អភិបាលរាជធានីភ្នំពេញ អះអាងថា អាជ្ញាធរបានឱ្យគណៈកម្មការនៅតាមផ្សារនីមួយៗ ត្រូវត្រួតពិនិត្យនិងតាមដានអាជីវករដែលលក់ដូរទំនិញតាមផ្សារទាំងនោះ ដើម្បីកុំឱ្យពួកគេឆ្លៀតឱកាសដំឡើងថ្លៃគ្មានហេតុផល។
កាលពីថ្ងៃទី១៤ ខែមេសា ឆ្នាំ២០២១ ប្រជាពលរដ្ឋបាននាំគ្នាសម្រុកទៅផ្សារ ដើម្បីទិញសម្ភារប្រើប្រាស់និងស្បៀងអាហារស្តុកទុក ក្រោយសារសំឡេងរបស់លោកនាយករដ្ឋមន្ត្រី ហ៊ុន សែន ត្រូវបានគេចែកចាយក្នុងបណ្តាញសង្គមហ្វេសប៊ុក ពាក់ព័ន្ធនឹងការបិទភូមិសាស្ត្ររាជធានីភ្នំពេញនិងក្រុងតាខ្មៅ រយៈពេល១៤ថ្ងៃ។
ការសម្រុកនាំគ្នាទៅផ្សារទិញសម្ភារប្រើប្រាស់និងស្បៀងអាហារស្តុកទុកយ៉ាងគំហុកនោះ បណ្តាលឱ្យត្រី សាច់ បន្លែ ផ្លែឈើ ជាដើម ឡើងថ្លៃទ្វេដង។
អភិបាលរាជធានីភ្នំពេញ លោក ឃួង ស្រេង ប្រាប់ វីអូឌី នៅថ្ងៃនេះថា អាជីវករបានលក់ទំនិញតាមថ្លៃដើមវិញ បន្ទាប់ពីលោកបានអំពាវនាវទៅពួកគេមិនឱ្យដំឡើងថ្លៃគ្មានហេតុផល ក្នុងអំឡុងពេលអាជ្ញាធរបិទភូមិសាស្រ្តរាជធានីភ្នំពេញ និងក្រុងតាខ្មៅ។
លោកបន្តថា បច្ចុប្បន្ន អាជ្ញាធរបានឱ្យគណៈកម្មការនៅតាមផ្សារនីមួយៗតាមដានបន្ថែមទៀត ដោយថា បើសិនជាអាជីវករមិនអនុវត្តតាមទេនោះ អាជ្ញាធរនឹងចាត់វិធានការ។
លោកថា៖ «ក្រោយពីខ្ញុំផ្សព្វផ្សាយទៅអាជីវករ គាត់អនុវត្តតាម ហើយគាត់លក់តាមថ្លៃដើមមុនពេលបិទខ្ទប់ [តាមការអំពាវនាវរបស់]សាលារាជធានីភ្នំពេញវិញ។ អាហ្នឹង យើងក៏ទទួលយកបាន យើងទៅធ្វើទោសអីគេ បើឧបមាថា គ្នាខុស ប៉ុន្តែគ្នាកែខ្លួនហើយ ធ្វើទោសគ្នាម៉េចកើតអាហ្នឹង យើងរដ្ឋបាល! ព័ត៌មានអ្នកចុះមានអីច្បាស់ជាងខ្ញុំទៀត ខ្ញុំអ្នកធ្វើកិច្ចការងារនេះផ្ទាល់ដៃខ្ញុំ ហើយខ្ញុំមានភ្នាក់ងារខ្ញុំរហូតដល់គណៈកម្មការផ្សារ ដើម្បីត្រួតពិនិត្យរឿងនេះ ដូចជាមិនមានបញ្ហាហ្នឹងកើតឡើងទេ ព្រោះខ្ញុំបានណែនាំគ្រប់ជ្រុងជ្រោយហើយ»។
កាលពីថ្ងៃទី១៤ ខែមេសា រដ្ឋាភិបាលបានចេញសេចក្តីសម្រេចបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ រយៈពេល១៤ថ្ងៃ គិតចាប់ពីថ្ងៃទី១៥ ដល់ថ្ងៃទី២៨ ខែមេសា ឆ្នាំ២០២១ ដោយថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ទៅតំបន់ផ្សេងទៀតដែលធ្វើឱ្យពិបាកគ្រប់គ្រង។
ភ្លាមៗនោះ ប្រមុខរដ្ឋាភិបាលលោក ហ៊ុន សែន បានចេញមុខបញ្ជាក់ថា វិធានការនេះដាក់ចេញពិតមែន ប៉ុន្តែបញ្ហាស្បៀងអាហារ សេវាទឹក ភ្លើង ជាដើម សម្រាប់ពលរដ្ឋក្នុងតំបន់បិទខ្ទប់ នឹងមិនចោទជាបញ្ហាឡើយ។
លោកក៏បានបញ្ជាទៅរដ្ឋបាលរាជធានីភ្នំពេញ ត្រូវយកចិត្តទុកដាក់និងផ្តល់នូវជំនួយសង្គ្រោះជួយដល់ប្រជាពលរដ្ឋនៅតំបន់ក្រីក្រ និងឱ្យក្រសួងស្ថាប័នពាក់ព័ន្ធពិនិត្យនិងទប់ស្កាត់កុំឱ្យឈ្មួញឆ្លៀតឱកាសដំឡើងថ្លៃទំនិញនៅលើទីផ្សារក្នុងស្ថានភាពប្រទេសជាតិជួបការលំបាក។
