំងជូនប្រជាពលរដ្ឋដែលជាអ្នកបើកបរត្រីចក្រយានយន្តក្នុងរាជធានីភ្នំពេញ។ យុទ្ធនាការនេះធ្វើឡើងតែរយៈពេល៥ថ្ងៃប៉ុណ្ណោះ ពោលគឺចាប់ពីថ្ងៃទី១៤ ដល់ត្រឹមថ្ងៃទី១៨ ខែមេសា តាមទីតាំងចំនួន៣២មណ្ឌលក្នុងខណ្ឌទាំង១៤ នៅរាជធានីភ្នំពេញ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា លោកគាំទ្រលើយុទ្ធនាការចាក់វ៉ាក់សាំងរបស់រដ្ឋបាលរាជធានីភ្នំពេញ ចំពោះអ្នករត់រ៉ឺម៉កកង់បីគ្រប់ប្រភេទ ខណៈសមាជិកសមាគមរបស់លោក ដែលជាអ្នកប្រកបរបរក្រៅប្រព័ន្ធមានចំនួន ៣០% ហើយបានចាក់វ៉ាក់សាំងកូវីដ-១៩ លើកទី១។
លោកមានប្រសាសន៍ថា៖ «វាជាចំណុចល្អដែលសាលាក្រុងបានអំពាវនាវឱ្យចាក់វ៉ាក់សាំង ព្រោះជាចំណុចមួយដែលការពារគាត់ ព្រោះពួកគាត់ជាមនុស្សជួរមុខដែលប្រឈមខ្លាំង។ ការអំពាវនាវឱ្យអ្នកធ្វើការសេដ្ឋកិច្ចក្រៅប្រព័ន្ធចាក់វ៉ាក់សាំង ជាការរួមចំណែកមួយទប់ស្កាត់ការរីករាលដាលនៃជំងឺកូវីដ-១៩ តាមសហគមន៍ផងដែរ»។
ទោះជាយ៉ាងណាក៏ដោយ លោកស្នើទៅរដ្ឋាភិបាលឱ្យពន្យារពេលឬបង្កើនចំនួនថ្ងៃនៃការចាក់វ៉ាក់សាំងនេះបន្ថែមទៀត ដោយលោកអះអាងថា ប្រជាពលរដ្ឋដែលជាអ្នករត់រ៉ឺម៉កកង់បីមួយចំនួនពិបាកក្នុងការធ្វើលិខិតស្នើសុំអាជ្ញាធរដើម្បីទទួលបានការចាក់វ៉ាក់សាំង និងខ្លះទៀតកំពុងនៅឯស្រុកកំណើតនៅឡើយ។
លោកបន្តថា៖ «ខ្ញុំសូមអំពាវនាវទៅរដ្ឋាភិបាល ក៏ដូចជាសាលាក្រុងភ្នំពេញដែរ អញ្ចឹងសូមមេត្តាជួយពង្រីកវិសាលភាព បង្កើនថ្ងៃថែមទៀត ព្រោះត្រឹមថ្ងៃទី១៨ អត់អាចគ្រាន់ទេ បន្ថែមរហូតដល់ថ្ងៃ២០អញ្ចឹង ព្រោះប្រទេសយើងកំពុង Lockdown [បិទខ្ទប់] អញ្ចឹងអាចបន្ថែមរហូតដល់ដាច់ខែ៤ ចូលខែ៥ ពីព្រោះអ្នកមួយចំនួនគាត់ធ្វើដំណើរទៅស្រុកកំណើត គាត់នៅជាប់នៅខេត្ត អត់អត់អាចមកក្រុងបាន អញ្ចឹងវាពិបាកចាក់។ អញ្ចឹងហើយបានខ្ញុំសូមពន្យារតទៅទៀត»។
វីអូឌី នៅមិនទាន់សុំការឆ្លើយតបពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី និងអភិបាលរាជធានីភ្នំពេញលោក ឃួង ស្រេង បានទេ នៅថ្ងៃទី១៥ ខែមេសា ជុំវិញការស្នើនេះ។
