ក្រសួងព័ត៌មាន ណែនាំទៅម្ចាស់ប្រព័ន្ធផ្សព្វផ្សាយទាំងអស់ត្រូវផ្អាកការផ្សព្វផ្សាយគ្រឿងស្រវឹងគ្រប់ប្រភេទ ក្នុងអំឡុងពេលអនុវត្តការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
យោងតាមលិខិតក្រសួងព័ត៌មាន ចុះថ្ងៃទី១៩ ខែមេសា ឆ្នាំ២០២១ ផ្ញើទៅកាន់ម្ចាស់ស្ថានីយវិទ្យុ ទូរទស្សន៍ និងប្រព័ន្ធផ្សព្វផ្សាយតាមអនឡាញទាំងអស់ បានលើកឡើងថា កាលពីសប្តាហ៍មុន រដ្ឋាភិបាលបានដាក់ចេញនូវវិធានការហាមលក់គ្រឿងស្រវឹងនៅទូទាំងប្រទេសក្នុងអំឡុងពេលបិទខ្ទប់រាជធានីភ្នំពេញ និងក្រុងតាខ្មៅ និងតំបន់មួយចំនួននៅតាមបណ្តាខេត្ត ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងឈានទៅបញ្ចប់ព្រឹតិ្តការណ៍ថ្ងៃទី២០កុម្ភៈឆាប់ៗខាងមុខនេះ។
ករណីនេះ ក្រសួងណែនាំឱ្យម្ចាស់ស្ថានីយវិទ្យុ ទូរទស្សន៍គ្រប់ប្រព័ន្ធ និងប្រព័ន្ធផ្សព្វផ្សាយតាមអនឡាញទាំងអស់ ផ្អាកការផ្សព្វផ្សាយគ្រឿងស្រវឹងគ្រប់ប្រភេទ ចាប់ពីថ្ងៃនេះរហូតដល់ថ្ងៃទី៣០ ខែមេសា ឆ្នាំ២០២១។
កាលពីអធ្រាត្រថ្ងៃទី១៤ ខែមេសា លោកនាយករដ្ឋមន្រ្តី ហ៊ុន សែន បានថ្លែងសារមួយស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ពីថ្ងៃទី១៥ ខែមេសា រហូតដល់ថ្ងៃទី២៨ ខែមេសា ក្នុងនោះ លោកបានបញ្ជាឱ្យបិទមិនឱ្យមានការលក់ដូរគ្រឿងស្រវឹងផងដែរ។
ការបញ្ជានេះ ធ្វើឡើងក្រោយពីលោកសង្កេតឃើញថា បច្ចុប្បន្ន ពលរដ្ឋនៅតាមបណ្តាខេត្តនានានៅតែបន្តប្រមូលផ្តុំគ្នាផឹកស៊ី ដោយមិនមានការត្រួតពិនិត្យឡើយ៕