កាលពីថ្ងៃទី១៥ ខែមេសា ក្រសួងពាណិជ្ជកម្ម បានប្រកាសថា ខ្លួនត្រៀមបញ្ចេញស្បៀងមួយចំនួនដើម្បីទប់ស្កាត់ការឡើងថ្លៃទំនិញលើទីផ្សារ។ ក្រសួងពាណិជ្ជកម្ម ឱ្យដឹងថា ក្រសួងមានស្បៀងគ្រប់គ្រាន់សម្រាប់បញ្ចេញនាពេលនេះ ត្រៀមទុកទម្រាំបញ្ចប់ព្រឹត្តិការណ៍២០កុម្ភៈផងដែរ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ មានប្រសាសន៍ថា ក្រសួងបានចាប់ផ្ដើមលក់អង្ករនិងមីចល័តក្នុងរាជធានីភ្នំពេញ ដូចជា ផ្លូវវេងស្រេង ស្ទឹងមានជ័យ ជាដើម ហើយការលក់នេះមានតម្លៃទាបជាងទីផ្សារ ដើម្បជួយសម្រួលដល់ប្រជាពលរដ្ឋក្នុងអំឡុងពេលវិបត្តិជំងឺកូវីដ-១៩នេះ។
លោកថា៖ «យើងមានស្បៀងគ្រប់គ្រាន់ ហើយទន្ទឹមពីនេះ យើងក៏មិនមែនអាងតែស្បៀងក្នុងឃ្លាំងដែរ យើងក៏មានប្រភពផលិតបន្តដែរ រដូវប្រមូលផលទើបកន្លងផុត យើងមានសល់ស្រូវ សល់អង្ករច្រើន យើងអាចប្រើប្រាស់ស្បៀងជាអង្ករហ្នឹង គឺមិនភ័យខ្វះខាតទេ។ អ៊ីចឹងយើងប្រើប្រាស់ក្នុងស្រុកយើងមានប្រើប្រាស់គ្រប់គ្រាន់ សម្រាប់ទប់ទល់ការខ្វះខាតក្នុងគ្រានេះ។ រោងចក្រមីយើងក៏មានលទ្ធភាពផលិត រោចក្រផលិតត្រីខផ្សេងៗក៏យើងមានប្រភពទទួលទិញ បន្លែក៏នៅមានប្រភពផ្គត់ផ្គង់ដែរ»។
លោក ប៉ែន សុវិជាតិ បានឱ្យដឹងថា តម្លៃអង្ករផ្កាម្លិះ ១៧៥,០០០រៀល ក្នុងមួយបាវ, អង្ករផ្កាខ្ញី ១២០,០០០រៀល ក្នុងមួយបាវ, អង្ករនាងខុន ១១០,០០០រៀល ក្នុងមួយបាវ, អង្ករនាងមិញ ១០០,០០០រៀល ក្នុងមួយបាវ និងតម្លៃមីជាតិ ១កេស (២៤កញ្ចប់) ១៦,០០០រៀលក្នុងមួយកេស។
ប្រជាពលរដ្ឋម្នាក់រស់នៅជិតវត្តសន្សំកុសល សង្កាត់បឹងទំពុន ខណ្ឌមានជ័យ រាជធានីភ្នំពេញ លោក ឌី សំណាង យល់ថា ការបញ្ជាឱ្យគណៈកម្មការផ្សារត្រួតពិនិត្យនិងតាមដានអាជីវករមិនឱ្យលក់ទំនិញឡើងថ្លៃនៅតាមផ្សារ ជារឿងល្អ ប៉ុន្តែលោកថា វិធានការនេះធ្វើឡើងយឺតពេលបន្តិច។
លោកបន្តថា ពួកគាត់មិនជំទាស់ចំពោះវិធានការរបស់រដ្ឋាភិបាលក្នុងការបិទខ្ទប់ភ្នំពេញនិងតាខ្មៅនោះទេ ប៉ុន្តែលោកចង់ឱ្យរដ្ឋាភិបាលជូនដំណឹងដល់ប្រជាពលរដ្ឋជាមុន ហើយត្រូវប្រកាសហាមមិនឱ្យអាជីករលក់ទំនិញឡើងថ្លៃ ដើម្បីឱ្យប្រជាពលរដ្ឋងាយស្រួលទិញទំនិញបម្រុងទុកជាមុន។
លោកថា៖ «បើសិនជាគាត់ជូនដំណឹងមុន២ទៅ៣ថ្ងៃមុនទៅ ល្អ! សម្រាប់យើងជាប្រជាពលរដ្ឋ គ្រាន់យើងត្រៀមទិញទុក ណាមួយគេលក់មិនសូវថ្លៃ ដល់ពេលប្រកាសបិទភ្លាមៗអ៊ីចឹង ទាំងគេ ទាំងខ្ញុំ ទៅទិញ ហើយអាជីវករគាត់លក់ឆ្លៀតឱកាសពេលហ្នឹង គាត់ចាប់ផ្ដើមលក់ឡើងថ្លៃ។ ប្រពន្ធខ្ញុំធ្លាប់ទិញត្រី និងមី ថ្ងៃធម្មតាតែ ១៨ ០០០ ទៅ ២០ ០០០រៀលដល់ថ្ងៃហ្នឹង [ថ្ងៃប្រកាសបិទ] ឡើងដល់ ៣៥ ០០០ ទៅ ៤០ ០០០រៀល»៕