យ៉ាងណា លិខិតរដ្ឋបាលរាជធានីភ្នំពេញដដែលបានតម្រូវឱ្យ សមាគមរួមគ្នាអភិវឌ្ឍន៍ដើម្បីសន្តិភាព ចាក់វ៉ាក់សាំងនៅមណ្ឌលសុខភាពផ្សារដើមថ្កូវ-ទួលគោក និងមន្ទីរពេទ្យចតុមុខ។
ដោយឡែក ក្រុមហ៊ុន WEGO ចាក់វ៉ាក់សាំងនៅមណ្ឌលសុខភាពជ្រោយចង្វារ-គីឡូម៉ែត្រលេខ៩ និងមណ្ឌលសុខភាពសាមគ្គី និងក្រុមហ៊ុន TADA ត្រូវចាក់វ៉ាក់សាំងនៅមណ្ឌលសុខភាពបឹងធំ មណ្ឌលសុខភាពព្រែកឯង មណ្ឌលសុខភាពស្ទឹងមានជ័យ មណ្ឌលសុខភាពឃ្មួញ និងមណ្ឌលសុខភាពព្រៃវែង។
ប្រភពដដែលថា ក្រុមហ៊ុន GRAB ចាក់វ៉ាក់សាំងនៅមណ្ឌលសុខភាពពញាពន់ មន្ទីរពេទ្យបង្អែកច្បារអំពៅ មន្ទីរពេទ្យបង្អែកច្បារអំពៅព្រែកព្នៅ មន្ទីពេទ្យបង្អែកច្បារអំពៅដង្កោ មន្ទីពេទ្យបង្អែកមិត្តភាពកម្ពុជា-ចិនសែនសុខ ជាដើម។
សម្រាប់ក្រុមហ៊ុន PASS APP ចាក់នៅបឋមសិក្សាជាស៊ីមសន្ធរម៉ុក បឋមសិក្សាឫស្សីកែវ បឋមសិក្សាជម្ពូវ័ន្ត ព្រមទាំងតាមសាលារៀននិងមណ្ឌលសុខភាពនារាជធានីភ្នំពេញមួយចំនួនទៀត។
តាមរយៈសារជាសំឡេង នៅថ្ងៃទី០២ ខែមេសា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានណែនាំក្រសួងពាក់ព័ន្ធឱ្យរៀបចំចាក់វ៉ាក់សាំងជូនពលរដ្ឋដែលងាយរងគ្រោះ ក្នុងរាជធានីភ្នំពេញ ចំនួន២០ម៉ឺននាក់បន្ថែមទៀត សម្រាប់អ្នកប្រកបមុខរបរសេដ្ឋកិច្ចក្រៅប្រព័ន្ធ ក្រោមហេតុផលដើម្បីទប់ស្កាត់ការឆ្លងរីករាលដាលជំងឺកូវីដ-១៩។
លោកបញ្ជាក់ថា រាជធានីភ្នំពេញ បច្ចុប្បន្ន បានក្លាយជាចំណុចសំខាន់នៃការឆ្លងរីករាលដាលនៃជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈ និងជាទីកន្លែងដែលត្រូវទប់ស្កាត់ជាបន្ទាន់។
លោកនាយករដ្ឋមន្ត្រី ឱ្យដឹងថា អ្នកប្រកបរបរសេដ្ឋកិច្ចក្រៅប្រព័ន្ធដែលត្រូវទទួលបានការចាក់វ៉ាក់សាំងបន្ទាន់នេះ រួមមានអ្នករត់រ៉ឺម៉កកង់បី អ្នកដឹកអីវ៉ាន់តាមអនឡាញ អ្នកលក់បន្លែ-ផ្លែឈើ និងអ្នកលក់ដូរមួយចំនួននៅតាមទីផ្សារ ជាដើម ដោយលោកព្រួយបារម្ភថា ពួកគេអាចនឹងក្លាយជាអ្នកចម្លងជំងឺដ៏កាចសាហាវនេះ៕